Read Bhaibhiri Idzva rechiShona Mariko 1 Bible Online

Mariko 1 - Bhaibhiri Idzva rechiShona bible

Mariko 1

¹Uku ndiko kutanga kweShoko Rakanaka raJesu Kristu, Mwanakomana waMwari,

²sokunyorwa kwazvakaitwa muna Isaya muporofita zvichinzi, “Chiona, ndinotuma nhume yangu pamberi pako, ichagadzirira nzira yako.

³Izwi reanodaidzira ari murenje, achiti, ‘Gadzirirai mugwagwa waTenzi, ruramisai nzira dzake.’ ”

⁴Kurenje kwakazova naJohani aiombeka, achiparidza ruombeko rwokuti vanhu vapinduke varegererwe zvitadzo zvavo.

⁵Nyika yose yeJudhea navanhu vose veJerusaremu vakakotonokera kwaari vakaombekwa naye murwizi rwaJorodhani vachireurura zvitadzo zvavo.

⁶Johani aipfeka nguwo yemvere dzengamera, aine bhande reganda muchiuno chake. Aidya hwiza nouchi hwomusango.

⁷Aiparidza achiti, “Mushure mangu muri kuuya ane simba kupinda ini. Ini handikodzeri kukotama ndichisunungura rukanda rweshangu dzake.

⁸Ini ndakuombekai nemvura asi iye achakuombekai naMweya Mutsvene.”

⁹Zvino pamazuva iwayo Jesu akauya achibva kuNazareti yokuGarirea akaombekwa naJohani muna Jorodhani.

¹⁰Achangoti budei mumvura, akaona matenga achizaruka naMweya achiburukira pamusoro pake senjiva.

¹¹Izwi rakabva kudenga richiti, “Iwe ndiwe Mwanakomana wangu wapamwoyo, anondifadza zvikuru.”

¹²Pakarepo Mweya akamuendesa kurenje.

¹³Akagara murenje mazuva makumi mana achiedzwa naSatani. Imomo aingova nemhuka dzomusango, asi vatumwa vakanga vachimushandira.

¹⁴Kuzoti Johani asungwa, Jesu akaenda Garirea kundoparidza Shoko Rakanaka raMwari

¹⁵achiti, “Nguva iya yazokwana zvino, umambo hwaMwari hwava pedyo. Chipindukai mutendhe Shoko Rakanaka.”

¹⁶Jesu akati achipfuura napagungwa reGarirea akaona Simoni naAndireya munun'una wake vachikanda usvasvi mugungwa nokuti vaiva vabvuvi vehove.

¹⁷Jesu akati kwavari, “Nditeverei, ndigokuitai kuti muve vabvuvi vavanhu.”

¹⁸Pakarepo vakasiya usvasvi hwavo, vakamutevera.

¹⁹Kuzoti angoti fambe — fambei zvishoma, akaona Jemusi mwanakomana waZebhedhi naJohani munun'una wake vari mugwa ravo vachigadzira usvasvi.

²⁰Pakarepo Jesu akavadaidza; ivo vakasiya baba vavo Zebhedhi navashandi vari mugwa, vakatevera Jesu.

²¹Zvino vakazosvika muKapenaumu. Zvarakanga ravaSabata, Jesu akapinda musinagogu akadzidzisamo.

²²Vanhu vakashamiswa kwazvo norudzidziso rwake nokuti aidzidzisa somunhu ane chiremera, kwete senyanzvi dzoMutemo.

²³Ipapo musinagogu mavo maiva nomunhu aiva nomweya wetsvina. Akazhamba

²⁴achiti, “Ko, tinei newe Jesu weNazareti? Wauya kuzotiparadza here? Ndinokuziva kuti ndiwe ani, ndiwe Mutsvene waMwari.”

²⁵Jesu akaukarira achiti, “Nyarara, buda maari!”

²⁶Mweya wetsvina uya wakamupfurupfutisa ndokuridza mhere uchibva wabuda maari.

²⁷Vanhu vose vakashamiswa kwazvo zvokuti vakabvunzana vachiti, “Ko, chiiko ichi? Chidzidziso chitsvasu! Anotaurira kunyange mweya yetsvina ichimuteera.”

²⁸Mukurumbira wake wakabva wapararira kwose kwose, munharaunda yose yeGarirea.

²⁹Zvino ivo pakarepo vakabva vabva pasinagogu vakandopinda mumba mavanaSimoni naAndireya vaina Jemusi naJohani.

³⁰Zvino vambhuya vaSimoni vakanga varere muviri wavo wakanga uchipinda chando. Vakabva vataurira Jesu nezvavo.

³¹Jesu akaenda akavabata ruoko ndokuvasimudza, denda ndokubva ravasiya, ivo ndokuvashandira.

³²Zvino kuzoti ava manheru, zuva ravira, vanhu vakauya kuna Jesu navose vakanga vachirwara kana vakanga vakagarwa nemweya yakaipa.

³³Guta rose rakaungana pamusuo.

³⁴Jesu akaporesa vazhinji vaiva namatenda akasiyana — siyana, achidzingawo mweya yakaipa mizhinji; akanga asingabvumiri mweya yakaipa iyoyo kuti itaure chinhu nokuti yakanga ichimuziva.

³⁵Mangwanani — ngwanani, kuchiri kutema, Jesu akamuka akabuda achienda kunzvimbo isina vanhu kwaakandonamata ikoko.

³⁶Simoni navamwe vaiva naye vakazotevera vachimutsvaka.

³⁷Kuzoti vamuwana, vakati kwaari, “Vanhu vose vari kukutsvakai.”

³⁸Ipapo Jesu akati kwavari, “Handeyi kumwe, kuna maguta ari pedyo ndigondoparidzawo ikoko, nokuti izvi ndizvo zvandakavinga.”

³⁹Nokudaro akafamba neGarirea yose achiparidza mumasinagogu avo, achidzingawo mweya yakaipa.

⁴⁰Kwakazouya kwaari munhu aiva namaperembudzi achimuteterera, akapfugama achiti, “Kana muchida henyu munogona kundiporesa nokundichenura.”

⁴¹Zvino Jesu akamunzwira tsitsi ndokutambanudza ruoko rwake kwaari omubata, ndokuti kwaari, “Ndinoda, chipora uchenurwe.”

⁴²Pakarepo maperembudzi ake akabva apera, akabva achenurwa.

⁴³Zvino Jesu akamutsindidza akamuendesa pakarepo

⁴⁴achiti kwaari, “Uone kuti usataurire kana ani zvake; asi enda undozviratidza kumupristi, upe chipo chokuchenurwa kwako sezvakatemwa naMosesi, kuti chive chapupu kuvanhu.”

⁴⁵Asi munhu uya paakangoti budei, akatangisa kuparidzira zvinhu pachena achimwaya kwose kwose nyaya iya zvokuti Jesu haana kuzokwanisa kupinda zviri pachena muguta ripi zvaro. Akatenge ogara kunzvimbo dzisina vanhu, asi vanhu vakauya kwaari vachibva kumativi ose.