Read Bhaibhiri Idzva rechiShona Mateu 7 Bible Online

Mateu 7 - Bhaibhiri Idzva rechiShona bible

Mateu 7

¹“Musatonge vamwe, imiwo hamuzotongwi. Matongero amunoita vamwe ndiwo amuchatongwawo nawo.

²Mwero wamunoera nawo, ndiwo mwero wamuchaererwawo nawo.

³Unotarisireiko kabanzu kari muziso rehama yako asi usingaoni zidanda riri muziso mako

⁴kana kuti ungati sei kune hama yako rega ndikubvise kabanzu kari muziso rako, imo muziso rako muine zidanda.

⁵Iwe munyengedzi, tanga wabvisa danda riri muziso rako. Ipapo unenge wava kunyatsoona kubvisa kabanzu kari muziso rehama yako.

⁶Musape zvinhu zvinoera kuimbwa kana kukanda matombo anokosha amapera pamberi penguruve, dzingadaro dzikaatsika — tsika uye dzodzoka dzokurwisai imi.

⁷“Kumbirai muchapiwa, tsvakai muchawana, gogodzai muchazarurirwa.

⁸Nokuti wose anokumbira anopiwa. Anotsvaka anowana. Uye unogogodza achazarurirwa.

⁹Nokuti ndiani wenyu anoti kana mwana wake amukumbira chingwa, anomupa dombo.

¹⁰Kana kuti akakumbira hove omupa nyoka?

¹¹Zvino kana imi vaipi, muchiziva kupa zvipo zvakanaka kuvana venyu, ko kutozoti Baba venyu vari kudenga, vanopa zvipo zvakanaka sei kuna avo vanovakumbira!

¹²Zvose zvamungade kuti vanhu vakuitirei, vaitireiwo saizvozvo nokuti uyu ndiwo mutemo navaporofita.

¹³“Pindai napasuo rakamanikana nokuti suo rinotungamira kundoparadzwa rakapamhamha uye nzira yacho inyore, vanopinda napo vakawanda.

¹⁴Asi isuo rakamanikana uye nzira yacho yakaoma inoendesa kuupenyu, vanoiwana vacho vashoma.

¹⁵“Ngwarirai vaporofita venhema, vanouya kwamuri vakapfeka matehwe ehwai ivo mukati vari mhumhi dzinorura.

¹⁶Muchavaziva nemichero yavo; magirepisi angakohwiwa muminzwa here, kana maonde murukato here?

¹⁷Nezvo muti wose wakanaka unobereka muchero wakanaka; asi muti wakaipa unobereka muchero wakaipa.

¹⁸Muti wakanaka haungabereki muchero wakaipa; mutiwo wakaipa haungabereki muchero wakanaka.

¹⁹Muti wose usingabereki muchero wakanaka unotemwa uchikandwa mumoto.

²⁰Nezvo muchavaziva nemichero yavo.

²¹“Havasi vose vanonditi, ‘Tenzi Tenzi’ vachapinda muumambo hwedenga asi uyo anoita kuda kwaBaba vangu vari kudenga.

²²Pazuva iroro, vazhinji vachanditi, ‘Tenzi Tenzi, hatina here kuporofita muzita renyu, tikadzinga mweya yakaipa muzita renyu, tikaita mabasa anoshamisa muzita renyu?’

²³Ipapo ndichavataurira pachena kuti handina kumbokuzivai. Ndibvirei pano imi vaiti vezvakaipa.

²⁴“Naizvozvo munhu wose anonzwa mazwi angu aya achiita zvaanoreva, achave somunhu mungwaru akavakira imba yake paruware.

²⁵Mvura yanaya, mafashamo akauya; dutu rikavhuvhuta richiroverera pamba iyoyo; asi haina kuwa nokuti yakanga yavakirwa paruware.

²⁶Munhu wose anonzwa mazwi angu aya, asingaachengeti, akaita somurume benzi akavakira imba yake pajecha.

²⁷Mvura yakanaya, mafashamo akauya. Dutu rakavhuvhuta rikaroverera paimba iyoyo ikawa, kuwa kwayo kwakava kukuru kwazvo.”

²⁸Jesu paakangopedza mashoko aya gungano riya ravanhu rakashamiswa norudzidziso rwake

²⁹nokuti akavadzidzisa somunhu ane simba kwete senyanzvi dzavo dzomutemo.