Read Bhaibhiri Idzva rechiShona Ruka 20 Bible Online

Ruka 20 - Bhaibhiri Idzva rechiShona bible

Ruka 20

¹Nerimwe zuva Jesu paaidzidzisa vanhu muTemberi achiparidza Shoko Rakanaka, vapristi vakuru nenyanzvi dzomutemo navakuru vakuru, vakauya vakati kwaari,

²“Tiudze kuti unoita zvinhu izvi nesimba raani kana kuti ndiani akakupa simba irori?”

³Akavapindura achiti, “Kana neniwo ndinoda kukubvunzai mubvunzo.

⁴Nditaurirei, ruombeko rwaJohani rwaibva kudenga here kana kuvanhu?”

⁵Vakambokurukurirana pachavo vachiti, “Kana tikati rwakabva kudenga iye achati ko makaregererei kutenda kwaari.

⁶Kana tikati runobva kuvanhu, vanhu vose vachatitaka namabwe nokuti vanobvuma kuti Johani aiva muporofita.”

⁷Ipapo vakapindura vachiti, “Hatizivi kuti rwaibva kupi.”

⁸Jesu akati kwavari, “Kana neniwo handikutaurirei kuti ndinoita izvi nesimba raani.”

⁹Akatanga kutaurira vanhu muenzaniso uyu achiti, “Mumwe munhu akarima munda wamagirepisi akaupa kuna vamwe vanhu vokuushandisa vachimubhadhara ndokuenda kune imwe nyika kwenguva ndefu.

¹⁰Nguva payakasvika, akatuma muranda kuna vaya vaishandisa munda wake kuti vamupewo mimwe michero womunda wamagirepisi, asi vaishandisa munda vaya vakamurova vakamuendesa asina chaanacho.

¹¹Akatumira mumwe muranda; naiyewo vakamurova vakamuitira zvinonyadzisa uye vakamuendesa asina chaanacho.

¹²Akatumirazve wechitatu. Uyu vakamukuvadza vakamukanda kunze.

¹³Muridzi womunda akati, ‘Ndoita sei? Ndichatumira mwanakomana wangu wapamwoyo zvimwe vangamuremekedze.’

¹⁴Asi vaya vaishandisa munda pavakamuona vakataurirana pachavo vachiti, ‘Uyu ndiye mugari wenhaka; uyai timuuraye kuti nhaka ive yedu.’

¹⁵Vakamukanda kunze kwomunda wamagirepisi vakamuuraya. Muridzi womunda achaitei kwavari?

¹⁶Achauya agoparadza vaya vokushandisa munda vaya achizopa munda wamagirepisi uya kuna vamwe.” Pavakanzwa izvi vakati, “Hazvidi kudaro.”

¹⁷Jesu akavatarisa akati, “Ko izvi zvakanyorwa zvinorevei zvinoti, “ ‘Dombo rakarambwa navavaki iroro ndiro rakava dombo rakakoshesesa rapakona.’

¹⁸“Munhu wose anowira padombo iroro anobva adanzurwa danzurwa. Asi rikawira munhu rinomupwanya.”

¹⁹Nyanzvi dzomutemo navapristi vakuru vakaedza kumubata panguva iyoyo asi vakatya vanhu nokuti vakanga vazviona kuti akanga ataura muenzaniso uyu akananga ivo.

²⁰Saizvozvo vainyatsomutarisisa. Vakatumira vasori vaiita sevakatendeka vachiitira kuti vamubate pakutaura kwake kuti vamuturire kuvakuru vakuru nomumaoko agavhuna.

²¹Vakamubvunza vachiti, “Mudzidzisi, tinoziva kuti munotaura nokudzidzisa zvazviri uye hamusaruri asi munodzidzisa nzira yaMwari zviri pachokwadi.

²²Zviri pamutemo here kubvisa mutero kuna Siza kana kuti kwete?”

²³Asi iye akaona unyengedzi hwavo akati kwavari,

²⁴“Ndiratidzei mari chena imwechete yemadhenari. Ine mufananidzo norunyoro rwaani?” Vakati, “NdezvaSiza.”

²⁵Iye akati kwavari, “Nezvo ipai kuna Siza zvaSiza mupewo kuna Mwari zvaMwari.”

²⁶Havana kugona kumubata pane vanhu mune zvaakataura. Vakangoshamiswa nemhinduro yake vakanyarara.

²⁷Kwakauya kwaari vaSadhusei, vaya vanoti hapana zvokumuka kwavakafa. Vakabvunza Jesu mubvunzo vachiti,

²⁸“Mudzidzisi, Mosesi akatinyorera kuti, ‘Kana mukoma womunhu akafa iye ane mudzimai asi pasina vana, munun'una wake anofanira kutora mudzimai agoberekera mukoma wake vana.’

²⁹Zvino, paiva navanhu vaiva mukomanomunun'una vanomwe. Wokutanga akaroora mudzimai akafa asina vana.

³⁰Wechipiri newechitatu vakamutorawo,

³¹ndizvo zvimwechete navose vari vanomwe, havana kusiya vana.

³²Mushure macho, mudzimai uya akazofawo.

³³Ko zvino pakumuka kwavakafa achava mudzimai waani nokuti vose vari vanomwe akava mudzimai wavo?”

³⁴Jesu akati kwavari, “Vanhu varizvino[28] vanoroora uye vanoroorwa.

³⁵Asi avo vanokodzera kusvika mune ramangwana[29] uye pakumuka kwavakafa, havazoroori kana kuroorwa

³⁶nokuti havachafazve pamusana pokuti vanenge vaita savatumwa uye vanenge vava vana vaMwari uye vanenge vava vanhu vokumuka kuvafi.

³⁷Asi zvokuti vakafa vanomutswa, kunyange Mosesi akazviratidza mundima iya yegwenzi raipfuta moto maanoti Tenzi ndiMwari waAbhurahamu naMwari waIsaki naMwari waJakobho.

³⁸Zvino haasi Mwari wavakafa asi Mwari wavapenyu nokuti kwaari vose vapenyu.”

³⁹Dzimwe nyanzvi dzomutemo dzakapindura dzichiti, “Mudzidzisi mataura zvakanaka.”

⁴⁰Havana kuzoita chivindi chokumubvunza mumwe mubvunzo.

⁴¹Jesu akati kwavari, “Nhai imi, ko vanhu vanoti, ‘Kristu Mwanakomana waDhavhidhi seiko?’

⁴²Inga iye Dhavhidhi pachake mubhuku renziyo anoti, “ ‘Tenzi akati kuna Tenzi wangu, Gara kurudyi rwangu

⁴³kusvikira ndaita mhandu dzako chitambarariko chetsoka dzako.’ ”

⁴⁴Dhavhidhi anomuti, “Tenzi saizvozvi, ko anogova mwana wake sei?”

⁴⁵Jesu akataurira vadzidzi vake, vanhu vose vachinzwa.

⁴⁶Akati, “Ngwarirai nyanzvi dzomutemo, vanhu vanoda kufamba vakapfeka magemenzi marefu, vanoda kukwaziswa pamisika nokuwana zvigaro zvakanaka mumasinagogu nenzvimbo dzapamusoro dzavakuru vakuru pamabiko.

⁴⁷Vanodya twemba dzechirikadzi; uye vanoita minamato mirefu yokungobata zvavo vanhu kumeso. Vachatemerwa chirango chakaremesa.”