Read Bhaibhiri Idzva rechiShona Ruka 24 Bible Online

Ruka 24 - Bhaibhiri Idzva rechiShona bible

Ruka 24

¹Pazuva rokutanga revhiki, mambakwedza chaiwo, vakaenda kuguva vakatakura tunonhuwirira twuya twavakanga vagadzirira.

²Vakawana dombo riya rakungurutswa kubva paguva.

³Asi pavakapinda havana kuwana chitunha.

⁴Vachiri mukukangaidzwa naizvozvi, havo varume vaviri vakaerekana vamira pavaiva vaine hanzu dzaipenya zvikuru.

⁵Zvavakanga vavakutya zvikuru vakamira vakatsikitsira uso pasi. Varume vaya vakati kwavari, “Munotsvakireiko vapenyu mukati mavakafa.

⁶Yeukai zvaakakuudzai achiri kuGarirea

⁷zvokuti, ‘Mwanakomana womunhu anofanira kuiswa mumaoko avatadzi agorovererwa pamuchinjikwa asi agozomuka nezuva retatu.’ ”

⁸Vakayeuka mazwi ake.

⁹Pavakadzoka kumakuva vakataurira zvose izvi kuna vane gumi nomumwe nokuna vamwe vose.

¹⁰Vakataurira vapositori zvose izvi, ndiMaria Magadharena naJoana naMaria amai vaJemusi navamwe vadzimai vavaiva navo.

¹¹Mashoko aya, kwavari, akaita sezvinhu zvisina maturo saka havana kuatenda. [

¹²Asi Pita akasimuka akamhanyira kuguva. Akakotama akadongorera mukati. Akaona machira erineni ari pawo oga. Akaenda kumba achishama nezvakanga zvaitika.]

¹³Zuva rakarero vamwe vavo vaviri vaienda kunomumwe musha wainzi Emausi waiva makiromita gumi nerimwechete kubva kuJerusaremu,

¹⁴vachitaurirana nezvezvinhu izvi zvose zvakanga zvaitika.

¹⁵Pavakanga vachitaura vachikurukurirana Jesu pachake akaenda pedyo akafamba navo.

¹⁶Asi vakaita chidzimira vakatadza kumuziva.

¹⁷Jesu akati kwavari, “Ko chii chamuri kutaurirana muchifamba kudai?” Vakamira kuti mbikiti vakati surududu.

¹⁸Mumwe wavo ainzi Kiropasi akamupindura achiti, “Ndiwe woga here muenzi wemuJerusaremu, asingazivi zvinhu izvi zvakaitikamo mazuva ano aya?”

¹⁹Iye akati kwavari, “Zvinhuiko izvozvo.” Ivo vakati kwaari, “ZvaJesu weNazareti, aiva muporofita, ane simba guru muzviito nomushoko pamberi paMwari napamberi pavanhu vose

²⁰uye kuti vapristi vakuru navatongi vakamukwirira dare kuti atongerwe rufu vakamuroverera pamuchinjikwa.

²¹Asi taivimba kuti ndiye aizonunura Isiraeri. Chimwewo ndechokuti zvino atova mazuva matatu zvaitika.

²²Chimwezve ndechokuti mamwe madzimai echikwata chedu vatikangaidza. Vaenda kuguva mangwananingwanani

²³vakashaya chitunha chake. Vadzoka vavakuti vaona chiratidzo chavatumwa vari kuti mupenyu.

²⁴Vamwe vedu vatangatinavo vaendawo kuguva, vakaona zvinhu zvakaita sokutaura kwanga kwaitwa namadzimai, asi iye havana kumuona.”

²⁵Jesu ndokuti kwavari, “Oo, inga muri mazirema chaiwo avanhu! Munechinono chaicho kutenda zvose zvakataurwa navaporofita.

²⁶Zvakanga zvisingafaniri here kuti iye Kristu atambudzike saizvozvi achizopinda mumbiri yake?”

²⁷Ndipo paakatangisa nokuna Mosesi navaporofita vose achivatsananungurira muMagwaro Matsvene ose zvinhu zvakanangana naiye pachake.

²⁸Pavakanga vava kuda kusvika pamusha wavaienda, akaita seavakupfuurira.

²⁹Asi vakamugombedzera vachiti, “Garai nesu nokuti kwava kuda kuvira zuva rapera.” Saka akapinda kundogara navo.

³⁰Paakanga ari pakudya navo, akatora chingwa akachikomborera ndokuchimedura akachipa kwavari.

³¹Maziso avo akabva azaruka vakabva vamuziva, asi iye akabva anyangarika kwavari.

³²Vakataurirana vachiti, “Mwoyo yedu haina kunge yava kutopisirira here mukati medu paanga achitaura kwatiri munzira; paya paanga achitizarurira Magwaro Matsvene?”

³³Vakabva vasimuka nguva yakareyo vakadzokera kuJerusaremu. Vakasvikowana vane gumi nomumwechete vaya vakaungana navamwe vavaiva navo,

³⁴vakati, “Tenzi wamuka zvechokwadi uye azviratidza kuna Simioni.”

³⁵Ivowo vakavataurira zvakanga zvaitika panzira uye kuti vakamuziva sei pakumedura chingwa.

³⁶Pavakanga vachiri kutaura izvi. Iye Jesu pachake akamira pakati pavo (akati kwavari, “Rugare ngaruve nemi”).

³⁷Vakavhunduka vakatya vachifunga kuti vari kuona dzangaradzimu.

³⁸Iye akati kwavari, “Ko muri kunetseka mumwoyo menyu neiko? Ko mibvunzo iri kumukireiko mumusoro menyu?

³⁹Tarisai maoko angu netsoka dzangu muone kuti ndini chaiye. Ndibatei muone nokuti dzimudzangara harina nyama namapfupa sezvamuri kuona ndiinazvo.”

⁴⁰Ataura izvi akavaratidza maoko ake netsoka dzake.

⁴¹Vachiri kupokana kudaro pamusana pokufara uye vachikatyamadzwa akati kwavari, “Mune chokudya here pano?”

⁴²Vakamupa hove yakagochwa

⁴³akaitora akaidya pamberi pavo.

⁴⁴Akazovataurira achiti, “Aya ndiwo mazwi angu andakakutaurirai ndichinemi ndichiti, ‘Zvose zvakanyorwa nezvangu mumutemo waMosesi nomuvaporofita nomunziyo zvaifanira kuzadzikiswa.’ ”

⁴⁵Akavazarura pfungwa kuti vanzwisise Magwaro Matsvene.

⁴⁶Akati kwavari, “Zvakanyorwa zvichinzi, ‘Kristu aifanira kutambudzika uye kuti amuke kuvafi nezuva retatu

⁴⁷uyewo kuti kutendeuka nokuregererwa kwezvitadzo kuparidzwe muzita rake kumarudzi ose, zvichitangira kuJerusaremu.

⁴⁸Imi ndimi zvapupu zvezvinhu izvi.

⁴⁹Chinzwai, ndichatumira pamuri chipikirwa chababa vangu. Asi imi garai muguta rino, kusvikira mapiwa simba rinobva kumusoro.’ ”

⁵⁰Akavatungamirira kusvika kuBhetania. Akasimudza maoko ake akavakomborera.

⁵¹Paakanga achivakomborera akabva pavari akakwidzwa kudenga.

⁵²Vakadzokera kuJerusaremu norufaro rukuru;

⁵³vairamba vari muTemberi vachirumbidza Mwari.