Read Bhaibhiri Idzva rechiShona Ruka 1 Bible Online

Ruka 1 - Bhaibhiri Idzva rechiShona bible

Ruka 1

¹Sezvo vazhinji vakaita basa rokunyora rondedzero yezvinhu zvakaitika pakati pedu,

²sokuzvigamuchidzwa kwatakaitwa navaya vakanga vazviona nemeso kubvira pakutanga kwazvo, uyezve vari vaparidzi veshoko,

³neniwo, mushure mokunyatsotsvagisisa zvinhu zvose nemazvo, kubvira kumavambo azvo, ndakazviona chiri chinhu chakanaka kuti, ndikunyorerei rondedzero yazvo yakakwana, imi vaTeofiro vanoremekedzwa,

⁴kuti munyatsoziva idi rezvinhu zvamakadzidziswa.

⁵Pamazuva aHerodhi, mambo weJudhea, kwaiva nomumwe mupristi ainzi Zakariya wegovero raAbhiya. Aiva nomudzimai akanga ari wedzinza raAroni, zita rake ainzi Erizabheti.

⁶Vakanga vakarurama pamberi paMwari vose vari vaviri, vasina chinoshoreka pakutevedza zviri pamitemo nepamirao yaTenzi.

⁷Asi vakanga vasina mwana nokuti Erizabheti akanga ari mhanje, uyezve, vose vari vaviri vakanga vachembera.

⁸Zvino Zakariya zvaakanga achiri kuita basa roupristi pamberi paMwari,

⁹janha regovero rovokwake, samaitiro avapristi, ndivo vakabatwa nomujenya wokuti vapinde munzvimbo Inoera yeTemberi kundopisa rusenzi.

¹⁰Gurumwandira ravanhu rakanga richinamata kunze panguva yokupisira rusenzi.

¹¹Pakarepo mutumwa waTenzi akazviratidza kwaari akamira nechokurudyi rweatari yorusenzi.

¹²Zakariya zvaakamuona akavhunduka, akabatwa nokutya.

¹³Asi mutumwa waTenzi akati kwaari, “Rega zvako kutya, Zakariya, nokuti munamato wako wakanzwika. Mudzimai wako, Erizabheti achakuberekera mwana mukomana wauchatumidza zita rokuti Johani.

¹⁴“Iwe uchazofara nokupembera, vazhinji vachazofarirawo kuberekwa kwake,

¹⁵nokuti achava mukuru pamberi paTenzi; haachazonwi waini kana doro rinodhaka, achazadzwa naMweya Mutsvene kubvira achiri munhumbu maamai vake.

¹⁶Achazodzorera vazhinji vavaIsiraeri kuna Tenzi Mwari wavo.

¹⁷Achafamba pamberi paTenzi aina mweya nesimba raEriya kuti awadzanise madzibaba navana vavo; nokudzorera vasingateereri kuhungwaru hwavakarurama, kuti nhadzirire Tenzi vanhu vakamugadzirira.”

¹⁸Zakariya akati kumutumwa, “Ndingazive seiko zvinhu izvi? Ini ndakwegura uye mudzimai wangu achembera?”

¹⁹Mutumwa akamuti, “Ndini Gabhurieri, ndinomira pamberi paMwari, ndatumwa naTenzi kuti nditaure newe nokukuparidza shoko iri rakanaka.

²⁰“Chinzwa, uchava chimumumu, usingagoni kutaura kusvikira musi wazvichaitika, nokuti hauna kutenda zvandakuudza, izvo zvichazoitika nenguva yazvo.”

²¹Izvozvo vanhu vakanga vakangomirira Zakariya, votoshamiswa kwazvo kuti chii chamunonotsa kudai muTemberi.

²²Zvino akati abuda, haana kugona kutaura kwavari. Vanhu ndokubva vaziva kuti aona chiratidzo muTemberi. Akatoita zvokuvaninira maoko, ndokuramba angove chimumumu.

²³Kuzoti mazuva ebasa rake apera, akadzokera kumusha kwake.

