Read Bhaibhiri Idzva rechiShona Kutsinhira Mutemo 1 Bible Online

Kutsinhira Mutemo 1 - Bhaibhiri Idzva rechiShona bible

Kutsinhira Mutemo 1

¹Aya ndiwo mashoko akataurwa naMosesi kuvaIsiraeri vose vachiri mhiri kwaJorodhani, murenje reArabha pakatarisana neSufu, vari pakati pamaguta aya anoti: Parani neToferu neRabhani neHazeroti neDhizahabhu.

²Kubva kuGomo reHorebhu[1] uchienda nokugomo reSeiri kundosvika kuKadheshibharinea rwendo rwamazuva gumi nerimwechete.

³Mugore ramakumi mana pazuva rokutanga romwedzi wegumi nechiposhi vabva Ijipiti, Mosesi akarondedzera vaIsiraeri zvose zvaakarayirwa naTenzi pamusoro pavo.

⁴Akavarondedzera izvi abva mukukunda Sihoni mambo wevaAmori aigara muHeshibhoni naOgu mambo weBhashani aigara muAshitaroti nomuEdhirei.

⁵Vachiri mhiri kwaJorodhani ikoko, munyika yeMoabhu, Mosesi akatanga kutsanangura mutemo uyu.

⁶Akati, “Tichiri kuHorebhu Tenzi Mwari wedu akatiti, ‘Nguva yamagara pagomo pano, yareba.

⁷Zvino chisumukai munange nechokumakomo kunyika yevaAmori namatunhu ose akaipoteredza anoti: renje reArabha namakomo namapani neNegevhu namatunhu anotevedza gungwa, nenyika yevaKanani neyeRebhanoni kusvikira kurwizi rukuru rwaYufuratesi.

⁸Iyoyi ndiyo nyika yandinokupai. Chipindai muitore muiite yenyu. Ndiyo nyika yakatsidzirwa naTenzi kupa madzibaba enyu vanaAbhurahamu naIsaki naJakobho nezvizvarwa zvavo.’ ”

⁹Mosesi akaenderera mberi achiti, “Panguva iyoyo ndakakutaurirai kuti, ‘Ini handichakwanisi kukutongai ndiri ndoga.

¹⁰Tenzi Mwari wenyu akakuitai kuti muwande. Zvino tarisai muone pari nhasi mawanda senyenyedzi dzedenga.

¹¹Tenzi Mwari wamadzibaba enyu ngaakuwanzei kazana kakazanirana. Ngaakukomborerei sokukutsidzirai kwaakaita.

¹²Ndakati ko zvino ini ndoga ndingakwanise seiko kutakura nhuna dzenyu nemitoro yenyu nokukakavadzana kwenyu?

¹³Chisarudzai varume vane ungwaru vanonzwisisa mumadzinza enyu, vanoziva zvoupenyu ndigovaita vakuru vakuru venyu.’

¹⁴Ipapo imi makanditi, ‘Zvamataura zvakanaka kuti tiite.’

¹⁵Saka ndakatora vakuru vakuru vomumadzinza enyu vane ungwaru vagara noupenyu ndikavaita vatungamiriri venyu vemapoka mamwe ezviuru mamwe amazana mamwe emakumi mashanu mamwe egumi ravanhu. Ndakagadzawo makurukota mumadzinza enyu.

¹⁶“Panguva iyoyo ndakarayira vatongi venyu ndichiti, ‘Inzwai mhosva dzehama dzenyu mutonge zviri pamwero kunyange iri mhosva iri pakati pehama nehama kana mhosva iri pakati pehama kana nomutorwa waagere naye.

¹⁷Musaite chizivano pakutonga. Teererai mhosva yomudiki kana yomukuru zvimwechetezvo. Musanyare munhu uso nokuti kutonga ndokwaMwari. Asi kana kuine mhosva yakaoma yamusingakwanisi kutonga uyai nayo kwandiri ndiinzwe.’

¹⁸Panguva iyoyo ndakakurayirai zvinhu zvose zvamunofanira kuita.

¹⁹“Takasimuka tichibva paHorebhu tikapfuura nomuzigwenga guru rinotyisa riya ramakaona munzira yokumakomo omunyika yavaAmori sokurayirwa kwatakaitwa naTenzi Mwari wedu. Takazosvika kuKadheshibharinea.

²⁰Ipapo ndakati kwamuri, ‘Zvino mazosvika kumakomo omunyika yavaAmori yatinopiwa naTenzi Mwari wedu.

²¹Chitarisai muone nyika yamapiwa naTenzi Mwari wenyu. Chiendai mundoitora sokutaura kwakaita Tenzi Mwari wamadzibaba enyu. Regai kutya kana kuzeza.’

