Read Bhaibhiri Idzva rechiShona Kutsinhira Mutemo 21 Bible Online

Kutsinhira Mutemo 21 - Bhaibhiri Idzva rechiShona bible

Kutsinhira Mutemo 21

¹“Ngatiti munyika yauri kupiwa naTenzi Mwari wako kuti ive yako mowanikwa chitunha chomunhu akaurayiwa chiri musango pasingazikanwi munhu akamuuraya,

²vakuru vakuru venyu navatongi ngavauye vaere kubvira pane chitunha kuenda kumaguta ose ari pedyo nacho.

³Vakuru vakuru vomuguta rinenge riri pedyo nacho kupinda mamwe ose, ngavatore tsiru risina kumboitiswa basa kana kusungwa pajoko.

⁴Vakuru vakuru ivavo ngavaende netsiru racho kubani kukakova kane mvura inoerera kusina kumborimwa kana kudyarwa, vosvikorityorera mutsipa kukakova ikoko.

⁵Vapristi vechiRevhi ngavaendeko nokuti ndivo vakasarudzwa naTenzi Mwari wenyu kuti vamushandire nokukomborera muzita raiye Tenzi. Zvavanenge vatema ivo ndizvo zvinopedza mhosva dzose dzokukakavadzana nedzokupondana.

⁶Ipapo vakuru vakuru vose vomuguta riri pedyo nepakaurayirwa munhu iyeyo ngavashambire maoko avo pamusoro petsiru riya rinenge ratyorwa mutsipa mubani

⁷vachiti, ‘Isu hatizisu takadeura ropa iri, uye isu kana nameso edu kuriona richideurwa.

⁸Tenziwe-e, regereraiwo vanhu venyu vaIsiraeri vamakanunura. Musape vanhu venyu vaIsiraeri mhosva yokudeura ropa romunhu asina mhaka.’ Mhosva yokudeura ropa romunhu ngairege kuva pavari.

⁹Naizvozvo munobva mashamba mhosva yokudeura ropa romunhu asina mhaka mukati menyu nokunge maita zvakanaka zvinofadza Tenzi.

¹⁰“Kana ukaenda kuhondo kundorwa navavengi vako, Tenzi Mwari wako akaisa vavengi vako mumaoko ako ukavatapa,

¹¹kana ukaona mukadzi ane chimiro chakanaka pakati penhapwa idzodzo waungade kuroora,

¹²enda naye kumba kwako. Ngaaveure vhudzi rake, achekewo nzara dzake,

¹³abvise hanzu yake yaakanga akapfeka paakatapwa. Achaita mwedzi wose achichema baba namai vake agere mumba mako, wozobva wopinda naye mumba, iwe wova murume wake iye achivawo mukadzi wako.

¹⁴Kana usisamude murege zvake aende kwaanoda. Haubvumirwi kumutengesa nemari kana kumutora somuranda nokuti wakamukanganisa.

¹⁵“Kana murume ane vakadzi vaviri mumwe waanoda nomumwe waasisadi vakamuberekera vana vakomana vaviri dangwe riri rouya waasingadi,

¹⁶pazuva raanogovera vana vake nhaka ngaarege kutora mwana womukadzi waanoda omuti ndiye dangwe achisiya mwana womukadzi waasisadi anenge ariye dangwe.

¹⁷Ngaatore dangwe sedangwe, iye mwana womukadzi waasisade wacho. Ngaaratidze izvozvo nokumupa chikamu chenhaka chakapetwa yezvaanazvo zvose kaviri nokuti ndiye mwana wake waakatanga-tanga kubereka, ane mvumo yokuwana zvose zvoudangwe.

¹⁸“Kana munhu ane mhandupandu netsvuuramuromo yemwana asingateereri baba namai vake kunyange vachimurayira zvavo, iye asingavanzwi,

¹⁹baba namai vake ngavamutore vaende naye kuvakuru vakuru veguta, rake raanogara pasuo raro.

²⁰Ngavataurire vakuru vakuru veguta vachiti, ‘Mwana wedu uyu imhandupandu netsvuuramuromo yomwana, haatiteerere anokara uye chidhakwa.’

²¹Varume vose vomuguta rake ngavamuteme namabwe afe. Nokudaro muchabvisa huipi hwakadai pakati penyu zvokuti vaIsiraeri vose vachazvinzwa vakatya.

²²“Kana munhu apara mhosva inokodzera rufu, imi mukamuuraya mukazomuturika pamuti,

²³chitunha chake ngachirege kurara usiku hwose chiripo. Chivigei zuva rakarero nokuti munhu anenge aturikwa pamuti anenge ashorwa zvakanyanyisisa, naTenzi. Regai kun'oresa nyika yenyu yamuri kupiwa naTenzi Mwari wenyu kuti ive nhaka yenyu.