²⁴Shure kwaizvozvi, mudzimai wake Erizabheti akava napamuviri akazvivanza kwemwedzi mishanu, achiti,

²⁵“Ndozvandakaitirwawo naTenzi pamazuva aakandiringa kuti andibvise nyadzi pamberi pavanhu.”

²⁶Nomwedzi wechitanhatu, Mwari akatuma mutumwa Gabhurieri kuguta reGarirea rinonzi Nazareti,

²⁷kumhandara yakanga ichangoroorwa nomurume ainzi Josefi, wemba yaDhavhidhi; zita remhandara iyi rainzi Maria.

²⁸Mutumwa akauya kwaari akati, “Kwaziwa iwe wakakomborerwa, Tenzi anewe.”

²⁹Zvakamukangaidza zvikuru kunzwa zvakadai, akashamiswa nazvo kuti kwaziso iyi inoreveyi.

³⁰Mutumwa waMwari ndokupindura oti, “Usatye zvako Maria, nokuti Mwari afadzwa zvake newe.

³¹Chinzwa, uchava napamuviri pauchapona mwana mukomana wauchatumidza zita rokuti Jesu.

³²Iye achava mukuru — mukuru uye achanzi Mwanakomana woWokumusorosoro. Tenzi Mwari achamupa chigaro choumambo chababa vake Dhavhidhi.

³³Achatongawo imba yaJakobho narini narini.” Uyezve umambo hwake hauchazogumi.

³⁴Maria akati kumutumwa, “Izvi zvichazoitika sei zvandisingazivani nomurume?”

³⁵Mutumwa ndokumupindura achiti, “Mweya Mutsvene achakuburukira, simba roWokumusorosoro richakufukidza. Naizvozvo mwana wauchapona achanzi mutsvene, Mwanakomana waMwari.

³⁶Chiona kuti kana hama yakowo Erizabheti, kunyange zvake achembera atova napamuviri pomwana mukomana; mwedzi uno watove mwedzi wechitanhatu kune munhu wainzi imhanje.

³⁷Nokuti pana Mwari hapana chisingagonekwi.”

³⁸Maria akati, “Onai ndiri murandakadzi waTenzi, ngazviitwe kuneni sokureva kwenyu.” Mutumwa ndokubva omusia oenda zvake.

³⁹Namazuva iwayo Maria akasimuka, akakurumidza kuenda kunyika yamakomo, kune rimwe guta rokwaJudha.

⁴⁰Akapinda mumba maZakariya, akakwazisa Erizabheti. Erizabheti, paakanzwa kukwazisa kwaMaria, mwana akabva akwakuka mudumbu make.

⁴¹Erizabheti akabva azadzwa naMweya Mutsvene,

⁴²ndokutaura nezwi riri pamusoro achiti, “Makakomborerwa pana vakadzi vose, akakomborerwawo mwana wemimba yenyu.

⁴³Ko, zvandibvira nepikowo kuti ndishanyirwe kudai naAmai vaTenzi wangu.

⁴⁴Chionaika kuti pandangonzwa izwi rokundikwazisa kwenyu, mwana abva akwakuka norufaro rukuru mudumbu mangu.

⁴⁵“Makakomborerwa zvenyu, nokuti makatenda kuti zvakataurwa kwamuri, zvichibva kuna Tenzi, zvichazoitika.”

⁴⁶Maria ndokubva atiwo;

⁴⁷“Ini ndinokurumbidzai, Tenzi, nemwoyo wangu wose, mweya wanguwo unopembera norufaro Mwari Muponesi wangu.

⁴⁸Nokuti akarangarira iniwo zvangu murandanhando wake. Chionai kuti kubvira zvino, zvizvarwa zvose zvavanhu zvichanditi; ‘Wakakomborerwa,’

⁴⁹nokuti iye Samasimba akandiitira zvinhu zvikuru, zita rake rinoera.

⁵⁰Anonzwira tsitsi vanomutya, kubvira kuchizvarwa nechizvarwa.

