Read Bhaibhiri Idzva rechiShona Mateu 26 Bible Online

Mateu 26 - Bhaibhiri Idzva rechiShona bible

Mateu 26

¹Jesu paakapedza kutaura zvose izvi akati kuna vadzidzi vake,

²“Munoziva kuti mumashure memazuva maviri, Pasika iri kusvika. Mwanakomana womunhu achaturirwa kuti arovererwe pamuchinjikwa.”

³Vapristi vakuru navakuru vakuru vavanhu vakaungana mumuzinda womupristi mukuru ainzi Kaifasi.

⁴Vakaita bangano rokuti vasunge Jesu zvomuchivande vagomuuraya

⁵asi vakati kwete pamazuva makuru nokuti pangadaro pakaita bongozozo pakati pavanhu.

⁶Jesu paakanga ari kuBhetania ari mumba maSimoni wamaperembudzi.

⁷Kwakauya mumwe mukadzi nechinu chamafuta okuzora anokosha kwazvo chearabhasita. Akadururira mafuta acho mumusoro maJesu paakanga agere pakudya.

⁸Vadzidzi pavakazviona vakagumburwa nazvo vachiti, “Kurasa mari kudai!”

⁹Nokuti mafuta aya angadai atengeswa nemari yakawanda kwazvo ikapiwa kuvarombo.

¹⁰Jesu achizviziva, akati kwavari, “Ko munonetserei mukadzi uyu? Inga aita chinhu chakanakisisa wani kwandiri.

¹¹Varombo munavo nguva dzose wani asi ini hamuneni nguva dzose.

¹²Nokudira kwaaita mafuta aya pamuviri wangu, aita izvi kundigadzirira kuvigwa kwangu.

¹³Zvechokwadi chaizvo ndinoti kwamuri, kwose kuchaparidzwa shoko rakanaka iri, pasi pose, zvaaita zvichataurwa sechinhu chokumuyeuka nacho.”

¹⁴Zvino mumwe wavane gumi navaviri ainzi Judhasi Isikarioti akaenda kuvapristi vakuru

¹⁵akati, “Muchandipa chii kana ndikamuturira kwamuri.” Vakamubhadhara makumi matatu emari yesirivha.

¹⁶Kubvira ipapo Judhasi akanga achitsvaka nguva yokuti amutengese nayo.

¹⁷Pazuva rokutanga rechingwa chisina mbiriso, vadzidzi vakauya kuna Jesu vachiti, “Ndokupi kwamungade kuti tindokugadzirirai kuti mudyire Pasika?”

¹⁸Iye akati, “Endai muguta panhingi mundoti kwaari, Mudzidzisi ati, ‘Nguva yangu yasvika. Pamba pako ndipo pandichadyira Pasika navadzidzi vangu.’ ”

¹⁹Vadzidzi vakaita sokutaurirwa kwavakanga vaitwa naJesu. Vakagadzirira Pasika.

²⁰Ava manheru, Jesu akagara pakudya navadzidzi gumi navaviri.

²¹Pavakanga vachidya akati, “Zvechokwadi ndinoti kwamuri mumwe wenyu achanditengesa.”

²²Vakabva vasuruvara kwazvo vakatanga mumwe nomumwe kutaura kwaari vachiti, “Ndini here Tenzi?”

²³Jesu akavapindura achiti, “Uyo aseva mundiro neni, ndiye achanditengesa.”

²⁴Mwanakomana womunhu anoenda sokunyorwa kwazvakaitwa nezvake asi zvichamuwana munhu uyo anotengesa Mwanakomana womunhu. Zvaitova nani dai munhu iyeyo asina kuzvarwa zvake.

²⁵Judhasi, uyo akazomutengesa akati, “Ndini here mudzidzisi?” Jesu akati kwaari, “Inga wazvireva oga wani.”

²⁶Zvavakanga vari pakudya, Jesu akatora chingwa akatenda ndokuchimedura akachipa kuvadzidzi vake achiti, “Torai mudye, uyu muviri wangu.”