²²Mose makauya kwandiri mukati, ‘Ngatitumei varume vanoenda kundotisorera nyika iyoyo, vanozodzoka votiudza nzira yokuenda nayo namaguta atingasvikire.’

²³“Ndakafadzwa nazvo, ndikasarudza varume gumi navaviri ndichitora murume mumwechete mudzinza roga roga.

²⁴Vakasumuka vakaenda nokunyika yemakomo, vakandosvika kubani reEshikoru vakarisora.

²⁵Vakadzoka vakabata mumaoko mimwe michero yenyika iyoyo yavakativigira. Vakatiunzirawo shoko rokuti, ‘Nyika yatiri kupiwa naTenzi Mwari wedu yakanaka.’

²⁶“Asi makaramba kuendako mukatoita zvenyu zvakapesana nezvakarayirwa naTenzi Mwari wenyu.

²⁷Makanyunyuta muri mumatendhe enyu muchiti, ‘Tenzi anotivenga, saka akatiburitsa kuIjipiti kuzotiisa mumaoko avaAmori kuti vatiparadze.

²⁸Zvino toendepiko? Hama dzedu dzatiodza mwoyo dzichiti, Vanhu veko ihofori dzavanhu, vakareba kupfuura isu. Maguta avo makuru ane nhungamakore dzamasvingo. Takaonawo hofori dzokwaAnakimu dziriko.’

²⁹“Asi ini ndakakutii, regai kuvazeza kana kuvatya.

³⁰Tenzi Mwari wenyu anokutungamirirai, ndiye achakurwirai sezvaakakuitirai muIjipiti muchizviona nameso enyu.

³¹Achakuitirai sezvaakaita kurenje kwamakaona Tenzi Mwari wenyu achikutakurai kwose kwose kwamakaenda somunhu anotakura mwana wake kudzamara musvike pano.

³²Kunyange zvakadaro, hamuna kutenda naTenzi Mwari wenyu.

³³Murwendo rwenyu ndiye aifanotungamira kundokutsvakirai pokudzika matendhe enyu achikutungamirirai nzira yokuenda nayo usiku nomoto, masikati negore.

³⁴“Tenzi akanzwa zvamakareva zvikamutsamwisa. Akapika achiti,

³⁵‘Hakuna nomumwe wechizvarwa ichi chakaipa achazoona nyika yakanaka yandakatsidzira kupa madzibaba enyu

³⁶kunze kwaKarebhu mwanakomana waJefune, ndiye achaiona. Iye navana vake, ndichavapa nyika yaakambotsika nokuti akateerera Tenzi nomwoyo wake wose.’

³⁷Kunyange neni, Tenzi akanditsamwirawo pamusana penyu akati, ‘Newewo hauchambomupinda.’

³⁸Joshuwa mwanakomana waNuni waunaye, ndiye achapindamo. Mukurudzire nokuti ndiye achatungamirira vaIsiraeri pakutora nhaka iyoyo.

³⁹“Asi pwere dzenyu dzamakati dzichatapwa pamwechete navana venyu vasati vaziva chakanaka kana chakaipa pari nhasi, ndivo vachapindamo, uye ndivo vandichapa nyika iyoyo kuti ive yavo.

⁴⁰Zvino imimi chisimukai mupindukire kurenje, munopinda munzira yokuGungwa Dzvuku.

⁴¹“Imi makandipindura muchiti, ‘Tatadzira Tenzi. Zvino tava kuenda zvedu kundorwa sokuudzwa kwatakaitwa naTenzi Mwari wedu.’ Ipapo mumwe nomumwe wenyu akapakata zvombo zvake, muchitofunga zvenyu kuti inyore kukwira kunyika yamakomo.

⁴²“Tenzi akanditi, ‘Vaudze kuti; regai zvokuenda kundorwa nokuti handinemi mungandokurirwa navavengi venyu.’

⁴³Ndakakuudzai asi makaramba kunzwa. Makatoita zvenyu zvakapesana nezvavakaudzwa naTenzi, mukaita zvokuzvikudza muchienda kunyika yokumakomo.

⁴⁴VaAmori vagere munyika yamakomo vakakubudirai vakakudzingirirai senyuchi, vakakurizhai kubvira paSeiri kundosvika kuHoruma.

⁴⁵Makadzoka mukachema kuna Tenzi, asi Tenzi haana kunzwa kuchema kwenyu kana kuteerera kwamuri.

⁴⁶Ndokusaka makagara paKadheshi kwenguva ndefu, iya yamakagarapo.