Read Bhaibhiri Idzva rechiShona Kutsinhira Mutemo 2 Bible Online

Kutsinhira Mutemo 2 - Bhaibhiri Idzva rechiShona bible

Kutsinhira Mutemo 2

¹“Takazosimudzira rwendo rwedu topinda murenje. Takapinda munzira yokuGungwa Dzvuku sokuudzwa kwandakaitwa naTenzi. Takadzengerera tiri mumakomo eSeiri kwamazuva mazhinji.

²Tenzi akanditi,

³‘Kudzengerera kwamaita munyika ino yamakomo kwakwana. Chinangai nechokuchamhembe.

⁴Udzai vanhu kuti iye zvino izvi mava kupfuura nomunyika yehama dzenyu vana vaEsau vagere munyika yeSeiri. Vachakuzezai, saka itai makachenjera.

⁵Musadenhana navo nokuti handisi kuzokupai kunyange kadimbu kenyika yavo, kwete, kunyange kanzvimbo kanokwana kutsika rutsoka zvarwo nokuti ndakapa gomo reSeiri kuna Esau senhaka yake.

⁶Zvokudya zvenyu muchatoita zvokutotenga nemari kwavari kana mvura yenyu yokunwa muchatoita zvokutenga nemari kwavari.’

⁷“Ndinodaro nokuti Tenzi Mwari wenyu akakukomborerai pane zvose zvamakaita namaoko enyu. Akakuchengetai pamaidzungaira muzigwenga guru iri. Kwamakore makumi mana aya Tenzi Mwari wenyu akanga achingova nemi. Hapana chamakashaya.

⁸“Takazobva paiva nehama dzedu vana vaEsau vaigara munyika yeSeiri panzira yeArabha kuErati pakadziva kuEzionigebheru. Takazonanga nenzira yokurenje reMoabhu.

⁹Tenzi akanditi, ‘Musambonetsa vaMoabhu, kana kurwisana navo nokuti handisi kuzokupai kunyange kadimbu kenyika yavo kuti ive nhaka yenyu nokuti ndakapa guta reAru kuvana vaRoti kuti ive nhaka yavo.’ ”

¹⁰(Kare rudzi rwavaEmimu ndirwo rwaigaramo. Vaiva rudzi rukuru, rune vanhu vakawanda, vakareba sehofori dzerudzi rwavaAnakimu.

¹¹SevaAnakimu ivo vainziwo vaRefaimu asi vaMoabhu vaivatumidza kuti vaEmimu.

¹²Kareko vaHori vaigara kuSeiri. Asi vana vaEsau vakavatorera nyika yavo vakavaparadza ndokubva vagaramo ivo sezvakaitwa navaIsiraeri munyika yavakapiwa naTenzi kuti ive nhaka yavo).

¹³“Takazonzi chisumukai muyambuke karukova Zeredhi, tikayambuka.

¹⁴Kwakapera makore makumi matatu namasere kubvira musi watakabva paKadheshibharinea kusvikira musi watakayambuka Zeredhi, kudzamara chizvarwa chose chavarume vose vaikwanisa kuenda kuhondo chapera kufa vasisimo mumatendhe sokupikirwa kwavakaitwa naTenzi.

¹⁵Tenzi nesimba rake akaramba achingovapedza nokufa kudzamara vose vapera.

¹⁶“Kuzoti varume vaya vezero raikwanisa kuenda kuhondo vapera kufa pakati pevaIsiraeri,

¹⁷Tenzi akanditi,

¹⁸‘Nhasi uno munofanira kudimura muganho weMoabhu paAru.

¹⁹Mukange masvika munyika yavaAmoni musambovanetsa kana kudenhana navo nokuti handisi kuzokupai kunyange kadimbu kenyika yavaAmoni kuti ive nhaka yenyu nokuti ndakaipa vana vaRoti kuti ive yavo.’ ”

²⁰(Nyika iyoyo inonziwo nyika yavaRefaimu. VaRefaimu ndivo vaimbogaramo kare, asi vaAmoni vaivatumidza kuti maZamuzumimu.

²¹Vakanga vari rudzi rukuru rune vanhu vakawanda, vakareba sehofori dzorudzi rwavaAnakimu. Asi Tenzi akavaparadza, vaAmoni ndokutora nyika iyoyo ndokubva vazogara panzvimbo pavo.

²²Tenzi ndizvo zvaakanga aitirawo vana vaEsau vagere munyika yeSeiri. Akaparadza vaHori, ivo ndokuvatorera nyika yavo ndokubva vagaramo. Vachiri kugaramo nanhasi.

²³Ndizvo zvakaitwawo nevaKafutorimu vanobva kuKafutori, vakaparadza vaAvhimu vaiva nemisha yavo yaisvika kuguta reGaza, ndokubva vagaramo ivo).

²⁴“Takazonzi chisumudzirai rwendo rwenyu muyambuke Arinoni. Onai ndaisa Sihoni muAmori mambo weHeshibhoni nenyika yake mumaoko enyu. Mudenhei mumurwise muchitanga kumutorera nyika yake.

²⁵Kubvira nhasi uno ndichaita kuti marudzi ose apanyika avhunduke akutyei. Vose vachazonzwa nezvenyu vachadedera vachikutyai.

²⁶“Ndakatuma nhume kuna Sihoni mambo weHeshibhoni tiri kurenje reKedhemoti namashoko orugare okuti,

²⁷‘Tibvumireiwo kuti tipfuure nomunyika menyu. Tichangoramba takati tande nenzira chete. Hatimbotsaukiri kurudyi kana kuruboshwe.

²⁸Zvokudya zvedu tichatoita zvokutenga nemari kwamuri, kana mvura yokuti tinwe tichatoita yokutenga nemari kwamuri. Tibvumireiwo kutsika nomunyika menyu

²⁹sezvatakaitirwa navana vaEsau vagere kuSeiri, nevaMoabhu vagere kuAru kusvikira tayambuka Jorodhani tichindopinda munyika yatinopiwa naTenzi Mwari wedu.’

³⁰“Asi Sihoni mambo weHeshibhoni akatirambidza kutsika nomo nokuti Tenzi Mwari wedu akamusindimadza akamuomesa mwoyo wake kuti amuise mumaoko enyu sezvaari nhasi.

³¹“Tenzi akati kwandiri, ‘Chionai, ndava kuisa Sihoni nenyika yake mumaoko enyu. Chitangai kutora nyika yake muiite yenyu.’

³²Ipapo Sihoni akativinga nevanhu vake vose vakatirwisa paJahazi.

³³Asi Tenzi Mwari wedu akamuisa mumaoko edu tikamukurira navanakomana vake navanhu vake vose.

³⁴Takatora maguta ake ose panguva iyoyo tikanyatsoparadza maguta ose navarume navakadzi navapwere. Hakuna kunyange nomumwe wavo watakasiya ari mupenyu.

³⁵Mombe chete ndidzo dzatakatora sechinhu chedu isu chokupamba nezvinhuwo zvokuzogovana zvomumaguta atakatora.

³⁶Kubvira kuguta reAroero riri nechokumucheto webani reArinoni neguta riri munyasi morukova imomo kundosvika kuGireadhi, kwakanga kusina maguta akanga ane tsvingo dzakareba zvokuti taitadza kukwira. Tenzi Mwari wedu akaaisa ose mumaoko medu.

³⁷Asi hatina kuenda kunyika yavaAmoni, kana kumapani aJabhoku kana kumaguta enyika yamakomo, kana kuenda kune dzimwe nzvimbo kwatakarambidzwa naTenzi Mwari wedu.