⁵¹Akaita zvina masimba noruoko rwake, akaparadza vanozvikudza mundangariro dzemwoyo yavo.

⁵²Akabvisa vatongi pazvigaro zvavo zvoushe, achisimudzira pamusoro vakazvirereka.

⁵³Vane nzara akavagutsa nezvinhu zvakanaka, vapfumi akavaendesa vasina chavanacho.

⁵⁴Akarangarira tsitsi dzake akabatsira Isiraeri muranda wake.

⁵⁵Sokutaura kwaakamboita kumadzitateguru edu, kuna Abhurahamu nezvizvarwa zvake, nokusingaperi.”

⁵⁶Maria akazogara naErizabheti kwemwedzi inenge mitatu, ndokuzodzokera hake kumusha kwake.

⁵⁷Zvino mazuva okuti Erizabheti asununguke zvaakakwana, akapona mwana mukomana.

⁵⁸Kuzoti vavakidzani vake nehama dzake vanzwa kuti Tenzi akamuitira tsitsi dzakawanda kudai, vakafara kwazvo pamwechete naye.

⁵⁹Nezuva rorusere vakauya kuzodzingisa mwana. Vakanga vachida kumutumidza zita rababa vake rokuti Zakariya,

⁶⁰asi amai vake vakati, “Kwete, ngaanzi Johani.”

⁶¹Vanhu vakati kuna amai vake, “Hakuna mumwe wehama dzenyu anodaidzwa nezita iri.”

⁶²Ipapo vakaninira baba vake vachida kuziva kuti vangade kuti anzi ani.

⁶³Iye akakumbira chinyorero, akanyora kuti, “Zita rake ndiJohani.” Vose vakashamiswa zvikuru.

⁶⁴Pakarepo muromo Zakariya wakabva wazaruka, rurimi rwake rukabva rwasununguka, ndokubva avakutotaura achirumbidza Mwari.

⁶⁵Pakave nokutya mukati mavavakidzani vavo, nyaya dzezvinhu izvi dzakafamba kwose kwose munyika yamakomo yeJudhea.

⁶⁶Vose vakazvinzwa vakazvipfundira mumwoyo yavo vachiti, “Ko, mwana uyu achazova munhu akaita sei chaizvo?” Nokuti ruoko rwaTenzi rwakanga rwuri paari.

⁶⁷Zvino baba vake Zakariya, vakazadzwa naMweya Mutsvene vakaporofita vachiti,

⁶⁸“Ngaarumbidzwe Tenzi Mwari wavaIsiraeri, nokuti akashanyira vanhu vake, akavanunura;

⁶⁹akatimutsira Muponesi[1] ane simba mumba maDhavhidhi muranda wake,

⁷⁰sokutaura kwaakaita nemiromo yavaporofita vake vatsvene vakare,

⁷¹kuti atinunure kumhandu dzedu, nomumaoko avose vanotivenga,

⁷²kuri kuratidza tsitsi sokutsidza kwaakamboita kumadzitateguru edu, nokuyeukawo Chitenderano chake chitsvene,

⁷³nechitsidzo chaakaita kuna baba vedu Abhurahamu,

⁷⁴chokuti kana tanunurwa mumaoko emhandu dzedu, timushandire tisingatyi,

⁷⁵tichiita mabasa edu tiri vatsvene vakarurama pamberi pake mazuva edu ose.

⁷⁶“Iwe mwana, uchanzi muporofita woWokumusorosoro, nokuti uchafanoenda mberi kwaTenzi kundomugadzirira nzira dzake,

⁷⁷kupa vanhu vake ruzivo rworuponeso ruri mukuregererwa kwezvitadzo zvavo,

⁷⁸pamusana petsiye nyoro dzaMwari wedu, apo tichabudirwa neZuva richibva kumusoro,

⁷⁹kuzovhenekera vagere murima nomumumvuri worufu, nokutungamirira tsoka dzedu munzira yorugare.”

⁸⁰Mwana akazokura akasimba mumweya. Aigara murenje kusvikira zuva raakazviratidza kuvaIsiraeri.