Read Bhaibhiri Idzva rechiShona Ruka 23 Bible Online

Ruka 23 - Bhaibhiri Idzva rechiShona bible

Ruka 23

¹Chita chose chiya chavanhu chakasimuka chikaenda naye kuna Pirato.

²Vakatanga kumupa mhosva vachiti, “Takawana munhu uyu achipandutsa rudzi rwedu achitirambidza kubvisa mutero kuna Siza achizviti iye pachake ndiKristu mambo.”

³Pirato akamubvunza achiti, “Ndiwe mambo wavaJudha here?” Iye akamupindura achiti, “Inga matozvireva kare wani.”

⁴Pirato akati kuvapristi vakuru nemhomho yavanhu, “Handisi kuwana mhosva ine mhunhu uyu.”

⁵Vakatobva vasimbisisa kuti, “Anomutsa nyonganyonga muvanhu, achidzidzisa muJudhea yose kubvira kuGarirea kusvikira kuno.”

⁶Pirato paakanzwa izvi akabvunza kuti munhu uyu akanga ari wokuGarirea here.

⁷Paakaziva kuti ndowekudunhu raHerodhi akamutumira kuna Herodhi akanga ari muJerusaremu panguva iyoyo.

⁸Herodhi paakaona Jesu akafara kwazvo nokuti kwenguva ndefu aidisisa kumuona nokuti akanga anzwa nezvake uye akanga achitarisira kuona chimwe chiratidzo chaiitwa naye.

⁹Saizvozvo akamubvunza kwenguva ndefu asi haana kupindura.

¹⁰Vapristi vakuru nenyanzvi dzomutemo vakamirawo vachimupa mhosva zvakaomarara.

¹¹Herodhi namasoja ake vakamudadira vachimuseka. Vakamupfekedza hanzu yakanakisisa akamudzorera kuna Pirato.

¹²Herodhi naPirato vakava shamwari neshamwari pazuva iroro nokuti vaimbenge vachivengana.

¹³Pirato akazodaidza vapristi vakuru navatongi navanhu,

¹⁴akati kwavari, “Maunza munhu uyu kwandiri somunhu anga achipandutsa vanhu asi pandamuongorora pamberi penyu, handina kuwana munhu uyu aine mhosva dzamurikumupomera

¹⁵kunyangewo Herodhi nokuti amudzorera kwatiri. Tarisai muone kuti hapana chaakaita chinokodzera rufu.

¹⁶Naizvozvo ndichamurova shure kwaizvozvo ndigomuregera achienda zvake.” [

¹⁷Nokuti Pirato aifanira kuvasunungurira munhu mumwechete pamazuva makuru.][31]

¹⁸Asi vose vakadaidzira pamwechete vachiti, “Ngaapfuudzwe munhu uyu mutisunungurire Bharabhasi”

¹⁹Bharabhasi murume akanga aiswa mujeri pamusana penyonganyonga yakanga yamuka muguta uye nokuuraya munhu.

²⁰Pirato akashevedzerazve kwavari achida kusunungura Jesu.

²¹Asi ivo vakadaidzira vachiti, “Ngaarovererwe pamuchinjikwa! Ngaarovererwe pamuchinjikwa!”

²²Rwechitatu akati kwavari, “Nemhaka yei? Atadzei? Handina kuwana maari mhosva inokodzera kufa. Naizvozvo ndichamurova chaizvo ndigomurega aende zvake.”

²³Asi vakangoramba vachivavarira vachidaidzira kwazvo vachiti, “Anofanira kurovererwa pamuchinjikwa.” Zvavaizhambira ndizvo zvakazoitwa.

²⁴Saizvozvo Pirato akatonga kuti zvavaida zviitwe.

²⁵Akasunungura murume uya wavakanga vakumbira akanga aiswa mujeri nokuda kwenyonganyonga nokuuraya munhu; asi akaisa Jesu mumaoko avo kuti vaite zvavanoda naye.

²⁶Zvavakanga vachimutungamidza, vakabata Simoni wekuKurini aibva kuruwa vakamutakudza muchinjikwa uya mumashure maJesu.

²⁷Akateverwa negurusvusvu ravanhu namadzimai vachiridza mhere vachimuchema.

²⁸Jesu akatendeukira kwavari akavati, “Vakunda veJerusaremu musandicheme ini; asi zvichemei imi navana venyu.

