Read Bhaibhiri Idzva rechiShona Kutsinhira Mutemo 11 Bible Online

Kutsinhira Mutemo 11 - Bhaibhiri Idzva rechiShona bible

Kutsinhira Mutemo 11

¹“Naizvozvo ida Tenzi, Mwari wako, uteerere zvaakatema, uteerere zvirevo zvake, nemitemo yake, nemirao yake misi yose.

²Nhasi uno, (sezvandisiri kutaura kuvana venyu vasingazvizivi vasina kumbozviona;) imimi munoziva kukudzidzisai kwakaita Tenzi Mwari wenyu, munozivawo ukuru hwake nesimba rake,

³nezviratidzo zvake, nezvaakaita muIjipiti kuna Farao mambo weIjipiti, nokunyika yake yose;

⁴nezvaakaita kuhondo yeIjipiti, nokumabhiza avo nengoro dzavo, nokuyeredza kwaakaita hondo yaikuteverai nemvura yeGungwa Dzvuku, namaparadziro avakaitwa naTenzi kusvikira pari nhasi.

⁵Munozivawo zvaakakuitirai murenje musati masvika pano,

⁶nezviya zvakaitwa pakati pavaIsiraeri kuna Dhatani naAbhiramu vanakomana vaEriabhu, wedzinza raRubheni. Munozivawo mubamukiro wakaita nyika, ikashama muromo wayo, ikavamedza ivo nemhuri dzavo, namatendhe avo, nezvipfuwo zvavo zvose zvavaiva nazvo.

⁷Imi makazvionera nameso enyu basa guru rose rakaitwa naTenzi.

⁸“Teererai mitemo yose yandiri kukupai nhasi uno kuti muwane simba mupinde mundotora nyika yamava kuyambukira kwairi kuti muiite yenyu,

⁹uye ndokuti murarame kwenguva ndefu munyika yakatsidzirwa naTenzi kupa madzitateguru enyu navana vavo, nyika yakanaka yomukaka nouchi.

¹⁰Ndinodaro nokuti nyika yauri kuenda kundotora haina kufanana nenyika yeIjipiti kwamakabva, kwete, kwamaidyara mbeu muchiita zvokudiridza namaoko sebindu romuriwo.

¹¹Asi nyika yamava kuyambukira kundotora kuita yenyu, inyika yezvikomo namapani, inonyoroveswa nemvura inoita zvokunaya mudenga,

¹²inyika inonyatsochengetwa naTenzi, ziso rake haribvi pairi kubvira pakutanga kwegore kusvikira pakupera kwaro.

¹³“Kana machengeta mitemo yandiri kukupai nhasi uno, mukada Tenzi Mwari wenyu, nokumushandira nomwoyo wose, nomweya wenyu wose,

¹⁴achakunayisirai mvura yomunhuruka neyematsutso nemwaka wayo chaiwo munyika yenyu, kuti unyatsokohwa mbesanwa dzako, newaini yako namafuta.

¹⁵Achameresa uswa mumafuro ezvipfuwo zvako. Uchawana zvokudya zvakakwana.

¹⁶Chenjerera kuti ungadaro ukazozvifurira mumwoyo mako, wozvirasisa nzira yako, woshandira vamwe vamwari, wovanamata.

¹⁷Ukadaro unozvinyandurira hasha dzaTenzi, achapfiga matenga, mvura yorega kunaya, nyika yoshaya kana chainobereka, mobva maparadzwa pasina nenguva yose munyika yakanaka yamunopiwa naTenzi.

¹⁸“Naizvozvo pfundirai mazwi angu aya, mumwoyo menyu nomumweya wenyu, muasungirire paruoko rwenyu chive chiratidzo, muasungirirewo pahuma dzenyu netsungare.

¹⁹Adzidzisei vana venyu. Taura nezvawo ugere mumba yako, napaunenge uchifamba munzira, napaunenge uvete, napaunomuka.

²⁰Anyore pamagwatidziro epamba yako napamisuo yako mikuru,

²¹kuitira kuti imi navana venyu murarame mazuva akawanda munyika yakatsidzirwa naTenzi kupa madzitateguru enyu nokusingaperi.

²²“Mukanyatsoteerera mitemo yose iyi yandiri kukupai, mukaichengeta, mukada Tenzi Mwari wenyu nokufamba munzira dzake, nokuramba makangoti kwati kwati naye,

²³Tenzi achakudzingirai ndudzi dzose idzi munyika dzadzo kuti imi muzotonga ndudzi huru dzakasimba kupinda imi.

²⁴Pose pachatsika rutsoka rwenyu pachava penyu. Muganho wenyu uchabvira kurenje kundosvika kuGomo reRebhanoni, kubvirawo kurwizi rukuru rwaYufuratesi kundosvika kugungwa rokumadokero.

²⁵Hapana achagona kumirisana nemi, Tenzi achapa kuti kwose kwamuchasvika vanhu voko vachadedera nokukutyai sokutaura kwaakaita.

²⁶“Teerera unzwe, nhasi uno ndakuisira zvokusarudza, chikomborero kana rushambwa.

²⁷Unowana chikomborero kana ukateerera mitemo yaTenzi Mwari wako yandiri kukupa nhasi uno.

²⁸Asi unowana rushambwa kana ukasateerera mitemo yaTenzi Mwari wako wotsauka panzira yandiri kukuudza nhasi uno, wotevera vamwe vamwari vausina kumboziva.

²⁹Kana Tenzi Mwari wako azokusvitsa munyika yawava kundoita yako, unofanira kupa chikomborero uri paGomo reGerizimu, worengerera uchishurikidza rushambwa uri paGomo reEbhari.”

³⁰Inga wani makomo iwayo ari munyika yevaKanani vanogara kuArabha, kwakatarisana neGirigari, kumhiri kwaJorodhani kumadokero munyasi momuti womuoku weMore.

³¹“Zvino mava kuyambuka Jorodhani, kundotora nyika yamuri kupiwa naTenzi Mwari wenyu, kana maitora maiita yenyu magara mairi,

³²chenjererai kuchengeta mirao nezvirevo zvose zvandiri kuisa pamberi penyu nhasi uno.