²⁷Akatorawo mukombe akatenda ndokuupa kwavari achiti,

²⁸“Unwei mose nokuti iri iropa rangu rechitenderano[40] chitsva rinodeurirwa vazhinji kuti varegererwe zvitadzo.

²⁹Ndinokutaurirai kuti handichazonwazve waini yomugirepisi kusvikira pazuva randinozonwa waini itsva nemi muumambo hwaBaba vangu.”

³⁰Kuzoti vaimba rumbo vakabuda vakaenda kugomo roMuorivhi.

³¹Jesu akati kwavari, “Mucharasiswa mose pamusana pangu usiku huno nokuti zvakanyorwa zvichinzi, ‘Ndicharova mufudzi danga rehwai rigopararira.’

³²Asi kana ndamutswa ndichafanokutungamirirai kuGarirea.”

³³Pita akamupindura achiti, “Vamwe vose vangarasiswe zvavo pamusana penyu asi ini handimborasika.”

³⁴Jesu akati kwaari, “Zvirokwazvo ndinoti kwauri ihwo usiku hwanhasi uno uchandiramba katatu jongwe risati rakukuridza.”

³⁵Pita akati kwaari, “Kunyange zvikanzi ndife nemi handimbokurambai.” Ndizvo zvakataurwawo navamwe vadzidzi vose.

³⁶Jesu akaenda navo kune imwe nzvimbo inonzi Getsemani, akati kuvadzidzi vake, “Garai pano ini ndimboenda uko ndimbondonamata.”

³⁷Akatora Pita navanakomana vaviri vokwaZebhedhi akabva atanga kudumbirwa nokutambura.

³⁸Akazoti kwavari, “Ini ndadumbirwa zvikuru zvokunge ndichafa. Sarai pano murindire pamwechete neni.”

³⁹Jesu akaenda mberi zvishoma ndokubva awira pasi nouso akanamata achiti, “Baba vangu, kana zvichigoneka, mukombe uyu wamatambudziko[41] ngaundipfuure asi kurege kuva kuda kwangu asi kuda kwenyu.”

⁴⁰Akadzokera kuna vadzidzi akavawana vatokotsira. Jesu akati kuna Pita, “Saka matadzaka imi kurindira neni kweawa imwechete?

⁴¹Rindirai munamate kuti murege kupinda mukuedzwa. Mweya unoda zvawo asi nyama yaneta.”

⁴²Jesu asudurukazve akanamata achiti, “Baba vangu, kana mukombe uyu usingakwanisi kundipesa ndichifanira kuunwa, kuda kwenyu ngakuitwe.”

⁴³Akauyazve akavawana vakotsira nokuti hope dzakanga dzavabata zvikuru.

⁴⁴Jesu akavasiyazve, akaenda akandonamata rwechitatu achitaura mazwi mamwechetewo.

⁴⁵Akadzokazve kuna vadzidzi vake akati kwavari, “Muchiri kungokotsira zvenyu muchitozorora nhai? Tarirai muone kuti nguva yatosvika yavakuturirwa Mwanakomana womunhu mumaoko avatadzi.

⁴⁶Chisimukai tiende, houno anonditengesa wavakusvika.”

⁴⁷Paakanga achiri kutaura, Judhasi, mumwe wavane gumi navaviri akasvika, nechikwata chikuru chavanhu vaine mapakatwa netsvimbo vachibva kuvapristi vakuru navakuru — vakuru vavanhu.

⁴⁸Mutengesi uya akanga avapa chiratidzo chokuti uyo wandinenge ndatsvoda ndiyeyo, mubatei.

⁴⁹Judhasi akabva auya pana Jesu akati, “Tikukwaziseika, Mudzidzisi,” akabva amutsvoda.

⁵⁰Jesu akati kwaari, “Shamwari, ingoita zvawavinga.”[42] Vakabva vauya vakati Jesu dzvi kumubata.

⁵¹Ipapo mumwe wavakanga vaina naJesu akatambanudza ruoko rwake ndiye bakatwa rake wee ndokuvaura kudimura nzeve yomuranda womupristi mukuru.

