Read Bhaibhiri Idzva rechiShona Ruka 3 Bible Online

Ruka 3 - Bhaibhiri Idzva rechiShona bible

Ruka 3

¹Mugore regumi nerechishanu roumambo hwaSiza Tibheriasi, Pontio Pirato ari mutongi weJudhea, Herodhi ari mutongi weGarirea, munun'una wake Firipi ari mutongi wedunhu reIturea neTirakonitisi naRisaniasi ari mutongi weAbhirini,

²Anasi naKaifasi vari vapristi vakuru, shoko raMwari rakasvika kuna Johani mwanakomana waZakariya, ari mugwenga.

³Johani akapoteredza nenyika iri mhiri nemhiri kweJorodhani achiparidza ruombeko rwokuti vanhu vapinduke varegererwe zvitadzo zvavo.

⁴Sokunyorwa kwazvakaitwa mubhuku ramazwi aIsaya muporofita zvichinzi, “Izwi reanodaidzira ari mugwenga achiti: ‘Gadzirirai mugwagwa waTenzi, ruramisai nzira dzake.

⁵Nhika dzose ngadzifusirwe, makomo nezvikomo zviparadzirwe; pakakombama paruramiswe nzira dzina magadhi dzinzi chechetere.

⁶Vanhu vose vachaona ruponeso rwaMwari.’ ”

⁷Naizvozvo akati kuhuzhinji hwavanhu vaiuya kwaari kuzoombekwa naye, “Imi vana venyoka, ndianiko akakunyeverai kuti mutize chirango chirikuuya?

⁸Naizvozvo berekai michero inowirirana nokupinduka kwenyu, uye musavambe kuzviti, ‘Tina Abhurahamu sababa vedu, nokuti ndinoti kwamuri, Mwari anogona kumutsira Abhurahamu vana kubva kumatombo aya.

⁹Zvino demo ratonangiswa parinotema midzi yemiti; naizvozvo muti wose usingabereki muchero wakanaka unotemwa uchikandwa mumoto.’ ”

¹⁰Ruzhinji rwavanhu rwakamubvunza rwuchiti, “Zvino toiteiko?”

¹¹Akavapindura achivati, “Ane hanzu mbiri ngaagoveranewo naasina, naane zvokudya ngaaitewo zvimwechetezvo.”

¹²Vateresi vakauyawo kuzoombekwa vachiti, “Mudzidzisi, ko isu toiteiwo?”

¹³Iye akati kwavari, “Musaterese vanhu kupfuura pamakatemerwa.”

¹⁴Masoja akamubvunza achiti, “Ko isu, toiteiwo?” Iye akati kwavari, “Musatore zviro zvavanhu muchiita zvokupamba kana nokuvarevera nhema asi gutsikanai nemibayiro yenyu.”

¹⁵Zvino vanhu zvavakanga vava nechitarisiro, vose vachizvibvunza nechemumwoyo yavo nezvaJohani, vachifunga kuti zvimwe angadaro ari iye Mesia,

¹⁶Johani akavapindura vose achiti; “Hongu, ini ndinokuombekai nemvura, asi ane simba kupfuura ini ari kuuya. Ini handikodzeri kusunungura rukanda rweshangu dzake. Iye achakuombekai naMweya Mutsvene uye nomoto.

¹⁷“Rusero rwake ruri muruoko rwake kuti aurutse zvapurwa paburiro rake, nokuunganidza koroni achiisa mudura rake, asi hundi achaipisa nomoto usingadzimiki.”

¹⁸Nokudaro Johani akavaparidza Shoko Rakanaka achivakurudzira nenzira dzakasiyana — siyana.

¹⁹Asi Herodhi, mumwe wavatongi vana,[2] zvaakatsiudzwa naJohani pamusana paHerodhiasi mukadzi womunun'una wake uye napamusana pezvakaipa zvose zvaakanga aita,

²⁰akatowedzera zvakare pamusoro paizvozvi zvose nokuisa kwaakaita Johani mujeri.

²¹Vakati zvino vanhu vose vaombekwa, Jesu akaombekwawo. Achingunonamata denga rakazaruka,

²²Mweya Mutsvene, aine muviri unenge wenjiva, akaburukira paari; izwi ndokubva kudenga richiti, “Iwe ndiwe Mwanakomana wangu wapamwoyo ndiwe unondifadza zvikuru.”

²³Zvino, iye Jesu panguva yaakatanga kuita basa rake akanga ana makore makumi matatu. Pakufunga kwavanhu vaiti mwanakomana waJosefi, mwanakomana waHeri,

²⁴mwanakomana waMatati, mwanakomana waRevhi, mwanakomana waMeriki, mwanakomana waJonai, mwanakomana waJosefi,

²⁵mwanakomana waMatatiasi, mwanakomana waAmosi, mwanakomana waNahumi, mwanakomana waEsiri, mwanakomana waNagai,

²⁶mwanakomana waMaati, mwanakomana waMatatiasi, mwanakomana waSemeini, mwanakomana waJoseki, mwanakomana waJodha,

²⁷mwanakomana waJoanani, mwanakomana waResa, mwanakomana waZerubhabheri, mwanakomana waSheatieri, mwanakomana waNeri,

²⁸mwanakomana waMeriki, mwanakomana waAdhi, mwanakomana waKosamu, mwanakomana waErimadhamu, mwanakomana waEri,

²⁹mwanakomana waJoshuwa, mwanakomana waEriezeri, mwanakomana waJorimu, mwanakomana waMatati, mwanakomana waRevhi,

³⁰mwanakomana waSimeoni, mwanakomana waJudha, mwanakomana waJosefi, mwanakomana waJonamu, mwanakomana waEriyakimu,

³¹mwanakomana waMerea, mwanakomana waMena, mwanakomana waMatata, mwanakomana waNatani, mwanakomana waDhavhidhi,

³²mwanakomana waJese, mwanakomana waObhedhi, mwanakomana waBhoasi, mwanakomana waSara, mwanakomana waSarimoni, mwanakomana waNashoni,

³³mwanakomana waAminadhabhu, mwanakomana waAdhimini, mwanakomana waArini, mwanakomana waHezironi, mwanakomana waPerezi, mwanakomana waJudha,

³⁴mwanakomana waJakobho, mwanakomana waIsaka, mwanakomana waAbhurahamu, mwanakomana waTera, mwanakomana waNahori,

³⁵mwanakomana waSerugi, mwanakomana waReu, mwanakomana waPeregi, mwanakomana waEbheri, mwanakomana waShera,

³⁶mwanakomana waKainani, mwanakomana waArifakisadhi, mwanakomana waSemu, mwanakomana waNowa, mwanakomana waRameki,

³⁷mwanakomana waMetusera, mwanakomana waEnoki, mwanakomana waJaredhi, mwanakomana waMaharareri, mwanakomana waKainani,

³⁸mwanakomana waEnosi, mwanakomana waSeti, mwanakomana waAdhamu, mwanakomana waMwari.