Read Bhaibhiri Idzva rechiShona Mateu 3 Bible Online

Mateu 3 - Bhaibhiri Idzva rechiShona bible

Mateu 3

¹Pamazuva iwayo kwakauya Johani Muombeki achiparidza murenje reJudhea achiti,

²“Pindukai nokuti umambo hwedenga hwaswedera.”

³Uyu ndiye akanyorwa nezvake nomuporofita Isaya achiti, “Izwi raanodanidzira mugwenga achiti, ‘Gadzirirai Tenzi mugwagwa. Ruramisai nzira dzake.’ ”

⁴Johani aipfeka hanzu yakagadzirwa nemvere dzenghamera nebhande reganda muchiuno chake. Chokudya chake chaiva mhashu nouchi homusango.

⁵Jerusaremu neJudhea yose navanhu vomunharaunda yeJorodhani vakabuda vachienda kwaari

⁶vakaombekwa naye murwizi rwaJorodhani vachireurura zvitadzo zvavo.

⁷Paakaona vaFarisei vazhinji navaSadhusei vachiuya kuzoombekwa akati kwavari, “Imi vana venyoka, ndiani akakunyeverai kuti mutize kurangwa kuri kuuya?

⁸Naizvozvo berekai muchero unowirirana nokupinduka kwenyu.

⁹Regai kuzvifurira muchiti zvatina Abhurahamu sababa vedu muchechetere, nokuti ndinoti kwamuri, Mwari anogona kumutsira Abhurahamu vana kubva kumatombo aya.

¹⁰Zvino demo ratonanga parinotema midzi yemiti. Naizvozvo muti wose usingabereki muchero wakanaka uchatemwa uchikandwa mumoto.

¹¹Hongu ini ndinokuombekai nemvura kuti mupinduke. Asi arikuuya mushure mangu ane simba kupinda ini. Ini handikodzeri kutakura shangu dzake; iye achakuombekai naMweya Mutsvene uye nomoto.

¹²Rusero rwake ruri muruoko rwake kuti aurutse zvapurwa paburiro rake nokuunganidza koroni yake nokuiisa mudura. Asi hundi achaipisa nomoto usingadzimiki.”

¹³Jesu akabva kuGarirea achienda kurwizi rwaJorodhani kwaiva naJohani kundoombekwa naye.

¹⁴Johani aida kumurambidza achiti, “Ini ndini ndinofanira kuombekwa nemi. Zvino imi ndimi mouya kwandiri here?”

¹⁵Jesu akamupindura achiti, “Parizvino rega zvive saizvozvo nokuti zvakanaka kuti tizadzise zvakarurama zvose.”

¹⁶Ndipo paakabvuma. Jesu paakangoombekwa akabva abuda mumvura pakarepo ndokubva matenga akazaruka[3] kwaari akaona Mweya waMwari achiburuka akaita senjiva achisvikomhara paari. Hero izwi rakabva kudenga

¹⁷richiti, “Uyu ndiye Mwanakomana wangu wapamwoyo anondifadza zvikuru.”