Read Bhaibhiri Idzva rechiShona Kutsinhira Mutemo 12 Bible Online

Kutsinhira Mutemo 12 - Bhaibhiri Idzva rechiShona bible

Kutsinhira Mutemo 12

¹“Iyi ndiyo mirao nezvirevo zvamunofanira kungwarira kuchengeta, mazuva ose oupenyu hwenyu pasi pano, munyika yauri kupiwa naTenzi Mwari wamadzitateguru ako.

²Ndudzi dzamuri kundotorera nyika yadzo dzine nzvimbo dzadzinonamatira vamwari vadzo dziri mumakomo marefu nomuzvikomo nomunyasi momuti wose wakasvibira mashizha. Nzvimbo idzodzo dzose dziparadzei zvokuparadza zviya.

³Pazai atari dzavo, muputswe-putswe shongwe dzavo dzamabwe akamiswa, muroromese nomoto zvifananidzo zvakavezwa zvinomiririra mwari wavo Ashera, muteme-teme vamwari vavo vakavezwa, murovese zvachose mazita avo panzvimbo idzodzo.

⁴“Zvakadaro izvozvo, musazviite kuna Tenzi Mwari wenyu.

⁵Asi muchandonamata Tenzi Mwari wenyu kunzvimbo imwechete yaachasarudza pakati pamadzinza enyu ose, kuisa zita rake achiita musha wake, ndokwamuchaenda ikoko.

⁶Ikoko ndiko kwamuchaunza mipiro yokupisa, nezvibayiro nemipiro yezvegumi, nezvimwe zvipo zvamunopira, nemipiro yezvamunenge makambotsidzira, nemipiro yokupa nokuda kwenyu, nemipiro yamatangwe emombe neezvimwe zvipfuwo zvenyu.

⁷Ipapo pana Tenzi Mwari wenyu ndipo pamuchadyira, muchifara, imi nemhuri dzenyu pane zvose zvamunoita nesimba ramaoko enyu nokuti Tenzi Mwari wenyu akakukomborerai.

⁸“Regai kuzoita maitiro atiri kuita pano aya okuti munhu anoita napaanofunga kuti ndipo pakanaka.

⁹Iye zvino hamusati masvika zvenyu kwamuchanyatsogara, kunyika yamuri kupiwa naTenzi Mwari wenyu.

¹⁰Asi kana mazoyambuka Jorodhani magara munyika yamuri kupiwa naTenzi Mwari wenyu kuti ive yenyu, akuzorodzai kuvavengi venyu vose, mava norugare,

¹¹munofanira kuunza zvose zvandiri kukurayirai kunzvimbo imwechete ichasarudzwa naTenzi Mwari wenyu kuisa zita rake pairi. Ndiko kwamuchaunza mipiro yokupisa nezvibayiro nemipiro yezvegumi nezvimwe zvipo zvamunopira, nemipiro yamunenge makambotsidzira kupa kuna Tenzi.

¹²Muchafara muriko pana Tenzi Mwari wenyu, imi navana venyu, vakomana navasikana, navaranda venyu, vechikadzi nevechirume, nevaRevhi vagere mumaguta enyu zvavasina kupiwa nhaka pakati penyu.

¹³Chenjerera kuti urege kungopira panzvimbo pose pose paunenge wangoda mipiro yako yokupisa.

¹⁴Asi pira panzvimbo imwechete inenge yasarudzwa naTenzi munyika yerimwe dzinza renyu. Ikoko ndiko kwaunofanira kupira mipiro yokupisa nokuita zvose zvandiri kukuudza.

¹⁵“Asi baya zvako nyama udyire chero muguta rako ripi zvaro sokuda kwako, sokukomborerwa kwaunenge waitwa naTenzi Mwari wako. Inogona kudyiwa zvayo nomunhu anenge an'ora neasina kun'ora sezvamunongoitawo nemhara nemhembwe.

¹⁶Asi ropa rayo ndiro bedzi ramusingabvumirwi kudya, riregei rirasikire pasi semvura.

¹⁷“Rega kudyira mumaguta ako mipiro yezvegumi kana yembesanwa kana yewaini, kana yamafuta, kana yamatangwe emombe neezvimwe zvipfuwo zvako kana mupiro zvawo wako wezvawakambotsidzira Mwari kana mipiro yokupa nokuda kwako, kunyange zvimwe zvipo zvaunopira.

¹⁸Asi zvidyire pana Tenzi Mwari wako, iwe navana vako vakomana navasikana, navaranda vako vechikadzi nevechirume nevaRevhi vanenge vagere mumaguta ako, mufare muchipembera nebasa ramaoko enyu.

¹⁹Usazorega kuva nehanya nevaRevhi nguva dzose dzaunogara munyika iyoyo.

²⁰“Kana Tenzi Mwari wako achinge azokudza-kudza nyika yaari kukupa sokukuvimbisa kwaakaita, ukazoti, ‘Ndava kuda nyama,’ wava nenhomba yenyama, idya zvako nyama yaunoda.

²¹Kana nzvimbo ichasarudzwa naTenzi Mwari wako kuti zita rake rinamatirwe ipapo iri kure newe, ungabaye zvako mombe kana chimwe chipfuwo chako chawakapiwa naTenzi, asi zviite sokurayira kwandakakuita. Idye hako napaunodira mumaguta ako.

²²Samadyiro anoitwa mhara kana anenge mhembwe, ndiwo madyiro aunoiita. Munhu wose anobvumirwa kuidya zvake, anenge an'ora kana asina.

²³Asi chenjerera chete kuti urege kudya ropa nokuti ropa ndohupenyu nezvo usadye upenyu pamwechete nenyama yacho.

²⁴Rega kudya ropa, asi rirege rirasikire pasi semvura.

²⁵Usaridye kuti zvose zvikunakire iwe nezvizvarwa zvako nokuti unenge uchiita zvinofadza Tenzi.

²⁶Asi zvinhu zvaunenge watsaurira kuturira Mwari, nezvawakatsidzira kupa kuna Mwari, tora uende nazvo kunzvimbo ichazosarudzwa naTenzi.

²⁷Ikoko ndiko kwaunopira mipiro iya yokupisa chibayiro chose zvacho, ropa nenyama yacho zvichiiswa paatari yaTenzi Mwari wako. Asi kana zviri zvimwe zvibayiro, ropa dururira paatari yaTenzi Mwari wako, nyama yacho uchidya zvako.

²⁸Nyatsoteerera mitemo yandiri kukupa kuti zvizokunakira iwe nezvizvarwa zvako nokusingaperi nokuti unenge uchiita zvakanaka, zvinofadza Tenzi Mwari wako.

²⁹“Kana Tenzi Mwari wako aparadza achikudzingira ndudzi munyika yauri kundotora kuita yako, wagara mairi,

³⁰chenjerera kuti urege kuteyiwa woda kudzitevedzera. Rega kufeya-feya uchiti, ‘Ko ndudzi idzodzi dzainamata sei vamwari vadzo kuti ndiiteo zvimwechetezvo?’

³¹Usaite zvakadaro kuna Tenzi Mwari wako nokuti ivo vanoita kuna vamwari vavo zvisingadiwi naTenzi, nezvaanovenga. Vanotopisa mumoto kunyange vana vavo vakomana navasikana vachivapira kuna vamwari vavo.

³²“Nyatsochengeta zvose zvandiri kukuudza, usambowedzera kana kutapudza chinhu.