²⁹Tarirai mazuva ari kuuya pavachati vakakomborerwa zvavo vasina mbereko nemimba dzisina kumbobereka namazamu asina kumboyamwisa.

³⁰Ndipo pavachatangisa kuti kumakomo, ‘Tiwirei’ uye kuzvikomo, ‘Tifugidzei’

³¹nokuti kana vachiita izvi kumuti munyoro, ko kutozoti kuno muti wakaoma.”

³²Vamwewo vaviri vaiva vapari vedzimhosva vakaendwawo navo kundouraiwa pamwechete naye.

³³Pavakasvika panzvimbo inonzi yeDehenya ipapo ndipo pavakamuroverera pamuchinjikwa navapari vedzimhosva vaya vaviri mumwe ari kurudyi mumwe ari kuruboshwe.

³⁴Jesu akati, “Baba varegererei nokuti havazivi zvavari kuita.” Vakakanda mijenya kuti vagovane hanzu dzake.

³⁵Vanhu vakanga vakamira pedyo vachitarisa. Asi vatongi vakamusveeredza vachiti, “Akaponesa vamwe ko ngaazviponesewoka kana ari iye Mesia waMwari musarudzwi wake.”

³⁶Masoja akamutsvinyirawo, vachiuya vachimupa waini inovava vachiti,

³⁷“Kana uriwe Mambo wavaJudha zviponese.”

³⁸Nechapamusoro pake pakanga pane chikwangwani chakanyorwa kuti, “UYU NDIYE MAMBO WAVAJUDHA.”

³⁹Mumwe mupari wedzimosva akanga akarembedzwa akamushonha achiti, “Hausiwe Mesia here? Zviponeseka utiponesewo.”

⁴⁰Asi mumwe uya akamutsiura achiti, “Hautyi Mwari here? Inga une chirango chimwechetecho naye.

⁴¹Kwatiri isu zvakakodzera nokuti tiri kuwana zvakakodzerana nezvatakaita. Asi uyu haana zvaakatadza.”

⁴²Ndokubva ati, “Jesu mundiyeukewo kana masvika muumambo hwenyu.”

⁴³Jesu akati kwaari, “Zvechokwadi ndinoti kwauri, uchava neni muparadhiso iye nhasi uno.”

⁴⁴Ipapo yakanga yenge awa yegumi nechipiri uye nyika yose yakati rima tiba kusvikira paawa yechitatu masikati.

⁴⁵Chiedza chezuva chakadzima; jira rokudzikatirisa romuTemberi rikabvaruka napakati.

⁴⁶Jesu akadaidzira nezwi guru akati, “Baba ndinoisa mweya wangu mumaoko enyu.” Apedza kutaura kudaro akabva afa.

⁴⁷Mutungamiriri wezana ramasoja paakaona zvakanga zvaitika akarumbidza Mwari akati, “Zvechokwadi munhu uyu anga akarurama.”

⁴⁸Gurumwandira rose ravanhu vakanga vaungana kuzoona zvaiitika, pavakaona zvakanga zvaitika, vakadzokera vangogumbata maoko nazvo.

⁴⁹Vose vaizivana naye namadzimai ainge amutevera achibva kuGarirea vakamira vari chinhambwe vakaona zvinhu izvi.

⁵⁰Kwaiva nomumwe murume ainzi Josefi aibva kuguta ravaJudha reArimatia aiva nhengo yedare guru uye ari munhu akanaka akarurama.

⁵¹Iye haana kunge awirirana navamwe pazvinangwa zvavo napane zvavakaita. Iye aitsvaga umambo hwaMwari.

⁵²Murume uyu akaenda kuna Pirato akakumbira chitunha chaJesu.

⁵³Akachidzikisa akachiputira mufuko rejira rerineni. Akamuradzika muguva rakanga raitwa zvokuchezerwa mudombo makanga musati mamboradzikwa munhu.

⁵⁴Zvaraiva zuva rokugadzirira Pasika[32] uye Sabata rakanga ravakutanga

⁵⁵vakadzi vakanga vauya naye vachibva kuGarirea vakatevera vakaona guva racho uye kuti chitunha chakanga charadzikwa sei.

⁵⁶Vakadzokera vakandogadzirira tunonhuwirira namafuta. Pazuva reSabata vakazorora sezvaidiwa nomutemo.