⁵²Jesu akamuti, “Dzosera bakatwa rako panzvimbo paro nokuti vose vanoshandisa bakatwa vanofa nebakatwa.

⁵³Unofunga here kuti handikwanisi kukumbira Baba vangu, vachinditumira pakarepo zvikwata zvavatumwa zviuru gumi nezviviri.

⁵⁴Ko zvino Magwaro Matsvene anozozadzikiswa sei anoti zvinofanira kuti zvive saizvozvo?”

⁵⁵Panguva iyoyo Jesu akati kuzvikwata zviya zvavanhu, “Nhaimi, mauya kuzondibata segororo, muina mapakatwa netsvimbo? Zuva nezuva ndaigara muTemberi ndichidzidzisa asi hamuna kundibata.

⁵⁶Asi izvi zvaitika kuti Magwaro Matsvene avaporofita azadziswe.” Ipapo vadzidzi vose vakamusiya votiza.

⁵⁷Vaya vakabata Jesu vakaenda naye kuna Kaifasi, mupristi mukuru, kwakanga kwaunganwa nenyanzvi dzomutemo navakuru — vakuru.

⁵⁸Asi Pita akamutevera ari chinhambwe kusvikira paruvanze rwomupristi mukuru. Akapinda akagara pamwechete namapurisa kuti aone pazvinoperera.

⁵⁹Vapristi vakuru nedare rose vakatsvaka uchapupu hwenhema hokunenedzera Jesu kuti vamuuraye

⁶⁰asi vakahushaya kunyange zvazvo vazhinji vakamupupurira zvenhema. Pokupedzisira vaviri vakauya mberi vakati,

⁶¹“Munhu uyu akati ndinokwanisa kupaza Temberi yaMwari ndichiivaka namazuva matatu.”

⁶²Ipapo mupristi mukuru akasimuka akati, “Hauna mhinduro here? Ko mhosva dzaurikupomerwa navanhu ava ndedzei?”

⁶³Asi Jesu akaramba akanyarara. Mupristi mukuru akati kwaari, “Ini ndinoti pika naMwari mupenyu utiudze kuti ndiwe Mesia[43] here Mwanakomana waMwari?”

⁶⁴Jesu akati kwaari, “Ko inga matozvireva kare moga wani uye ndinokutaurirai kuti kubvira zvino muchatoona Mwanakomana womunhu agere kurudyi rwaSamasimbaose achiuya ari pamakore okudenga.”

⁶⁵Ipapo mupristi mukuru akabvarura hanzu dzake ashatirwa[44] achiti, “Ashonha Mwari. Tichadirei zvapupu? Manzwa moga kushonha kwake Mwari.

⁶⁶Ko munoti kudii nazvo?” Vakapindura vachiti, “Anofanira kufa.”

⁶⁷Vakamusvipira mate kumeso, vachimurova. Vamwe vakamurova nembama vachiti,

⁶⁸“Porofitaka tinzwe nhai iwe Mesia kuti akurova ndiani.”

⁶⁹Pita akanga agere panze muruvanze, mumwe musikana webasa akauya kwaari akati, “Newewo wanga uina Jesu wokuGarirea.”

⁷⁰Asi Pita akazviramba pamberi pavo vose achiti, “Handizivi zvauri kutaura.”

⁷¹Paakaenda kumusuo woruvanze, mumwewo musikana webasa akamuona. Akati kune vakanga vamirepo, “Murume uyu akanga ana Jesu weNazareti.”

⁷²Akazvirambazve achitopika achiti, “Handizivi munhu uyu.”

⁷³Kwapera chinguvana, vakanga vamirepo vakauya vakati kuna Pita, “Zvechokwadi iwe uri mumwe wavo nokuti mutauriro wako unokubatisa.”

⁷⁴Pita akatanga kuzvirengerera rushambwa achitopika achiti, “Handizivi munhu uyu.” Pakarepo jongwe rakabva rakukuridza.

⁷⁵Pita akayeuka zvakanga zvarehwa naJesu zvokuti, “Uchandiramba katatu jongwe risati rakukuridza.” Pita akabuda panze akahwihwidza kuchema zvinosiririsa.