Read Bhaibhiri Idzva rechiShona Mateu 4 Bible Online

Mateu 4 - Bhaibhiri Idzva rechiShona bible

Mateu 4

¹Ipapo Jesu akatungamirirwa naMweya kuenda murenje kundoedzwa naSatani.

²Akatsanya siku nesikati kwamazuva makumi mana. Mushure mezvo akabva oziya.

³Muedzi akauya akati kwaari, “Kana uri Mwanakomana waMwari iti matombo aya ave chingwa.”

⁴Asi iye akapindura achiti, “Zvakanyorwa zvichinzi, ‘Munhu haararami nechingwa choga asi neizwi rose rinobuda mumuromo maMwari.’ ”

⁵Dhiabhori akamutora akaenda naye kuguta dzvene pamusorosoro chaipo peTemberi akati kwaari,

⁶“Kana uri Mwanakomana waMwari zviwisire pasi nokuti zvakanyorwa zvichinzi, ‘Achaudza vatumwa vake kuti vakuchengete, vachakugama mumaoko avo kuti urege kugumburwa rutsoka rwako nebwe.’ ”

⁷Jesu akati kwaari, “Zvakanyorwazve kuti, ‘Usaedze Tenzi Mwari wako.’ ”

⁸Dhiabhori akamutorazve akaenda naye kugomo refu — refu akamuratidza umambo noumambo hwapasi pose nembiri yaho.

⁹Satani akati kwaari, “Zvose izvi ndinokupa kana ukati pasi gwadagwa uchindinamata.”

¹⁰Jesu akati kwaari, “Ibvapo! Satani nokuti zvakanyorwa zvichinzi, ‘Unofanira kugwadamira uchinamata Tenzi Mwari wako. Iye oga ndiye waunofanira kushandira.’ ”

¹¹Dhiabhori akabva akamusiya. Vatumwa vakabva vauya kuzomushandira.

¹²Jesu paakanzwa kuti Johani akanga asungwa, akaenda kuGarirea.

¹³Akabva kuNazareti akandogara kuKapanaumu padyo negungwa, mudunhu rokwaZabhuroni nerokwaNafutari

¹⁴kuti zviya zvakanga zvataurwa nomuporofita Isaya zvizadzikiswe zvokuti,

¹⁵“Iwe nyika yeZabhuroni newe nenyika yeNafutari iri pedyo negungwa mhiri kwaJorodhani, Garirea yevechirudzi,

¹⁶vanhu vakanga vagere murima vakaona chiedza chikuru navavo vakanga vagere munyika nomumumvuri worufu chiedza chakavabudira.”

¹⁷Kubvira nguva iyoyo Jesu akatangisa kuparidza achiti pindukai nokuti umambo hokudenga hwaswedera.

¹⁸Zvino Jesu akati achifamba pamahombekombe egungwa reGarirea, akaona mukoma nomunun'una, vana Simoni anonzi Pita naAndireya munun'una wake vachikanda usvasvi hwavo mugungwa nokuti vakanga vari vabvuvi vehove.

¹⁹Akati kwavari, “Nditeverei. Ini ndichakuitai vabvuvi[4] vavanhu.”

²⁰Pakarepo vakabva vasiya usvasvi hwavo vakamutevera.

²¹Akaenda mberi akaona vamwe, mukoma nomunun'una, Jemusi mwanakomana waZebhedhi naJohani munun'una wake vari mugwa navaZebhedhi, baba vavo vachigadzira usvasvi hwavo. Akavadaidza.

²²Pakarepo vakabva vasiya igwa nababa vavo vakamutevera.

²³Jesu akafamba neGarirea yose achidzidzisa mumasinagogu avo achiparidza Shoko Rakanaka roumambo uye achirapa zvirwere zvose noundonda hwose pakati pavanhu.

²⁴Mukurumbira wake wakapararira neSiria yose. Vakaunza kwaari varwere vose vakanga vachirwara nezvirwere zvakasiyana — siyana namamwewo marwadzo navakanga vakagarwa nemweya yakaipa, navaiva netsviyo navakanga vane mitezo yomuviri yavo yakafa akavarapa.

²⁵Gurusvusvu ravanhu rakamutevera richibva kuGarirea nokuDhekaporisi nokuJerusaremu nokuJudhea uye nokumhiri kwaJorodhani.