Read Bhaibhiri Idzva rechiShona Kutsinhira Mutemo 13 Bible Online

Kutsinhira Mutemo 13 - Bhaibhiri Idzva rechiShona bible

Kutsinhira Mutemo 13

¹“Ngatitii pakati penyu pomuka muporofita kana muroti wehope, anofanokuudzai nechiratidzo nenenji,

²achifembera zvichazoitika, zvichizoitika, asi achizoti ngatinamate vamwe vamwari vausingambozivi, tivashandire.

³Rega kuteerera zvinotaurwa nomuporofita iyeyo kana muroti wehope iyeyo nokuti Tenzi Mwari wako anenge achitokuedza zvake achida kuona kuti unoda Tenzi Mwari wako nomwoyo wako wose nomweya wako wose here.

⁴Tenzi Mwari wenyu ndiye wamunofanira kutevera, ndiye wamunofanira kuremekedza. Mitemo yake ndiyo yamunofanira kuchengeta. Teererai izwi rake, mumushandire, murambe makati kwati naye.

⁵Asi muporofita iyeyo kana muroti wehope iyeyo ngaaurayiwe, nokuti akafurira vanhu kupandukira Tenzi Mwari wenyu akakuburitsai kuIjipiti, akakununurai muuranda, achikutsautsa munzira yawakanzi naTenzi Mwari wako utevere naizvozvo unobva waita kuti huipi hwakadai hupere pakati penyu.

⁶“Zvingaitike kuti ungafurirwewo nomukoma kana munun'una wako womumba, kana nomwanasikana wako, kana nomudzimai wako, muswerawakaringa chaiye, kana sahwira, shamwari yako yepamwoyo, ingakutaurire muchivande kuti, ‘Handei tindoshandira vamwe vamwari,’ vasingambozikanwa newe kana madzitateguru ako,

⁷vangave vamwe vamwari vendudzi dzavanhu vagere munharaunda yenyu kana vari chinhambwe, kusvikira kwakaperera nyika,

⁸usabvume kana kuteerera zvaanoreva. Rega kumunzwira tsitsi. Usamurege ari mupenyu. Usamuhwandise uchimunzvengesa kuvanhu.

⁹Asi iwe muuraye chete! Pakumuuraya iwe noruoko rwako ndiwe unotanga kwozotevera vamwe vose.

¹⁰Muteme namabwe afe nokuti aida kukutsautsa pana Tenzi Mwari wako akakuburitsa munyika yeIjipiti, muuranda.

¹¹VaIsiraeri vachazvinzwa vachatya, vakarega kuzoitazve chinhu chakaipa chikadaro pakati penyu.

¹²“Zvingaitikewo kuti unganzwe kuti mune rimwe guta renyu ramuri kupiwa naTenzi Mwari wenyu rokugara

¹³mamuka vamwe vanhu vasina maturo vari kukwezvera vanhu vemo kusiriko vachiti, ‘Handei tindoshandira vamwe vamwari,’ vausingambozivi.

¹⁴Nyatsotsvakiridzai mufeye-feye nokunyatsobvunzisisa nyaya iyoyo. Kana zvikaonekwa kuti ichokwadi, kuti chinhu chakaipa chikadaro chakaitika pakati pavo,

¹⁵paradzai namapakatwa vanhu vagere muguta iroro zvokuparadza zviya. Munyatsoriparadzawo nezvose zvirimo pamwechete nezvipfuwo zvaimomo.

¹⁶Zvinhu zvose zvamunowana zvirimo zvitutirei panhandare yomo yakakura muroromese guta iroro nomoto nezvinhu zvaro zvose, Tenzi Mwari wenyu azvione. Riregei rive dongo rakati murwi tuku risina anozorivaka zvakare.

¹⁷Zvinhu izvozvo zvose zvinenge zvanzi zviparadzwe, usazombobata zvako kunyange chimwe chazvo kuti upodze hasha dzaTenzi, dzinotyisa, akunzwirei nyasha akuitirei tsitsi aite kuti muwande sokutsidzira kwaakaita kumadzitateguru ako.

¹⁸Ndokunge wateerera izwi raTenzi Mwari wako uchichengeta mitemo yake yandiri kukuudza nhasi uno, kuti uite zvinofadza Tenzi Mwari wako.