Read Bhaibhiri Idzva rechiShona Mateu 27 Bible Online

Mateu 27 - Bhaibhiri Idzva rechiShona bible

Mateu 27

¹Kuzoti kwaedza vapristi vakuru vose navakuru — vakuru vavanhu vakaita bangano rokuti vauraye Jesu.

²Vakamusunga ndokuenda naye vakandomuturira kuno mutongi Pirato.

³Judhasi, uya akamutengesa, paakaona kuti Jesu atongerwa rufu akatendeuka akadzorera mari iya yesirivha makumi matatu kuvapristi vakuru navakuru — vakuru achiti,

⁴“Ndakatadza nokutengesa kwandakaita ropa risina mhaka.” Ivo vakati, “Ko isu tinei nazvo. Ndezvako izvo.”

⁵Judhasi akakanda mari iya yesirivha muTemberi akabva aenda ondozvisungirira.

⁶Asi vapristi vakuru vakatora mari iya yesirivha vakati, “Hazvisi pamutemo kuti tiise mari iyi mudura remari yomuTemberi nokuti imari yeropa.”

⁷Saizvozvo vakarangana vakatenga nayo munda womuumbi wehari kuti vagosivigamo vatorwa.

⁸Naizvozvo munda iwoyo unonzi “Munda weropa.” Nanhasi uno.

⁹Ndipo pakazadzikiswa zvakataurwa nomuporofita Jeremiya achiti, “Vakatora mari yesirivha makumi matatu waiva mutengo wakatemwa navaIsiraeri wokumutenga nawo.

¹⁰Ndiyo mari yavakatenga nayo munda womuumbi wehari sokunditaurira kwakaita Tenzi.”[45]

¹¹Jesu akamira pamberi pomutongi. Mutongi akamubvunza kuti, “Ndiwe mambo wavaJudha here?” Jesu akati, “Inga matozvireva kare wani.”

¹²Asi paakapomerwa mhosva navapristi vakuru navakuru — vakuru, haana kupindura.

¹³Ipapo Pirato akati kwaari, “Hausikunzwa here kuwanda kwezvinhu zvavari kukupomera?”

¹⁴Asi iye haana kumupindura kunyange mhosva imwechete zvayo zvokuti mutongi zvakamukatyamadza zvikuru.

¹⁵Zvino pamazuva makuru aya mutongi aiva netsika yokusunungurira vanhu musungwa mumwechete wavainge vada.

¹⁶Ipapo vakanga vaino musungwa aive nomukurumbira ainzi Bharabhasi.

¹⁷Saizvozvo vanhu pavakanga vaungana, Pirato akati kwavari, “Ndiani wamunoda kuti ndikusunungurirei, Bharabhasi here kana kuti Jesu anonzi Kristu?”

¹⁸Akadaro nokuti aiziva kuti vakanga vaturira Jesu kwaari pamusana peshanje.

¹⁹Chimwezve ndechokuti paakanga agere pachigaro chokutonga, mudzimai wake akatumira shoko kwaari achiti, “Siyanai nomunhu uyo wakarurama nokuti nhasi ndatambudzika naye zvikuru kuhope.”

²⁰Vapristi vakuru navakuru — vakuru vakagombedzera vanhu kuti vakumbire Bharabhasi asi Jesu aparadzwe.

²¹Mutongi akatizve kwavari, “Pavaviri ava ndiani wamunoda kuti ndikusunungurirei?” Ivo vakati, “Bharabhasi.”

²²Pirato akati kwavari, “Ko ndoitei naJesu anonzi Kristu?” Vose vakati, “Ngaarovererwe pamuchinjikwa.”

²³Pirato akati, “Nemhaka yei? Akapara mhosva yei? Akatadzei?” Asi vakabva vatonyanya kudaidzira vachiti, “Ngaarovererwe pamuchinjikwa.”

²⁴Pirato paakaona kuti hapana zvazviri kubatsira asi kuti pavakutomuka bongozozo, akatora mvura akageza maoko ake pamberi pemhomho iyoyo achiti, “Handina mhosva paropa romunhu uyu. Chizvionerai moga iyemi.”

²⁵Vanhu vose vakapindura vachiti, “Ropa rake ngaritipfukire isu navana vedu.”

²⁶Akavasunungurira Bharabhasi. Asi ndokurova Jesu zvikuru akamuturira mumaoko avo kuti vamuroverere pamuchinjikwa.

²⁷Masoja aPirato akaenda naJesu mumuzinda waGavhuna. Boka rose ramasoja rakamuunganira.

²⁸Vakamupfekenura hanzu vakamupfekedza gemenzi dzvuku.

²⁹Vakaruka chiremba cheminzwa vakachidzika mumusoro make. Vakamubatisa rutsanga murudyi rwake. Vaipfugama pamberi pake vachimusveeredza vachiti, “Kwaziwaika mambo wavaJudha!”

³⁰Vakamupfira mate vakatora rutsanga ruya vachimurova narwo mumusoro.

³¹Pavakapedza kumuita chiseko, vakamubvisa gemenzi riya vakamupfekedza hanzu dzake ndokuenda naye kundomuroverera pamuchinjikwa.

³²Pavakanga vakubuda, vakasangana nomumwe murume wokuSairini ainzi Simoni. Vakamanikidza murume iyeyo kutakura muchinjikwa waJesu.

