Read Bhaibhiri Idzva rechiShona Mariko 3 Bible Online

Mariko 3 - Bhaibhiri Idzva rechiShona bible

Mariko 3

¹Zvino Jesu akapindazve musinagogu; imomo maiva nomunhu aiva noruoko rwakakokonyara.

²Vaivamo vakamutarisisa vachida kuona kuti achamuporesa here nomusi weSabata kuti vamupe mhosva.

³Ipapo Jesu akati kumunhu woruoko rwakakokonyara, “Simuka, umire apa,”

⁴ndokuvati, “Ko, zvinobvumirwa here nomusi weSabata kuita zvakanaka kana kuita zvakaipa; kuponesa munhu kana kuuraya?” Ivo vakati zi — i kunyarara.

⁵Zvino iye akaringa — ringa achivatarisa nehasha, achisiririswa nokuomarara mwoyo kwavo, ndokuti kumunhu uya, “Tambanudza ruoko rwako.” Iye ndokutambanudza, ruoko rwake rukabva rwatwasanuka.

⁶VaFarisei vakabudamo kundomurangana pakarepo neveboka rokwaHerodhi kuti vangamuuraye sei.

⁷Jesu akabvapo navadzidzi vake oenda kugungwa; chitawo chikuru chavanhu vaibva kuGarirea chakatevera uyewo vanhu vakauya kwaari vachibva kuJudhea

⁸neJerusaremu, neIdhumia; nokumhiri kwaJorodhani nokunharaunda yeTire neyeSidhoni, chita chikuru chavanhu vakanga vanzwa zvose zvaaiita.

⁹Jesu akaudza vadzidzi vake kuti vafanomugadzirira igwa duku kuti arege kuzomanikwa nouzhinji hwavanhu.

¹⁰Sezvo akanga aporesa vazhinji, vose vakanga vaine zvirwere vaitsikinyidzana vachida kumubata.

¹¹Uye mweya yakaipa payaingomuona yaizviwisira pasi pamberi pake ichidaidzira ichiti, “Iwe, uri Mwanakomana waMwari.”

¹²Asi Jesu aiikohomedza kuti irege kuzivisa vanhu kuti iye ndiani.

¹³Zvino Jesu akakwira mugomo ndokudaidza vaaida, ivo ndokuenda kwaari.

¹⁴Akasarudza gumi navaviri kuti vagochigara naye achivatuma kundoparidza,

¹⁵uyezve kuti vave nesimba rokudzinga mweya yakaipa.

¹⁶Vaiti, Simoni, waakapa rimwe zita rokuti Pita,

¹⁷kwouya Jemusi mwana waZebhedhi naJohani munun'una waJemusi vaakapa zita rokuti Bhoanerigesi, zvinoreva kuti vanaKutinhirasemheni

¹⁸kwozoti Andireya, naFiripi, kwouyawo Bhatoromeo, naMateu, kwozoti Tomasi, naJemusi, mwana waArifeo, uyewo Tadheusi naSimoni muKananai Nyashungu,[1]

¹⁹uyewo ndokuzoti Judhasi Isikarioti uya akazomupandukira.

²⁰Jesu akaenda kumba; gurumwandira ravanhu ndokubva ramuunganirazve, zvokuti vakatadza kana kudya chaiko.

²¹Zvino hama dzake padzakazvinzwa, dzakauya kuzomutora nokuti zvainzi, “Wava kupenga.”

²²Uyezve nyanzvi dzoMutemo dzakabva Jerusaremu dzaiti, “Akagarwa naBheerizebhuri, uye kuti anodzinga mweya yakaipa nesimba rejinda remweya yakaipa.”

²³Ipapo Jesu akadaidza vanhu ndokutaura kwavari nemienzaniso, achiti, “Nhaimi, Satani angadzinge Satani seiko?

²⁴Kana umambo hwavakuzvirwisa, umambo ihwohwo haungagoni kumira.

²⁵Kana vemba imwechete vorwisana pachavo, imba iyoyo haigoni kumira.

²⁶Zvino kana iye Satani ava kuzvirwisa, haangagoni kumira, asi kuti avakutoenda kumagumo ake.

²⁷Hakuna munhu angapinde mumba merume rine simba kuti aripambe zvinhu zvaro kusatoti atanga arisunga ndokuzopamba zvemba yaro.

²⁸“Zvirokwazvo ndinoti kwamuri, zvitadzo zvose nokushonha Mwari kwose kunoregererwa vanhu.

²⁹Asi ani naani anoshonha Mweya Mutsvene haachazomboregererwa chitadzo chake; achava nemhosva yechitadzo chinoramba chiripo narini wose.”

³⁰Akadaro nokuti vakati, “Ane mweya wakaipa.”

³¹Zvino amai vake uye vakoma navanun'una vake[2] vakauya vakamira panze ndokutumira munhu kundomudaidza.

³²Vanhu vazhinji vakanga vagere pasi vakamukomberedza, vakati kwaari, “Amai venyu uye vakoma navanun'una venyu vari panze vari kukudai.”

³³Iye akavapindura achiti, “Ko, amai vangu navakoma navanun'una vangu ndavanaani?”

³⁴Ndokuringa — ringa vaya vakanga vagere vakamukomberedza, ndokuti, “Ava ndivo amai vangu navakoma navanun'una vangu.

³⁵Ani naani anoita kuda kwaMwari ndiye mukoma nomunun'una neni, ndiye hanzvadzi naamai vangu.”