Read Bhaibhiri Idzva rechiShona Ruka 2 Bible Online

Ruka 2 - Bhaibhiri Idzva rechiShona bible

Ruka 2

¹Namazuva iwayo kwakatemwa chirevo chakabva kuna Siza Agusuto, chokuti vanhu vapasi pose vanyorwe mazita avo.

²Uku ndiko kwaiva kunyorwa kwamazita kwokutanga kwakaitwa Kwiriniosi ari mutongi weSiria.

³Vanhu vose vakaenda kundonyorwa mumwe nomumwe kuguta rokwake.

⁴Zvino Josefi akabvawo Garirea muguta reNazareti achikwira kuJudhea kuguta raDhavhidhi rinonzi Bheterehemu, nokuti aiva wemba nowedzinza raDhavhidhi.

⁵Akaenda kundonyorwa iye naMaria waakanga achangobva mukuroora, akangawo ava napamuviri.

⁶Vachiri ikoko, mazuva ake okuti asununguke akakwana.

⁷Akasununguka dangwe rake, romwana mukomana waakaputira namachira ndokumuradzika muchidyiro chezvipfuwo, nokuti vakanga vashaya nzvimbo muimba yavaeni.

⁸Mudunhu iroro makanga muina vafudzi kumafuro vairindira zvipfuwo zvavo usiku.

⁹Zvino mutumwa waTenzi akazviratidza kwavari. Kupenya kwaTenzi kukavakomberedza vakabva vabatwa nokutya kukuru.

¹⁰Asi mutumwa akati kwavari, “Regai henyu kutya nokuti ndakuunzirai shoko rakanaka rorufaro rukuru ruchava rwavanhu vose.

¹¹Nokuti nhasi uno, muguta raDhavhidhi, mazvarirwa Muponesi, ndiye Kristu Tenzi.

¹²Chiratidzo chamuchamuziva nacho ndechichi chokuti muchandowana mucheche akaputirwa namachira akaradzikwa muchidyiro chezvipfuwo.”

¹³Pakarepo boka guru rehondo yedenga rakamira pamwe nomutumwa vachirumbidza Mwari vachiti,

¹⁴“Mbiri kuna Mwari kumusorosoro, pasi pano rugare ruve kuvanhu vaanofarira.”

¹⁵Kuzoti vatumwa vaye vabva pavari, vachienda kudenga, vafudzi vakataurirana vachiti, “Handei kuBheterehemu tindoona zvaitika izvi zvataziviswa naTenzi.”

¹⁶Vakaenda vachikurumidza vakasvikowana Maria naJosefi, uyezve mucheche arere muchidyiro chezvipfuwo.

¹⁷Kuzoti vafudzi vaona mwana vakatanga kurondedzera zvavakanga vataurirwa nezvemwana uyu.

¹⁸Vose vakanzwa izvi vakashamiswa kwazvo nezvavakataurirwa navafudzi.

¹⁹Asi Maria akapfundira zvinhu zvose izvi mumwoyo make achinyatsozvifungisisa.

²⁰Vafudzi vakadzokera vachikudza nokurumbidza Mwari pamusoro pazvose zvavakanga vanzwa nezvavakaona sokuudzwa kwavakaitwa.

²¹Mushure memazuva masere, pakadzingiswa mwana, akatumidzwa zita rokuti Jesu, ndiro zita riya raakapiwa nomutumwa, amai vake vasati vava napamuviri pake.

²²Kuzoti nguva yokuchenurwa kwavo yakwana, vakakwira nomwana kuJerusaremu kundomusuma kuna Tenzi sezvaidikanwa nomutemo waMosesi.

²³Sezvazvakanyorwa muMutemo waTenzi kuti, “Dangwe rose rechikomana rinotanga kubuda mudumbu raamai varo richanzi rakaturirwa Tenzi.”

²⁴Vakaendawo kundopira mupiro wechibayiro chenjiva mbiri kana hangaiwa mbiri diki sokurehwa kwazvakaitwa nomutemo waTenzi.

²⁵Zvino muJerusaremu maiva nomumwe murume ainzi Simeoni. Akanga ari munhu akarurama anotya Mwari, uye akanga achitarisira kunyaradzwa kweIsiraeri. Mweya Mutsvene akanga ari paari.

