Read Bhaibhiri Idzva rechiShona Kutsinhira Mutemo 25 Bible Online

Kutsinhira Mutemo 25 - Bhaibhiri Idzva rechiShona bible

Kutsinhira Mutemo 25

¹“Kana vanhu vaviri vakaitirana nharo, vakaenda kudare, dare rotaura kuti, ‘Uyu ane mhosva, uyu haana mhosva,’

²nyakubatwa nemhosva onzi ngaarohwe, mutongi achamuti azvambarare pasi arohwe shamhu dzinokodzerana nemhosva yake iye aripo.

³Angarohwe shamhu makumi mana asi ngadzirege kupfuura ipapo, nokuti kana akarohwa shamhu dzinopfuuridza ipapa ingadaro hama yako ikafumurwa iwe uchiona.

⁴“Usaise mombe matomhu paunenge uchiipurisa mbesanwa.

⁵“Kana vanakomana vomunhu mumwe vagere pamwechete, mumwe obva afa asina mwana mukomana, chirikadzi yaanosiya haifaniri kuroorwa nomutorwa. Muramu wake ngaamugarire nhaka achengetedzewo murao wenhaka.

⁶Mwana mukomana waanotanga kubereka achapiwa zita romuchakabvu kuitira kuti rirege kutsakatika muIsiraeri.

⁷Kana muramu uya asingadi kugara nhaka mukadzi womukoma kana munun'una wake ngaaende kuvakuru vakuru kuzambara kundomhan'ara achiti, ‘Muramu wangu ari kuramba kumutsiridza zita rehama yake muIsiraeri muno. Ari kuramba kuita basa rake rokundigarira nhaka.’

⁸Ipapo vakuru vakuru vomuguta rake ngavamudaidze vataure naye. Kana akarambisisa achiti, ‘Handidi kutora mukadzi iyeyo.’

⁹Mukadzi uya ngaaende kumuramu wake omubvisa shangu yake, omupfira mate kuuso, vakuru vakuru varipo obva ati, ‘Izvi ndizvo zvinoitwa kumunhu asingadi kuti musha womukoma kana munun'una wake ukure.

¹⁰Zita rake muIsiraeri muno richanzi; Imbayanyakubviswashangu.’

¹¹“Kana varume vaviri vachirwisana, mukadzi womumwe akauya kuzokutsira achibatsira murume wake, akakata zvombo zvomumwe wacho,

¹²dimurai ruoko rwomukadzi iyeyo musingamunzwiri tsitsi.

¹³“Usave nezviereso zviviri zvine mwero yakasiyana, zvinoti chimwe chikuru chimwe chiduku muchijosaka chako.

¹⁴Mumba mako usave nezviereso zviviri zvine mwero isina kuenzana zvinoti chimwe chikuru chimwe chiduku.

¹⁵Unosungirwa kuva nezviereso nezvokupimisa zvechokwadi zviri pamwero kuti mazuva ako awande munyika yauri kupiwa naTenzi Mwari wako.

¹⁶Ndinodaro nokuti Tenzi Mwari wako haambodi zvake vanhu vanoita izvozvi zvoujarijari hwokubiridzira.

¹⁷“Rangarira zvakaitwa naAmareki kwamuri muri murwendo rwokubva kuIjipiti.

¹⁸Zviya zvaakakuvinga panzira nehondo akakufuta neshure pawakanga waneta warukutika, akauraya vamwe venyu vose vakanga vaneta vasaririra shure asingambotya zvake Mwari.

¹⁹Naizvozvo, kana Tenzi Mwari wako azokupa zororo kuvavengi vako vose vari munharaunda yenyika yako yauri kupiwa naTenzi Mwari wako kuti ive yako, tsakatisa rudzi rwaAmareki pasi pano, usakanganwe.