Read Bhaibhiri Idzva rechiShona Mariko 16 Bible Online

Mariko 16 - Bhaibhiri Idzva rechiShona bible

Mariko 16

¹Kuzoti Sabata rapfuura, vanaMaria Magadharena naMaria amai vaJemusi naSarome vakatenga mafuta anonhuwira kuti vandomuzora nawo.

²Mangwanani — ngwanani omusi weSvondo vakafumoenda kuguva zuva rabuda.

³Vaibvunzana vachiti, “Ko ndiani achandotikungurutsira dombo riya pamusuo weguva?”

⁴Zvino vakatarira vakaona kuti dombo riya rakanga ratokungurutswa; rakanga riri guru kwazvo.

⁵Pavakapinda muguva vakaona Jaya rigere nechokurudyi, rakapfeka gemenzi jena, vakabva vavhunduka kwazvo.

⁶Jaya ndokuvati, “Regai kuvhunduka, muri kutsvaka Jesu weNazareti akarovererwa pamuchinjikwa. Amuka, haasisimo muno. Tarisai muone nzvimbo yavakamuradzika.

⁷Chiendai mundoudza vadzidzi vake naPita kuti Jesu anofanokutungamirirai kuGarirea; ikoko ndiko kwamuchandomuona sezvaakambokutaurirai.”

⁸Vakabuda ndokutiza paguva paya nokuti vakanga vava kudedera uye vakashamiswa kwazvo. Hapana wavakaudza chinhu, nokuti vakanga vava kutya.

⁹Kuzoti amuka muvafi mangwanani nomusi weSvondo akazviratidza pokutanga kuna Maria Magadharena, uya waakabvisa mweya yakaipa minomwe.

¹⁰Maria akaenda kundoudza vaya vaiva naye, vakanga vari mukuchema nokuungudza

¹¹Asi pavakanzwa kuti Jesu mupenyu uye kuti aonekwa naye havana kutenda.

¹²Shure kwaizvozvo Jesu akazviratidza neimwe nzira kuna vaviri vachifamba kuenda kumaruwa.

¹³Naivavawo vakadzokera vakandoudza vamwe vose asi kunyange ivava havana kuvatenda.

¹⁴Pashure Jesu akazviratidza kuna vane gumi nomumwechete vari pakudya. Akavashora pamusana pokusatenda kwavo napamusana poukukutu hwomoyo yavo nokuti havana kutenda vakanga vamuona mushure mokumuka kwake.

¹⁵Akati kwavari, “Endai kunyika dzapasi pose mundoparidza Shoko Rakanaka kuzvisikwa zvose.

¹⁶Anenge atenda akaombekwa achaponeswa, asi uyo asingatendi achapiwa mhosva.

¹⁷Hezvino zviratidzo zvichava navanotenda:

¹⁸Vachadzinga mweya yakaipa nezita rangu. Vachataura nendimi itsva, vachabata nyoka namaoko. Kunyange vakanwa chinouraya hachizovakuvadzi kwete. Vachaisa maoko pavarwere, vachibva vapora.”

¹⁹Kuzoti Jesu apedza kutaura kwavari akakwidzwa kudenga kwaakandogara kurudyi rwaMwari.

²⁰Ivo vakaenda vakandoparidza kwose kwose, Tenzi achivabatsira achitsinhira shoko ravo nezviratidzo zvairisimbisa. Ameni.