²⁶Munhu iyeyu akanga aziviswa naMweya Mutsvene, kuti haazofi asati aona Mesia waTenzi.

²⁷Afemerwa naMweya, akapinda muTemberi. Vabereki zvavakauisa mwana Jesu kuzomuitira zviya zvaigaroitwa zviri muMutemo

²⁸akatora mwana akamubata mumaoko, akarumbidza Mwari achiti;

²⁹“Tenzi mungachirega muranda wenyu zvino achienda norugare, sokureva kwenyu,

³⁰nokuti meso angu aona ruponeso rwenyu,

³¹rwamakagadzirira kuti ruonekwe nendudzi dzose dzavanhu.

³²Mwenje wokuvhenekera vechirudzi nomukurumbira wavanhu venyu vaIsiraeri.”

³³Baba vake naamai vake vakashamiswa vachinzwa zvakataurwa nezvake.

³⁴Zvino Simeoni akavakomborera ndokuti kuna Maria amai vake, “Chinzwai, mwana uyu akasarudzirwa kuputsika nokumuka kwavazhinji muIsiraeri nokuvazve chiratidzo chichapikiswa.”

³⁵Chichaita kuti pfungwa dziri mumwoyo yavazhinji dzizivikanwe. Nemiwo mwoyo wenyu uchabaiwa nebakatwa.

³⁶Kwaivawo nomumwe muporofitakadzi ainzi Ana, mwanasikana waFanuero, wedzinza raAsheri. Iye akanga atokwegura. Akangogara nomurume wake kwamakore manomwe chete kubvira umhandara hwake,

³⁷ndokuzogara sechirikadzi kusvikira ava namakore makumi masere ana mana. Haaisiyana neTemberi, maaishandira Mwari siku nesikati, nokutsanya nokunamata.

³⁸Akauyawo nenguva yakareyo akatenda Mwari ndokutaura nezvomwana uyu kuna vose vaimirira kununurwa kweJerusaremu.

³⁹Zvino kuzoti vapedza kuita zvose zvaidiwa noMutemo waTenzi vakadzokera Garirea kuguta ravo reNazareti.

⁴⁰Mwana uyu akakura akasimba, akazara noungwaru, nechikomborero chaMwari chaive chiri paari.

⁴¹Gore negore vabereki vake vaienda kuJerusaremu kumazuva makuru ePasika.

⁴²Kuzoti Jesu ava namakore gumi namaviri, vakakwirako samaitiro avo.

⁴³Zvino kuzoti mazuva makuru ePasika apera, vodzokera kumusha, mukomana Jesu akasara kuJerusaremu. Vabereki vake havana kuzviziva.

⁴⁴Vakafamba rwendo rwomuswere wezuva vachifunga kuti ari mukati mavamwe vavaifamba navo. Vakazomutsvaga mukati mehama neshamwari dzavo.

⁴⁵Zvavakamushaya vakadzokera Jerusaremu vachimutsvaka.

⁴⁶Nezuva rechitatu vakazomuwana ari muTemberi agere pakati pavadzidzisi achiteerera zvavaitaura achivabvunzawo mibvunzo.

⁴⁷Vose vakamunzwa vakashamiswa nokunzwisisa kwake nemhinduro dzake.

⁴⁸Vabereki vake, pavakamuona vakashamiswa kwazvo. Ipapo amai vake vakati, “Nhai mwanangu, wakaitireiko zvinhu zvakadai kwatiri? Tarisa uone Baba vako neni takatambudzika kwazvo tichikutsvaka.”

⁴⁹Iye akavapindura achiti, “Chakaita kuti munditsvake kumwe kwese chii? Makanga musingazive here kuti ndinofanira kuva muimba yaBaba vangu?”

⁵⁰Asi ivo havana kunzwisisa zvaakavataurira.

⁵¹Akadzika navo akasvika kuNazareti, kwaakagara navo achivateerera. Amai vake vakapfundira zvinhu zvose izvi mumwoyo mavo.

⁵²Zvino Jesu akakura muungwaru, nomumhu wake, nomukudiwa naMwari navanhu.