Read Bhaibhiri Idzva rechiShona Mateu 22 Bible Online

Mateu 22 - Bhaibhiri Idzva rechiShona bible

Mateu 22

¹Jesu akataurazve kwavari nemienzaniso achiti,

²“Umambo hwedenga hungafanidzwe namambo akaitira mwanakomana wake mabiko omuchato.

³Akatuma varanda vake kundodaidza avo vakanga vakokwa kumabiko omuchato; asi havana kuda kuuya.

⁴Akatumazve vamwe varanda achiti indotaurirai vakakokwa vaya kuti, ‘Onai, ndagadzirira mabiko angu, ndabaya mombe, ndikabaya zvimhuru zvangu zvakakora. Zvose zvagadzirirwa. Chiuyai kumabiko omuchato.’

⁵Asi ivo havana kumboita hanya nazvo, vakabva vatoenda zvavo, mumwe kupurazi yake, mumwe kushawo[30] yake.

⁶“Vamwewo vakatobata varanda vake vakavafumura vakavauraya.

⁷Mambo akashatirwa akatumira masoja ake akaparadza mhondi idzodzo. Akapisa guta ravo.

⁸Akazoti kuvaranda vake, ‘Muchato wagadzirirwa asi vaya vakakokwa vanga vasina kukodzera.

⁹Saka endai pamharadzano dzemigwagwa mundokoka kumabiko omuchato vose vamunenge makwanisa kuwana.’

¹⁰Varanda vaya vakafamba nemigwagwa vakakokorodza vose vavakakwanisa kuwana, vakanaka navakaipa. Saizvozvo zimba romuchato rakazara navakanga vakokwa.

¹¹“Mambo paakauya kuzoona vaeni, akaona imomo mumwe munhu akanga asina hanzu yomuchato.

¹²Akati kwaari, ‘Shamwari, wapinda seiko muno usina hanzu yomuchato?’ Akabva aomerwa nerokutaura.

¹³Mambo akati kuna vashandi vake, ‘Musungei maoko namakumbo mumukande murima rokunze.’ ” Ikoko vanhu vachachema nokurumanidza mazino.

¹⁴Nokuti vazhinji vanodaidzwa asi vashoma ndivo vanosarudzwa.

¹⁵VaFarisei vakaenda vakandoita musangano kuti vangamubate sei mukutaura kwake.

¹⁶Vakatuma kwaari vadzidzi vavo pamwechete nevechikwata chokwaHerodhi vachiti, “Mudzidzisi, tinoziva kuti muri munhu ari pachokwadi uye kuti munodzidzisa gwara raMwari zviri pachokwadi musingatyi munhu nokuti hamunei nechigaro chino munhu.

¹⁷Saka tiudzei kuti munofungei, zviri pamutemo here kutera mutero kuna Siza kana kuti kwete?”

¹⁸Jesu akaziva uipi hwavo akati, “Munondiedzereiko nhai imi vanyengedzi?

¹⁹Ndiratidzei mari yacho yamunotera nayo mutero.” Vakamuunzira mari chena yainzi dhenari.

²⁰Jesu ndokuti kwavari, “Ko mufananidzo uyu norunyoro urwu ndezvani?”

²¹Vakati, “NdezvaSiza.” Iye ndokuvati, “Ipai zvaSiza kuna Siza, mupewo zvaMwari kuna Mwari.”

²²Pavakazvinzwa zvakavashamisa vakamusiya voenda zvavo.

²³Pazuva rimwechetero, vaSadhusei vakauyawo kwaari. Ndivo vaya vanoti zvokumuka kwavakafa hakuna. Vakamubvunza vachiti,

²⁴“Mudzidzisi, Mosesi akati kana murume akafa asina vana munun'una wake anofanira kumugara nhaka kuti aberekere mukoma vana.

²⁵Zvino pakati pedu kwaiva navarume, mukoma nomunun'una vanomwe. Wokutanga akaroora akafa asina kuita vana. Akasiya mukadzi wake kumunun'una wake.

²⁶Ndizvozvowo zvakaitika kune wechipiri newechitatu kusvika kune wechinomwe.

²⁷Mushure mavo vose, mukadzi uya akafa.

²⁸Ko zvino pakumuka kwavakafa achava mukadzi woupi pavanomwe ivava nokuti akambova wavo vose zvavo?”

²⁹Jesu akavapindura achiti, “Munokanganisa, nokuti hamuzivi Magwaro Matsvene uye simba raMwari.

³⁰Nokuti pakumuka kwavanhu kubva kuvafi, havazoroori kana kuroorwa. Asi vanenge vaita savatumwa vokudenga.[31]

³¹Pane zvokumuka kwavakafa hamuna kuverenga here zvakataurwa naMwari kwamuri achiti,

³²‘Ndini Mwari waAbhurahamu naMwari Isaki, naMwari Jakobho. Haasi Mwari wavakafa asi Mwari wavapenyu?’ ”

³³Uuzhinji hwavanhu pahwakazvinzwa hwakashamiswa nechidzidziso chake.

³⁴VaFarisei pavakanzwa kuti akapwisa vaSadhusei, vakaungana.

³⁵Mumwe wavo aiva, gweta, akamubvunza mubvunzo wokumuedza achiti,

³⁶“Mudzidzisi ndoupi murao mukuru mumutemo?”

³⁷Jesu akati kwaari, “Ida Tenzi Mwari wako nomwoyo wako wose nomweya wako wose nepfungwa dzako dzose.

³⁸Iwoyu ndiwo mutemo mukuru uye wokutanga.

³⁹Wechipiri wakafanana naiwo unoti, ‘Ida mumwe wako sokuda kwaunozviita iwe pachako.’

⁴⁰Mirao miviri iyoyi ndiyo misimboti yemitemo yose navaporofita.”

⁴¹VaFarisei pavakanga vakaungana, Jesu akavabvunza mubvunzo

⁴²achiti, “Munofungei nezvaKristu? Mwanakomana waani?” Vakati kwaari, “Mwana waDhavhidhi.”

⁴³Iye akati kwavari, “Ko sei Dhavhidhi, afemerwa naMweya Mutsvene, anomuti Tenzi paanoti,

⁴⁴“ ‘Tenzi akati kuna tenzi wangu gara kurudyi rwangu, kusvikira ndaisa vavengi vako pasi petsoka dzako?’

⁴⁵Ko zvino kana Dhavhidhi achimuti, ‘Tenzi,’ ko angave Mwana wake sei?”

⁴⁶Hapana akagona kumupindura kana izwi zvaro. Uyewo kubvira pazuva iroro hapana akazofemerazve[32] kumubvunza mibvunzo mimwe.