Read Bhaibhiri Idzva rechiShona Kutsinhira Mutemo 19 Bible Online

Kutsinhira Mutemo 19 - Bhaibhiri Idzva rechiShona bible

Kutsinhira Mutemo 19

¹“Kana Tenzi Mwari wako akudzingira marudzi ane nyika yauri kupiwa naTenzi Mwari wako, ukange wavatorera nyika wogara mumaguta avo nomudzimba dzavo,

²munofanira kuzvitsaurira maguta matatu munyika yamuri kupiwa naTenzi Mwari wenyu kuti ive yenyu.

³Ganhurai nyika yamuri kupiwa naTenzi Mwari wenyu muzvikamu zvitatu, mugadzire nzira dzinoenda kumaguta acho kuitira kuti munhu anenge auraya mumwe atizire kundopoterako.

⁴Iwoyu ndiwo murao wokuti munhu anenge auraya mumwe mukusaziva pasina ruvengo akange atizirako apunyuke rufu.

⁵Zvingaitike kuti munhu oenda musango kundotema miti aine mumwe wake, poti achitema muti kudaro, demo rake roguka rotema mumwe wake obva afa. Nyakuuraya mumwe ngaatizire kune rimwe ramaguta iwayo kundopoterako apunyuke rufu.

⁶Kana kokutizira kukaita kure, mutsivi weropa rehama angadaro akamuronda akamubata panzira, nehasha dzaanenge anadzo akamuuraya iye asingakodzere kuurayiwa nokuti anga asingavenge mumwe wake.

⁷Ndokusaka ndichikutii munofanira kuzvitsaurira maguta matatu.

⁸“Kana Tenzi Mwari wako azokudza-kudza nyika sokutsidza kwaakaitira madzitateguru ako achikupa nyika yose yaakati achavapa

⁹ndokungewoka watochengeta mitemo iyoyi yose yandiri kukuudza nhasi uno uchida Tenzi Mwari wako, uchifamba munzira dzake dzose nguva dzose. Ipapo ndopaunofanira kunge wowedzera mamwe maguta matatu pamatatu aye aye

¹⁰nokuti ropa risina mhaka ringangoteurwa mukati menyika yenyu yamuri kupiwa naTenzi Mwari wenyu kuti ive nhaka yenyu mukazova nemhosva yokudeura ropa.

¹¹“Asi kana munhu achivenga mumwe wake akamuhwandira akamurwisa akamukuvadza zvakaipisisa akafa, nyakumuuraya akatizira kune rimwe ramaguta aya,

¹²vakuru vakuru vomuguta rake ngavatume vanhu kundomutora ikoko vamuise mumaoko meanofanira kutsiva ropa rehama yake kuti aurayiwe.

¹³Rega kumuitira tsiyenyoro asi bvisa mhosva yeropa risina mhaka muIsiraeri kuti zvikufambire zvakanaka.

¹⁴“Usasudurudze chitata chamabwe chomuganho womunda womumwe wako chakaiswa navakuru vekare mumana rako munyika yauri kupiwa naTenzi Mwari wako.

¹⁵“Munhu haanganzi ane mhosva noumboo hwechapupu chimwechete pamhosva ipi neipi yaanonzi akapara kana akakanganisa. Panotosungirwa kuva nezvapupu zviviri kana zvitatu kuti anzi ane mhosva.

¹⁶Kana chapupu chenhema chikasimuka chichipomedzera munhu kuti akakanganisa,

¹⁷pakadaro vose vari vaviri ngavandomira pana Tenzi padare ravapristi navatongi vari pabasa mazuva iwayo.

¹⁸Vatongi ngavanyatsobvunzurudza. Kana zvikabuda pachena kuti uchapupu hwake ndohwenhema anga achingopomera mhosva mumwe wake zvisizvo,

¹⁹ngaapiwe chirango chakarecho chaanga achida kuti mumwe wake apiwe. Nokudaro uchabvisa huipi hwakadai pakati penyu.

²⁰Vamwe vose vachazvinzwa, vakatya vakarega kuzoitazve chakaipa chakadai mukati menyu.

²¹Usamuitire tsiyenyoro upenyu ngahutsiviwe noupenyu, ziso neziso, zino ngaritsiviwe nezino, ruoko noruoko, gumbo richitsiviwawo negumbo.