³³Pavakasvika panzvimbo inonzi Gorogota zvinoreva kuti, “Nzvimbo yedehenya,”

³⁴vakamupa waini yakasanganiswa nenduru kuti anwe. Paakairavira akaramba kuinwa.

³⁵Vakati vamuroverera pamuchinjikwa, vakagoverana hanzu dzake vachiita chin'ange.[46]

³⁶Vakagara pasi vachimuchengetedza ipapo.

³⁷Nechapamusoro vakaisa chiga chemhosva yake chaiti, “UYU NDIJESU MAMBO WAVAJUDHA.”

³⁸Ipapo makororo maviri akarovererwa pamuchinjikwa pamwechete naye, mumwe ari kurudyi mumwe kuruboshe.

³⁹Vanhu vaipfuura nepo, vakamuseka vachidzungudza

⁴⁰musoro vachiti, “Ndiweka unogona kuputsa Temberi uchiivaka namazuva matatu, chizviponeseka kana uri Mwanakomana waMwari buruka pamuchinjikwa.”

⁴¹Vapristi vakuru nenyanzvi dzomutemo navakuru vakuru vakamunyombawo vachiti,

⁴²“Akaponesa vamwe asi haaagoni kuzviponesa. Ndiyeka mambo wavaIsiraeri. Ngaaburuke pamuchinjikwa iye zvino tigotenda maari.

⁴³Anovimba naMwari. Ko iye Mwari ngaachimuponesaka kana achimuda nokuti akati, ‘Ndiri Mwanakomana waMwari.’ ”

⁴⁴Kunyange makororo aya akanga akarovererwa naye akamunyombawo nenzira imwecheteyo.

⁴⁵Kubvira [47] paawa yegumi nechipiri, masikati nyika yose yakati rima tiba kusvikira paawa yechitatu masikati.

⁴⁶Neawa inenge yechitatu masikati Jesu akadaidzira nezwi guru achiti, “Eri Eri rama sabhakitani” zvinoreva kuti, “Mwari wangu Mwari wangu mandisiireiko.”

⁴⁷Vamwe vakanga vakamirapo pavakazvinzwa vakati, “Munhu uyu ari kudaidza Eriya.”

⁴⁸Mumwe wavo, pakarepo, akamhanya akatora chifovefove ndokuchinyika muwaini inovava kusvika chazara. Akachibairira parutsanga akamupa kuti anwe.

⁴⁹Asi vamwe vakati, “Mirai tione kuti Eriya achauya kuzomuponesa here.”

⁵⁰Jesu akadaidzira zvakare nezwi guru ndokubva afa.

⁵¹Hero jira romuTemberi rokudzikatirisa rakabva rabvaruka napakati kubvira kumusoro kusvika pasi. Nyika yakandengendeka; matombo akatsemuka.

⁵²Makuva akazaruka. Vanhu vazhinji vakafa vatsvene vakamutswa.

⁵³Vakabuda mumakuva mushure mokumuka kwake. Vakapinda muguta dzvene vakaonekwa navazhinji.

⁵⁴Mutungamiriri wezana ramasoja navaakanga ainavo vachichengetedza Jesu, vakaona kundengendeka nezvakanga zvaitika vakabatwa nokutya kukuru vakati, “Zvechokwadi uyu anga ari Mwanakomana waMwari.”

⁵⁵Pakangawo paina madzimai mazhinji ipapo akanga akatarisa ari chinhambwe, akanga atevera Jesu kubva Garirea achimushandira.

⁵⁶Pakati pavo paiva naMaria Maghadharena naMaria amai Jemusi naJosefi namai vavanakomana vaZebhedhi.

⁵⁷Ava manheru kwakauya mumwe murume mupfumi aibva kuArimatia ainzi Josefi aivawo mudzidzi waJesu,

⁵⁸akaenda kuna Pirato akakumbira chitunha chaJesu. Pirato akati ngachipiwe kwaari.

⁵⁹Josefi akatora chitunha ndokuchiputira mufuko rakachena.

⁶⁰Akachiradzika muguva rake idzva raakanga azvichezera mudombo. Akakungurutsira dombo guru pamusuo weguva iroro ndokuenda zvake.

⁶¹Maria Magadharena nomumwe Maria uya vakanga varipo vakagara pakatarisana neguva iroro.

⁶²Ramangwana racho, ndiro zuva romushure mezuva rokugadzirira Sabata,[48] vapristi vakuru navaFarisei vakaungana kuna Pirato vakati,

⁶³“Changamire, tinoyeuka kuti munyengedzi uya paakanga achiri mupenyu akati, ‘Mushure memazuva matatu ndichamukazve.’

⁶⁴Naizvozvo itii guva richengetedzwe kusvika pazuva retatu. Vadzidzi vake vangadaro vakaenda vakamuba vakazotaurira vanhu kuti amuka muvakafa. Kunyengedza kokupedzisira uku kungazova kwakatoipa kupinda kokutanga.”

⁶⁵Pirato akati kwavari, “Ko inga muna masoja wani. Endai mundochengetedza sokuziva kwenyu.”

⁶⁶Saizvozvo vakaenda vakanyatsochengetedza guva iroro vakaisa micherechedzo padombo iroro wokuti harina kubatwa — batwa nomunhu ndokuisa vokupachengetedza.