Read Bhaibhiri Idzva rechiShona Kutsinhira Mutemo 20 Bible Online

Kutsinhira Mutemo 20 - Bhaibhiri Idzva rechiShona bible

Kutsinhira Mutemo 20

¹“Kana moenda kuhondo kundorwa navavengi venyu musazoti kana maona mabhiza mazhinji nengoro nehondo yakakura kupinda yenyu mobva mavatya nokuti Tenzi Mwari wenyu akakuburitsai kuIjipiti, anemi.

²Kana moda kumirisana kurwa hondo, mupristi ngaauye azotaura kuvarwi achiti,

³‘Teererai munzwe imi vaIsiraeri! Nhasi uno mava kuenda kundorwa navavengi venyu. Musaite umbwende kana mwoyo wokutya. Regai kubvunda kana kuvazeza

⁴nokuti Tenzi Mwari wenyu ndiye ari kuenda nemi kundokurwisirai vavengi venyu achiita kuti muvakunde.’

⁵“Vatungamiriri vehondo vanozoti, ‘Pane munhu here akavaka imba yaasati aturira kuna Mwari? Ngaadzokere kuimba yake angadaro akafa muhondo iyi imba yake ikatozoturirwa nomumwewo munhu kuna Mwari.

⁶Pane munhu here akasima munda wake wamagirepisi aasati adya michero yayo? Ngaadzokere kumusha angadaro akafa muhondo iyi michero yacho ikazodyiwa hayo nomumwe.

⁷Pane munhu here achangobva mukuroora asati apiwa mudzimai wake? Ngaadzokere kumusha angadaro akafa muhondo iyi, mudzimai wake akazotorwa nomumwe murume.’

⁸“Vatungamiriri vehondo ngavazobvunzawo varwi vachiti, ‘Pane munhu here ari kutya kana ane ruzazu? Ngaadzokere kumusha nokuti angazadze vamwe mweya woumbwende.’

⁹Kana vatungamiriri vapedza kutaura mozosarudza vatungamiriri vezvikwata zvakasiyana-siyana zvavarwi.

¹⁰“Kana masvika paguta romoda kurwisa tangai mambovapa mukana wokuti muwirirane navo murege kurwa.

¹¹Kana vada zvokuwirirana nemi, vakakuzarurirai misuo mikuru yeguta ravo, vanhu vose veguta iroro vatova varanda venyu, vachakushandirai chibharo.

¹²Asi kana vakaramba kuwirirana nemi, vakada zvehondo nemi kombai guta ravo murigaririre.

¹³Kana Tenzi Mwari wenyu aisa guta iroro mumaoko menyu urayai vanhu vechirume vose vemo nebakatwa.

¹⁴Asi vakadzi navana nemombe nezvimwe zvose zvomugutamo pamwechete nezvose zvaunenge wapamba, tora zvako. Idya zvako upfumi hwaunenge watorera vavengi vako vakaiswa mumaoko mako naTenzi Mwari wako.

¹⁵Izvozvo ndizvo zvauchaita namaguta anenge ari kure kure newe asiri amarudzi avanhu vokuno.

¹⁶“Kana zviri zvemaguta amarudzi avanhu vomunyika yauri kupiwa naTenzi Mwari wako kuti ive yako, usambosiya zvako kana chinhu chinofema chiri chipenyu.

¹⁷Paradza zvokuparadza chaizvo vanhu ava vanoti: vaHiti nevaAmori nevaKanani nevaPerizi nevaHivhi nevaJebhusi sokuudzwa kwawakaitwa naTenzi Mwari wako.

¹⁸Izvozvo kunenge kuri kuitira kuti varege kuzokudzidzisa maitiro ose avo anosemesa avanoita pakunamata vamwari vavo ukazotadzira Tenzi Mwari wako.

¹⁹“Kana mukakomba guta, mukarigaririra kwenguva ndefu muchirirwisa muchida kurikurira, musateme miti yaro nokuti munogona kudya michero yayo. Regai kuparadza miti. Ko miti ndovanhu here vamungakomberane kurwisa?

²⁰Asi miti yaunoziva kuti haidyiwi ndiyo yaungaparadze uchiitemera kuvaka matanho okurwisa nawo guta raunenge uchirwisana naro kudzamara warikurira.