Read Bhaibhiri Idzva rechiShona Mariko 15 Bible Online

Mariko 15 - Bhaibhiri Idzva rechiShona bible

Mariko 15

¹Kuzoti kwangoedza, vapristi vakuru vakagara dare navakuru vakuru vavaJudha nenyanzvi dzoMutemo neDare guru rose. Vakasunga Jesu, ndokuenda naye kundomuturira kuna Pirato.

²Pirato akamubvunza achiti, “Ndiwe Mambo wavaJudha here?” Iye akapindura achiti, “Inga matozvireva wani.”

³Vapristi vakuru vakamupomera mhosva zhinji.

⁴Pirato akamubvunzazve achiti, “Ko hauna chaunopindura here? Inzwa kuti vanokupomera mhosva dzakawanda sei?”

⁵Asi Jesu haanazve chaakapindura kwete, zvokuti Pirato akashamiswa.

⁶Nguva dzose, pamazuva makuru aya, Pirato aivasunungurira musungwa mumwechete wavainge vakumbira.

⁷Mukati mavapanduki vaiva mujeri, vakanga vauraya munhu muchimurenga, maiva nomumwe murume ainzi Bharabhasi.

⁸Kuzoti mhomho yavanhu yakwira kwaPirato, yakatanga kumukumbira kuti avaitire zvaaisimbovaitira.

⁹Zvino Pirato akavabvunza achiti, “Ko munoda kuti ndikusunungurirei mambo wavaJudha here?”

¹⁰Nokuti akanga azviona kuti vapristi vakuru vakanga vaturira Jesu kwaari pamusana peshanje.

¹¹Asi vapristi vakuru vakapesvera vanhu kuti avasunungurire zvavo Bharabhasi.

¹²Pirato akapindurazve achiti, “Ko ndoitei nowamunoti mambo wavaJudha?”

¹³Vakadaidzirazve vachiti, “Muroverei pamuchinjikwa.”

¹⁴Pirato ndokuti kwavari, “Nemhaka yeiko? Akapara mhosva yei?” Vakabva vatonyanya kudaidzira vachiti, “Muroverei pamuchinjikwa.”

¹⁵Zvino Pirato zvaaida kufadza mhomho yavanhu akavasunungurira Bharabhasi. Asi mushure mokurova Jesu akamuturira kwavari kuti aroverwe pamuchinjikwa.

¹⁶Masoja akaenda naJesu munhandare, mumuzinda womutongi wacho wainzi (Pretoriumu,) vakaunganidza boka rose ramasoja.

¹⁷Vakazomupfekedza hanzu yoruvara rwohute[16] ndokuruka chiremba cheminzwa vakachidzika paari.

¹⁸Vakazotanga kumukwazisa vachiti, “Kwaziwaika mambo wavaJudha!”

¹⁹Vaimurova musoro norutsanga, vachimupfira mate nokumupfugamira vachimukudza.

²⁰Pavakapedza kumuita chiseko, vakamubvisa hanzu yoruvara rwohute iya vomupfekedza hanzu dzake ndokuenda naye kundomurovera pamuchinjikwa.

²¹Vakamanikidza mumwe murume aipfuura naipapo achibva kumaruwa, ainzi Simoni wokuSairini, baba vaArekizanda naRufusi, kuti atakure muchinjikwa wake.

²²Vakasvika naJesu kunzvimbo inonzi Gorogota, zvinoreva kuti nzvimbo yeDehenya,

²³vakamupa waini yakasanganiswa nemura asi akaramba kuinwa.

²⁴Vakamurovera pamuchinjikwa vakagoverana hanzu dzake vachiita chin'ange kuti vaone kuti mumwe nomumwe wavo achatorei.

²⁵Yakanga iri awa yechipfumbamwe yamangwanani pavakamurovera pamuchinjikwa.

²⁶Chikwangwani chechiga chemhosva yaakapomerwa chaiti, “MAMBO WAVAJUDHA.”

²⁷Pakanga pakaroverwa pamwepo naye makororo maviri, akati rimwe kurudyi rimwe kuruboshwe rwake.[17]

²⁸

²⁹Vanhu vaipfuura nepo vakamuseka vachidzungudza musoro vachiti, “Aha ndiweka unopaza Temberi uchiivakazve namazuva matatu,

³⁰chizviponesaka, uburuke pamuchinjikwa ipapo!”

³¹Saizvozvowo vapristi vakuru nenyanzvi dzoMutemo vakamusveeredza vachitaurirana vachiti, “Akaponesa vamwe asi haagoni kuzviponesa iye pachake.

³²Kristu! Mambo wavaIsiraeri! Ngaaburuke iye zvino pamuchinjikwa kuti tione tigotenda.” Navaya vakanga vakaroverwa pamuchinjikwa pamwe naye vakamunyombawo.

³³Zvino paawa yegumi nechimbiri yamasikati nyika yose yakati rima tiba kusvikira paawa yechitatu yamasikati.

³⁴Neawa yechitatu yamasikati Jesu akadaidzira nezwi guru achiti, “Eroi, Eroi, rama sabhakitani?” Zvinoreva kuti, “Mwari wangu, Mwari wangu, mandisiyireiko?”

³⁵Zvino vamwe vakanga vamirepo vachizvinzwa vakati, “Inzwai, ari kudaidza Eriya.”

³⁶Ipapo mumwe akamhanya akanyika chifovefove muwaini inovava dzamara chazara ndokuchitungirira parutsanga ndokumupa kuti anwe vachiti, “Mirai tione kana Eriya achiuya kuzomuburutsa.”

³⁷Ipapo Jesu akadaidzira nezwi guru ndokubva afa.

³⁸Zvino jira rokudzikatirisa romuTemberi rakabvaruka napakati kubvira kumusoro kusvikira pasi.

³⁹Kuzoti mutungamiri wezana akanga amirepo akatarisana naye aona kufa kwaakaita akati, “Zvechokwadi munhu uyu anga ari Mwanakomana waMwari.”

⁴⁰Pakangawo paina madzimai akanga akatarira ari chinhambwe. Vamwe vaiva mukati mavo ndavana Maria Magadharena, naMaria amai vaJemusi muduku naJosesi, naSarome,

⁴¹vaimutevera achiri kuGarirea, vachimushandira, namamwe madzimai mazhinji akanga akwira naye kuJerusaremu.

⁴²Zvino kuzoti ava manheru, zvarakanga riri zuva rokugadzirira, ndiko kuti zuva rapamberi peSabata,

⁴³kwakauya Josefi weArimatia, aiva mumwe wamakurukota airemekedzwa. Iyewo pachake aimirira umambo hwaMwari. Akatsunga mwoyo ndokuenda kuna Pirato, akamukumbira chitunha chaJesu.

⁴⁴Pirato akashamiswa kuti atofa kare. Akadana mutungamiri wezana akamubvunza kuti afa here kare?

⁴⁵Paakazvinzwa, zvichibva kumutungamiri wezana kuti Jesu afa, akabvumira Josefi kutora chitunha.

⁴⁶Josefi akatenga fuko rerineni, akaturunura Jesu omuputira nefuko riya rerineni ndokumuradzika muguva rakanga rakacherwa mudombo. Akazokungurutsirawo dombo pamusuo weguva.

⁴⁷Zvino vana Maria Magadharena, naMaria amai vaJosesi vakanyatsoona paakaradzikwa.