Read Bhaibhiri Idzva rechiShona Mateu 24 Bible Online

Mateu 24 - Bhaibhiri Idzva rechiShona bible

Mateu 24

¹Jesu paakanga achibva muTemberi avakuenda, vadzidzi vake vakauya kwaari vachimunongedzera dzimba dzeTemberi.

²Asi iye akapindura achiti, “Muri kuona zvose izvi handiti, zvechokwadi ndinoti kwamuri hapachazosara dombo riri pamusoro perimwe risingazokoromotserwa pasi.”

³Paakanga akagara pagomo roMuorivhi, vadzidzi vakauya kwaari vari voga pachavo vachiti, “Tiudzei, zvichaitika rinhi izvi uye chii chicharatidza kuti mavakuuya, uyewo kuti nyika yava kuguma?”

⁴Jesu akavapindura achiti, “Chenjerai kuti murege kurasiswa naani zvake.

⁵Nokuti kuna vazhinji vachauya nomuzita rangu vachiti ndini, ‘Kristu.’ Vacharasisa vazhinji.

⁶Muchanzwa zvehondo namarehwarehwa ehondo. Musanyanye kutya zvenyu. Izvi zvinofanira kuti zviitike asi magumo anenge asati asvika.

⁷Rudzi ruchamukirana norumwe rudzi noumambo huchamukirana nohumwe humambo. Kuchava nedzinzara nokundengendeka kwapasi munzvimbo dzakasiyana — siyana.

⁸Iri rinenge riri romoromo chete ramatambudziko okusununguka.

⁹Vachakupinzai mudambudziko vachikuurayai. Muchavengwa namarudzi ose pamusana pezita rangu.

¹⁰Vazhinji vachakoromoka pakutenda kwavo. Vachacherana vachivengana.

¹¹Pachamuka vaporofita venhema vachizorasisa vanhu nzira.

¹²Nokuda kokuti uipi hunenge hwawanda, rudo rwavazhinji ruchatonhora.

¹³Asi uyo anotsungarara kusvikira kumagumo achaponeswa.

¹⁴Shoko iri Rakanaka roumambo richaparidzwa pasi pose souchapupu kumarudzi ose. Ndipo panozouya kuguma.

¹⁵“Naizvozvo kana moona chiya choumharadzi chinon'oresa chakarehwa nomuporofita Dhanieri chamira munzvimbo inoera (anoverenga ngaanzwisise.)

¹⁶Ipapo vari muJudhea ngavatizire kumakomo.

¹⁷Uyo anenge ari pamusoro pemba ngaarege kuburikira pasi kuti andotora zviri mumba make.

¹⁸Anenge ari kumunda ngaarege kudzokera kundotora jasi rake.

¹⁹Hameno zvavo vanenge vaina pamuviri navavo vanenge vachiri kuyamwisa pamazuva iwayo.

²⁰Namatai kuti kutiza kwenyu kusave panguva yechando kana kuti pazuva reSabata.

²¹Nokuti kuchava nenhamo huru isati yamboitika kubvira pakutanga kwapasi kusvikira pari zvino uye hazvichazombofa zvakaitikazve.

²²Dai kuri kuti mazuva iwayo haana kutapudzwa, hapana munhu aiponeswa, asi pamusana pavakasarudzwa, mazuva iwayo achatapudzwa.

²³“Ipapo kana ani zvake akati kwamuri, ‘Tarisai houno Kristu kana kuti ari koko,’ musazvidavire

²⁴nokuti kuchamuka vana Kristu vamanyepo navaporofita venhema vachiratidza zviratidzo zvikuru nezvishamiso kuti vatsautse, kana zvakwanisika, kunyange vasarudzwi.

²⁵Chionai kuti ndakutaurirai zvisati zvaitika.

²⁶Naizvozvo kana vakati kwamuri, ‘Hoyo ari murenje, musabude muchiendako. Kana vakati ari mudzimba dzomukati’ musazvitenda.

