Read Bhaibhiri Idzva rechiShona Kutsinhira Mutemo 31 Bible Online

Kutsinhira Mutemo 31 - Bhaibhiri Idzva rechiShona bible

Kutsinhira Mutemo 31

¹Zvino Mosesi akaenderera mberi achitaura mazwi aya kuvaIsiraeri vose

²achiti, “Pari nhasi uno, ndava namakore zana namakumi maviri okuberekwa. Handichakwanisa kumhanya-mhanya nebasa. Tenziwo akanditi, ‘Iwe hauyambuke Jorodhani iyeyu.’

³Tenzi Mwari wenyu pachake achakutungamirirai pakuyambuka. Ndiye achakuparadzirai ndudzi idzodzi kuti muvatorere nyika yavo. Joshuwa ndiye achakutungamirirai sokutaura kwakaita Tenzi.

⁴Tenzi achaita kwavari zviya zvaakaita kuna Sihoni naOgu madzimambo avaAmori nenyika yavo paakavaparadza.

⁵Tenzi achavaisa mumaoko enyu, saka imi itai kwavari zvose zvandakakuudzai kuti muite.

⁶Shingai, mutsunge mwoyo, murege kuvatya kana kuvadedera nokuti Tenzi Mwari wenyu ndiye ari kukuperekedzai, haambokufuratirai kana kukusiyai moga.”

⁷Mosesi akadaidza Joshuwa pamberi pevaIsiraeri vose akamutaurira achiti, “Shinga utsunge mwoyo, nokuti ndiwe wava kuzoenda navanhu ava munyika yakatsidzirwa madzitateguru avo naTenzi kuti vapiwe. Ndiwe uchavabatsira kutora nyika kuti ive yavo.

⁸Tenzi ndiye achakutungamirira, achava newe, haazokufuratira kana kukusiya woga. Usatye kana kuzeza.”

⁹Mosesi akanyora mutemo uyu akaupa vapristi, vaRevhi, vaitakura bhokisi rechitenderano chaTenzi, navakuru vakuru vavaIsiraeri.

¹⁰Mosesi akavati, “Pakupera koga koga kwamakore manomwe, panguva yakatemwa yegore rerusununguko pamazuva makuru amatumba,

¹¹panounganidzana vaIsiraeri vose pana Tenzi Mwari wenyu panzvimbo ichasarudzwa naTenzi, unofanira kuverengera vaIsiraeri vose mutemo uyu vachinzwa.

¹²Unganidza vanhu varume navakadzi navana navatorwa vaunenge unavo mumaguta ako kuti vanzwe, vadzidze kuremekedza Tenzi Mwari wenyu, nokunyatsochengeta zvinorehwa nomutemo uyu.

¹³Uyewo kuti vana vavo vasingauzivi vaunzwe, vadzidzewo kuremekedza Tenzi Mwari wenyu mazuva ose amuchagara munyika yamuri kuyambukira kundotora kuti ive yenyu kumhiri kwaJorodhani.”

¹⁴Tenzi akataurira Mosesi achiti, “Chitarisa uone kuti mazuva ako okuti uchifa ava kusvika. Chidaidza Joshuwa muende kutendhe rokusanganira kuti ndimuturire basa.” Mosesi naJoshuwa vakaenda kutendhe rokusanganira.

¹⁵Ipapo Tenzi akazviratidza mushongwe yegore mutendhe iroro. Shongwe yegore iyoyo yakandomira kumusuo wetendhe.

¹⁶Tenzi akataurira Mosesi achiti, “Chinzwa, nguva yako yokuti uchizorora namadzibaba ako, vachakabvu, yava padyo. Asi vanhu ava vachasara vopindwa nounzenza hwokundonamata vamwe vamwari venyika dziri kwavari kundogara mukati madzo. Vachasiyana neni vachityora chitenderano changu chandakaitirana navo.

¹⁷Pazuva iroro ndichavavirukira nehasha dzangu. Ndichavasiya ndovafuratira vagoparadzwa. Nhamo namatambudziko zvichavawira zvokuti vachati, ‘Hatina kuwirwa nenhamo idzi here pamusana pokuti Mwari wedu haachisiri pakati pedu?’

¹⁸Asi ini pazuva iroro ndichanyatsokuvafuratira nokuda kwezvakaipa zvavanenge vaita zvokunamata vamwe vamwari.

¹⁹“Saka zvino chinyora rwiyo urwu, urwudzidzise vaIsiraeri, rugare ruri parurimi rwavo kuti ruve chapupu changu kuvaIsiraeri ivava.

²⁰Ndinodaro nokuti kana ndavasvitsa munyika yakanaka, nyika yomukaka nouchi yandakatsidzira madzibaba avo, vadya vakora vachapanduka votevera vamwe vamwari. Ndivo vavachashandira ini vachindishora zvavo, nokutyora chitenderano changu.

²¹Kana nhamo namatambudziko zvazovamomotera, rwiyo urwu rwuchamira sechapupu changu kwavari nokuti haruzombobva parurimi rwavana vavo. Ndiri kuziva zvangu zvavari kuronga kuita, izvozvi, ndisati ndavayambutsira munyika yandakavatsidzira.”

²²Saka Mosesi akanyora rwiyo urwu pazuva rakarero akarudzidzisa vaIsiraeri.

²³Ipapo Tenzi akaudza Joshuwa mwana waNuni achiti, “Shinga utsunge mwoyo, nokuti ndiwe uchasvitsa vaIsiraeri munyika yandakavatsidzira. Ini ndichava newe.”

²⁴Kuzoti Mosesi anyatsopedza kunyora bumbiro rose mutemo uyu mubhuku,

²⁵akataurira vaRevhi vaitakura bhokisi rechitenderano chaTenzi achiti,

²⁶“Torai bhuku romutemo iri muriise parutivi pebhokisi rechitenderano kuti rigarepo sechapupu kwamuri.

²⁷Ndinodaro nokuti ndinoziva umhandupandu hwenyu, noundambakuudzwa hwenyu. Zvamakatopandukira Tenzi ndichiri mupenyu nemi kudai kokutozoti ndafa!

²⁸Ndiunganidzirei vakuru vakuru vose vamadzinza enyu, nemakurukota enyu kuti ndivaudze mashoko iwaya vachizvinzwira, ndiite kuti denga nenyika zvive chapupu changu kwavari.

²⁹Ndinozviziva ini kuti kana ndafa muchasara zvenyu moipa zvokuipa zviya, muchitsauka munzira yandakakuudzai. Asi pamazuva achauya nhamo dzichakuwirai nokuti munenge maita zvakaipa kuna Tenzi muchimushatirisa netwamunobata namaoko enyu.”

³⁰Mosesi akadetemba mazwi erwiyo urwu kusvikira apedza, gungano rose revaIsiraeri richizvinzwa.