Read Bhaibhiri Idzva rechiShona Mateu 5 Bible Online

Mateu 5 - Bhaibhiri Idzva rechiShona bible

Mateu 5

¹Jesu akati achiona gurusvusvu riya ravanhu akakwira mugomo. Paakagara pasi vadzidzi vake vakauya kwaari.

²Akazarura muromo wake akavadzidzisa achiti:

³“Vakakomborerwa zvavo varombo mumweya nokuti umambo hwedenga ndohwavo.

⁴Vakakomborerwa zvavo vanochema nokuti vachanyaradzwa

⁵vakakomborerwa zvavo vakapfava nokuti vachawana nhaka yenyika.

⁶Vakakomborerwa zvavo vane nzara nenyota yoururami nokuti vachagutswa.

⁷Vakakomborerwa zvavo vane tsitsi nokuti vachaitirwawo tsitsi.

⁸Vakakomborerwa zvavo vakachena pamwoyo nokuti vachaona Mwari.

⁹Vakakomborerwa zvavo vawadzanisi nokuti vachanzi vana vaMwari.

¹⁰Vakakomborerwa zvavo vanotambudzirwa ururami nokuti umambo hwedenga ndohwavo.

¹¹Makakomborerwa zvenyu imi kana vanhu vachikushorai nokukutambudzai vachikupomerai zvakaipa zvose zvenhema pamusana pangu.

¹²Farai mufarisise kwazvo nokuti mubayiro wenyu mukuru kudenga. Nokuti ndiko kutambudza kwavakaita vaporofita vakakutangirai.

¹³“Imi muri munyu wapasi. Zvino kana munyu usisavavi unozovaviswa nei? Unenge usisina basa unofanira kutongoraswa zvawo uchitsikwa zvawo navanhu.

¹⁴“Imi muri chiedza chapasi. Guta rakavakirwa pagomo harivanziki.

¹⁵Vanhu havatungidzi mwenje vachiukwidibira nedengu asi kuti vanotouisa pachigadzikiro chomwenje uchivhenekera vose vari mumbamo.

¹⁶Saizvozvowo, chiedza chenyu ngachivhenekere vanhu kuti vaone mabasa enyu akanaka varumbidze Baba venyu vari kudenga.

¹⁷“Regai kumbofunga zvenyu kuti ndakauya kuzoparadza mutemo kana vaporofita. Handina kuuya kuzozviparadza, asi kuzozvizadzisa.

¹⁸Nokuti ndinokutaurirai zvechokwadi chaizvo kuti denga napasi zvingapfuure zvazvo asi hapana kana kabhii kana kaga zvako komutemo kachabviswa mumutemo kusvikira zvose zvaitika.

¹⁹Nezvo ani naani anotyora mumwe wemitemo iyi achidzidzisa vanhu kudaro achanzi mudiki muumambo hwedenga. Asi uyo anoichengeta achiidzidzisa achanzi mukuru muumambo hwedenga.

²⁰“Nokuti ndinokutaurirai kuti kana ururami hwenyu hukasadarika ururami hwenyanzvi dzomutemo navaFarisei hamumbopinda muumambo hwedenga.

²¹“Makanzwa kuti zvakanzi kuna vakare, ‘Usauraye. “ ‘Ani naani anouraya achatongwa.’

²²Asi ini ndinoti kwamuri munhu wose anoshatirirwa hama yake achatongwa. Ani naani anoti kuhama yake, ‘Uri munhu pasina.’ Achakwidzwa padare. Ani naani anoti, ‘Uri rema romunhu’ anokodzera gomba romoto.

²³Ipapo kana uchindopira chipo chako paatari, ipapo ukafunga kuti hama yako ine chigumbu newe,

²⁴siya chipo chako ipapo pamberi peatari uende utange wayanana nehama yako. Wozouya zvako opira chipo chako.

²⁵“Wadzana nomunhu ari kukukwirira dare nokuchimbidza muchiri munzira yokuenda kudare angadaro uyo ari kukukwirira dare akakuisa kumutongi mutongi achizokuisa mumaoko omupurisa, uye uchizoiswa mujeri.

²⁶Zvechokwadi ndinokutaurira kuti haumbomubuda kusvikira waripa sendi rokupedzisira.

²⁷“Makanzwa kuti zvakanzi, musaite upombwe

²⁸Asi ini ndinoti kwamuri, ‘Ani naani anotarisa mukadzi achimuchiva atoita upombwe naye mumwoyo make.’

²⁹Kana ziso rako rorudyi richikukonzera kutadza risvukunure urikande kwakadaro. Zviri nani kurasikirwa neimwe nhengo yomuviri wako panze pokuti muviri wako wose ukandwe mugomba romoto.

³⁰Kana ruoko rwako rworudyi ruchikukonzera kutadza rudimbure urwukande kwakadaro. Zviri nani kurasikirwa neimwe yenhengo dzako panze pokuti muviri wako wose uende kugomba remoto.

³¹“Zvakanziwo uyo anoramba mukadzi wake ngaamupe tsamba yegupuro.

³²Asi ini ndinoti, ‘Ani naani anoramba mudzimai wake kunze kokunge chikonzero chacho chiri choupombwe, anomuita kuti aite upombwe. Ani naaniwo anoroora mukadzi akarambwa anoita upombwe.’

³³“Makanzwawo kuti zvakanzi kuvanhu vakare musapike nhema asi kuti munotofanira kuita zvamakapika kuna Tenzi.

³⁴Asi ini ndinoti kwamuri usambopika zvako naTenzi kana nedenga nokuti chigaro choumambo chaMwari; kana kupika nenyika nokuti chitambarariko chetsoka dzake;

³⁵kana kupika neJerusaremu nokuti iguta ramambo mukuru.

³⁶Usapike nomusoro wako nokuti haugoni kusandura ruvhudzi rwako kuti ruve ruchena kana rutema.

³⁷Regai hongu wenyu angova hongu nakwete wenyu angova kwete; zvimwe zvose zvinopfuura ipapa zvinobva kuna wakaipa[5] uya.

³⁸“Makanzwa kuti zvakanzi ziso rinofanira kutsiviwa neziso zino richitsiviwa nezino.

³⁹Asi ini ndinoti kwamuri, ‘Usadzivise wakaipa.’ Kana munhu akakurova mbama padama rorudyi mutendeudzire rimwezve.

⁴⁰Kana munhu achida kukukwirira dare achida kukutorera bhatye rako ibva wamupa nejasi rako.

⁴¹Kana munhu akakumanikidza kuti umuperekedze kiromita imwechete, muperekedze kwamakiromita maviri.

⁴²Munhu anokukumbira, mupe. Usanyime uyo anoda kukukwereta.

⁴³“Makanzwa kuti zvakanzi, ‘Ida mumwe wako uvenge muvengi wako.’

⁴⁴Asi ini ndinoti kwamuri, ‘Idai vavengi venyu munamatire vanokutambudzai kuti muve vana vaBaba venyu vari kudenga,’

⁴⁵nokuti ivo vanobudisira zuva ravo vakaipa navakanaka; uye vanonaisira mvura yavo vakarurama navasina kururama.

⁴⁶Ko kana muchida vanokudai, munowana mubayiro wei, ko vateresi havaiti saizvozvo here?

⁴⁷Kana muchingokwazisa hama dzenyu chete, chii chamunokunda vamwe nacho ipapa? Vechirudzi havaiti zvimwechetezvo here?

⁴⁸Nezvo imi munofanira kuva vakaruramisisa sezvakangoita Baba venyu vokudenga vakaruramisisa.”