²⁷Sokuvaima kunoita mheni kubva kumabvazuva kusvika kumadokero ndiko kuuya kuchaita Mwanakomana womunhu.

²⁸Pane chitunha, magora[35] ndipo paanoungana.

²⁹“Nhamo yamazuva iwayo ichangobva mukupera, zuva richaora, mwedzi uchisvipa uye nyenyedzi dzichadonha kubva mudenga. Masimba omumatenga achazungunutswa.

³⁰Ndipo pachaonekwa mudenga chiratidzo choMwanakomana womunhu. Marudzi apasi pose achaungudza. Vachaona Mwanakomana womunhu achiuya ari mumakore edenga aine simba nembiri huru.

³¹Iye achatuma vatumwa vake nehwamanda inorira kwazvo. Vachakokorodza vasarudzwi vake kubva kumativi mana enyika, kubvira kwakaperera nyika kusvikawo kwayakaperera rumwe rutivi.

³²“Dzidzai chidzidzo chinobva kumuonde. Kana bazi rawo rotunga, pfumvudza yobuda, munobva maziva kuti zhizha rava pedyo.

³³Naizvozvo imiwo kana moona izvi zvose, zivai kuti iye[36] ava padyo, atova pamusuo chaipo.[37]

³⁴Zvirokwazvo ndinoti kwamuri chizvarwa ichi hachimbopfuuri, zvinhu izvi zvisati zvaitika.

³⁵Denga napasi zvichapera asi mazwi angu haambopfuuri.

³⁶“Asi zvezuva iroro nenguva yacho hapana anozviziva kunyange vatumwa vedenga, kanawo Mwanakomana asi Baba voga.

³⁷Sezvazvakanga zvakaita pamazuva aNowa, ndizvozvowo zvazvichaita pakuuya kwoMwanakomana womunhu.

³⁸Sapamazuva iwayo, mafashamo emvura asati auya, vanhu vaidya nokunwa vachiroora nokuroorwa kusvikira pazuva rakapinda Nowa mungarava.

³⁹Havana kuziva kusvikira mafashamo auya akavatsvaira vose. Ndizvo zvazvichaita pakuuya kwoMwanakomana womunhu.

⁴⁰Pavarume vaviri vanenge vari mumunda, mumwe achatorwa mumwe achisiiwa.

⁴¹Vakadzi vaviri vanenge vari paguyo vachikuya pamwechete, mumwe achatorwa mumwe achisiiwa.

⁴²Nezvo rindirai nokuti hamuzivi kuti Tenzi wenyu anouya zuva ripi.

⁴³Asi zivai izvi zvokuti dai saimba aiziva nguva yousiku ichauya nayo mbavha aigaririra. Haairega imba yake ichipazwa.

⁴⁴Saizvozvo nemiwo garai makagadzirira nokuti Mwanakomana womunhu anouya nenguva yamusingamutarisiri.

⁴⁵“Ndoupi zvino muranda wakatendeka uye akangwara anoiswa pabasa natenzi wake rokutarira vomumusha make kuti avape zvokudya zvavo nenguva kwayo?

⁴⁶Akakomborerwa muranda uyo anoti kana tenzi wake wouya anomuwana achiita saizvozvo.

⁴⁷Zvechokwadi, ndinoti kwamuri achamuita mukuru wezvose zvaanazvo.

⁴⁸Asi kana muranda uya akaipa, achizviti mumwoyo, ‘Tenzi wangu anonoka,’

⁴⁹iye wotanga kurova vamwe varanda naye, achidya nokunwa nezvidhakwa;

⁵⁰tenzi womuranda uyu achauya pazuva raasingamutarisiri uye panguva yaasingazivi,

⁵¹omuranga[38] achimuisa pamwechete navanyengedzi, ikoko vanhu vachachema vachirumanidza mazino.