Read Bhaibhiri Idzva rechiShona Kutsinhira Mutemo 14 Bible Online

Kutsinhira Mutemo 14 - Bhaibhiri Idzva rechiShona bible

Kutsinhira Mutemo 14

¹“Imi muri vana vaTenzi Mwari wenyu. Musazvicheke-cheke kana kuzviveura vhudzi rapahuma dzenyu pamunenge mafirwa.

²Ndinodaro nokuti muri rudzi rwavanhu vatsvene vakatsaurirwa Tenzi Mwari wenyu. Tenzi akakusarudza pakati pemarudzi ose epasi pano pose akati muve vanhu vake pachake.

³“Usadye chinhu chinosemesa Mwari.

⁴Mhuka dzamungadye ndedzidzi: mombe nehwai nembudzi

⁵nenondo nemhara nemhembwe nembudzi dzomusango nemharapara nengururu.

⁶Mukati memhuka yose ine zondo rakapararana richiita mativi maviri, iriwo mhuka inozeya, ndiyo yamungadye zvenyu.

⁷Musadye dzose dzinozeya asi dziine zondo risina kupararana kana kuti dzine zondo rakapararana asi dzisingazeyi. Musadye nghamera netsuro nembira nokuti kunyange dzichizeya zvadzo, zondo radzo harina kupararana, dzinokun'oresai.

⁸Musadye nguruve nokuti kunyange zvadzo dziine zondo rakapararana hadzizeyi, dzakan'ora kwamuri. Musadye nyama yadzo kana kubata zvitunha zvadzo.

⁹“Pane zvomumvura zvamungadye ndezvizvi zvinoti: zvine zvimbi nezvina makwande.

¹⁰Asi musadye chose chisina zvimbi namakwande, chakan'ora kwamuri.

¹¹“Shiri dzose dzisina kun'ora mungadye zvenyu.

¹²Asi idzi ndidzo shiri dzausingabvumirwi kudya dzinoti; gondo negora nechapungu

¹³norukodzi nenjerere namarudzi ayo

¹⁴nemhando dzose dzamakunguo

¹⁵nemhou nedahwa neshiri yegungwa, namarudzi ose oruvangu

¹⁶napotono nezizi guru nenhapata

¹⁷nedhadha romusango, nehungwe nekanyurira

¹⁸neshuramurove namarudzi ose ezimudo nemhupupu nomuremwaremwa.

¹⁹“Zvipembenene zvine mapapiro, zvose zvazvo zvakan'ora kwamuri, hazvidyiwe.

²⁰Idyai zvenyu zvose zvine mapapiro zvisina kun'ora.

²¹“Musadye mhuka inenge yafa yoga, ipe zvako mutorwa waugere naye adye hake, kana kuitengesera mubvakure nokuti imi muri rudzi rwavanhu rutsvene rwakatsaurirwa Tenzi Mwari wenyu. Musabike mbudzana mumukaka wamai vayo.

²²“Unosungirwa kubvisa chegumi pambesanwa dzaunokohwa mumunda mako gore negore,

²³uchindozvidyira pana Tenzi Mwari wako, panzvimbo yaachasarudza kuisa zita rake. Ipapo ndipo pauchadyira chegumi chembesanwa dzako nechewaini yako nechemafuta ako eorivhi, pamwechete nematangwe emombe dzako nezvimwe zvipfuwo zvako, kuitira kuti udzidze kuremekedza Tenzi Mwari wako nguva dzose.

²⁴Kana nzvimbo iyoyo ichinge iri kure nomusha wako zvokuti haugoni kutakura zvegumi zvawakakomborerwa nazvo naTenzi Mwari wako uchienda nazvo ikoko zvaungaite ndezvizvi:

²⁵Tengesa zvegumi izvozvo, mari yacho uende nayo kunzvimbo imwechete ichasarudzwa naTenzi Mwari wako,

²⁶uzondotenga zvose zvaunoda, mombe kana hwai kana waini kana doro rinodhaka, chero chaunoda zvako udyire pana Tenzi Mwari wako iwe nemhuri yako mupembere muchifara.

²⁷“Usazorega kuva nehanya nevaRevhi vaugere navo mumaguta enyu, sezvovasina kupiwa mugove kana nhaka pakati penyu.

²⁸“Panenge pangopera makore matatu, unganidzai mumaguta enyu chegumi chezvamakawana gore iroro.

²⁹VaRevhi sezvo vasina mugove kana nhaka pakati penyu saka ivo pamwechete navatorwa nenherera nechirikadzi dzigere mumaguta enyu vangauye zvavo kuzodya vachiguta, kuti Tenzi Mwari wenyu akukomborerei pabasa ramunobata namaoko enyu.