Read Bhaibhiri Idzva rechiShona Kutsinhira Mutemo 23 Bible Online

Kutsinhira Mutemo 23 - Bhaibhiri Idzva rechiShona bible

Kutsinhira Mutemo 23

¹“Hakuna munhurume ane zvombo zvake zvakakuvadzwa kana zvakachekwa anobvumirwa kuva nhengo yesangano raTenzi.

²“Mwana womudondo haabvumirwi kuva nhengo yesangano raTenzi, iye kana vana vake kudzamara kuchizvarwa chake chechigumi.

³“Hakuna muAmoni kana muMoabhu anobvumirwa kuva nhengo yesangano raTenzi narini wose, iye kana vana vake kusvikira kuchizvarwa chake chechigumi

⁴nokuti havana kukuchingurai nechokudya kana nemvura yokunwa pamaibva kuIjipiti, uye nokuti vakakudaidzirawo Bhiriamu mwanakomana waBheori wokuguta rePetori riri kuMesopotamia kuzokurengererai rushambwa.

⁵Asi Tenzi Mwari wako haana kuteerera Bhiriamu, akasandura kurengererwa rushambwa ikoko akaita kuti kuve chikomborero nokuti Tenzi Mwari wako akakuda.

⁶Usambotsvaka kuwirirana navo kana kuvabatsira muupenyu hwako hwose narini wose.

⁷“Usashore muEdhomu nokuti ihama yako. Usashore muIjipiti nokuti iwe wakambovawo mutorwa munyika yake.

⁸Vana vavo vechizvarwa chechitatu, ndivo vanozobvumirwa zvavo kuva nhengo yesangano raTenzi.

⁹“Kana maenda kundorwa navavengi venyu muri pamusasa muzvichengetedze imi pachenyu kuzvinhu zvakaipa.

¹⁰Kana pakati penyu pane mumwe akan'ora nokuzvirotera anofanira kundogara kunze kwomusasa amborega kupindamo.

¹¹Kana ava manheru anofanira kushamba muviri. Kana zuva ravira, ngaachidzokera zvake mumisasa.

¹²“Iva nenzvimbo kunze kwomusasa kwokuendera.

¹³Pazvombo zvokuhondo zvaunenge unazvo unofanira kuvawo nomuchogodo wokucheresa kuitira kuti paunoenda kunze, ndowaunochera nawo chikomba, kana wapedza zvaunoita wozofusira.

¹⁴Ndinodaro nokuti Tenzi Mwari wenyu anofamba-famba mumusasa wenyu kuti akununurei achiisa vavengi venyu mumaoko menyu. Naizvozvo musasa wenyu ngaugare wakachena kuti asazoona tsvina dzakadaro pakati penyu akazokufuratirai.

¹⁵“Kana muranda akatiza tenzi wake, achizopotera kwamuri musamudzosere kuna tenzi wake.

¹⁶Ngaagare nemi kwaanenge asarudza chero muguta ripi zvaro renyu kwaanoda zvake. Regai kumubata zvakaipa.

¹⁷“Ngakurege kuva nomuIsiraeri anova mhombwe kana chifeve chetemberi.

¹⁸Kunyange mari yamunobvisa kuripa zvemhiko dzenyu kuimba yaTenzi Mwari wenyu, regai kuiunza ichibva pamari inowanikwa noufeve kana nezvowumbwa uhwu hwemhombwe nokuti zviito izvozvi zvinosemesa pana Tenzi Mwari wenyu zvose zviri zviviri.

¹⁹“Kana wakweretesa mumwe wako muIsiraeri chinhu, usamuripise mubereko, ingave mari kana chokudya kana chimwewo chinhu chaungangomukweretesa.

²⁰Kana ari mutorwa ungamuripise zvako mubereko pane zvaunomukweretesa, asi mumwe wako muIsiraeri usamuripise mubereko kuitira kuti Tenzi Mwari wako akukomborere pane zvose zvaunoita munyika yauri kundotora kuti ive yako.

²¹“Kana watsidzira Tenzi Mwari wako mhiko usazorega kuita zvaunenge watsidza nokuti Tenzi Mwari wako anotarisira kuti utoita chete zvawakatsidza ukarega kuzviita chatova chitadzo.

²²Asi ukarega kupika mhiko hachisi chitadzo kwauri.

²³Nyatsoita nomazvo zvaunenge wataura nomuromo wako nokuti wakatsidzira Tenzi Mwari wako mhiko nomuromo wako pasina kumanikidzwa.

²⁴“Kana ukapinda nomumunda womumwe wako wemagirepisi, idya zvako magirepisi pamadiro ugute, asi rega kuisa mamwe mumudziyo wokutakurira.

²⁵Kana ukapinda nomumunda womumwe wako uchiine mbesanwa dzisati dzakohwiwa tanha zvako hura dzadzo namaoko asi usazoita zvokumweta nejeko.