Read Bhaibhiri Idzva rechiShona Kutsinhira Mutemo 26 Bible Online

Kutsinhira Mutemo 26 - Bhaibhiri Idzva rechiShona bible

Kutsinhira Mutemo 26

¹“Zvino kana uchinge wasvika munyika yaunopiwa naTenzi Mwari wako kuti ive yako, waitora wagaramo,

²pamhando dzose dzembesa dzako kana odzikohwa unofanira kutora dzokutanga dzacho uise mutswanda uende nadzo kunzvimbo ichasarudzwa naTenzi Mwari wako kuisa zita rake kuti rivepo,

³uende kumupristi anenge ariko panguva iyoyo uti, ‘Nhasi uno ndinoreva pachena kuna Tenzi Mwari wenyu kuti ndakakwanisawo kuva munyika ino iyi makatsidzirwa madzitateguru edu naTenzi kuti tinozopiwa.’

⁴“Mupristi ngaatambire tswanda iyoyo andoigadzika paatari yaTenzi Mwari wako.

⁵Pana Tenzi Mwari wako ipapo taura uchiti, ‘Baba vangu vaiva muAramu, vaiva munhu aingoti apa garei tamei apa garei tamei, vakaenda kuIjipiti vakagarako nemhuri yavo yavanhu vashomashoma. Vari ikoko vakazova rudzi rukuru, runa simba, runa vanhu vazhinji.

⁶VaIjipiti vakatibata zvakaipa vakationesa nhamo vachitiitisa basa rechibharo.

⁷Takazochema kuna Tenzi Mwari wamadzibaba edu, Tenzi ndokunzwa kuchema kwedu, ndokuonawo kutambura kwedu nomutoro wedu webasa nokusabatwa zvakanaka kwataiitwa.

⁸Tenzi akatiburitsa muIjipiti nesimba rake guru namabasa ake makuru anotyisa nezviratidzo nezvishamiso.

⁹Akatiunza kunzvimbo ino akatipa nyika ino, nyika yakanaka yomukaka nouchi.

¹⁰Zvino, hedzinoi mbesa dzokutanga dzomumunda wamakandipa imi Tenzi dzandauya nadzo.’ Unofanira kudziisa pana Tenzi Mwari wako upfugamire Tenzi Mwari wako ipapo.

¹¹Iwe nemhuri yako nomuRevhi nomutorwa pemberai muchifarira zvinhu zvawakapiwa naTenzi Mwari wako.

¹²“Gore rechitatu roga roga, igore rokubvisa chegumi chezvose zvaunowana uchipa muRevhi nomutorwa nenherera nechirikadzi kuti dzidye dzigute mumaguta enyu. Kana wapedza

¹³enda undotaura pana Tenzi Mwari wako kuti, ‘Ndatora mumba mangu chikamu chamakatema kuti ndechenyu ndikapa muRevhi nomutorwa nenherera nechirikadzi sokundirayira kwamakaita, handina kumbodarika kana kukanganwa mirao yenyu.

¹⁴Handina kudya chegumi pandaingunochema nhamo yokufirwa, kana kuchibata pandainge ndan'ora, kana kuchipira kumidzimu. Ndakateerera izwi raTenzi Mwari wangu ndikaita zvose sokundirayira kwamakaita.

¹⁵Titarireiwo muri kudenga, kumusha wenyu mutsvene mukomborere vanhu venyu vaIsiraeri nenyika iyi yakanaka yomukaka nouchi yamakatipa sokutsidzira kwamakaita madzibaba edu.’

¹⁶“Nhasi uno Tenzi Mwari wako anoti teerera mitemo nemirao iyoyi, uichengete nomwoyo wako wose nomweya wako wose.

¹⁷Nhasi wabvuma zvataurwa naTenzi kuti ndiye Mwari wako uye kuti uchafamba munzira dzake, uchichengeta zvirevo nemitemo nemirao yake, nokuteerera izwi rake.

¹⁸Tenzi abvumawo nhasi kuti imi ndimi vanhu vake chaivoivo sokukutaurirai kwaakaita uye kuti muchachengeta mitemo yake yose.

¹⁹Akati achakusimudzirai pamusoro pendudzi dzavanhu dzose dzaakasika. Muchakudzwa, zita renyu rigorumbidzwa, mugova nomukurumbira, imi mugova rudzi rutsvene rwaTenzi Mwari wenyu sokureva kwake.”