Read Bhaibhiri Idzva rechiShona Kutsinhira Mutemo 32 Bible Online

Kutsinhira Mutemo 32 - Bhaibhiri Idzva rechiShona bible

Kutsinhira Mutemo 32

¹Akati, “Matenga we-e teyai nzeve munzwe ndimbotaura newewo nyika teerera unzwe mazwi omuromo wangu.

²Chidzidziso changu chichaita zvokunaya semvura, nhauro yangu ichinyava pasi sedova, zviite semvura iri kunaya paruswiswi, serupfunhavachembere pazvimerwa zvose,

³nokuti ndava kuparidza zita raTenzi, nokupembedza ukuru hwaMwari wedu.

⁴Iye iDombo chairo kusimba! Pabasa rake hapana chinganatsiridzwe nokuti maitiro ake ane ruenzaniso. Mwari ndiMwari anotendeseka asina chakaipa maari; ndiMwari akarurama, Mwari ari pachokwadi.

⁵Asi imi hamuna kutendeseka kwaari, hamukodzeri kuva vanhu vake.

⁶Ko ndomatsiviro amungaite Tenzi iwaya here? Imi mazipenzi avanhu, vanhu vasina pfungwa. Ko haasi iye here baba vako, vakakusika? Haasi iye here akaita kuti muve rudzi?

⁷Rangarira mazuva aye ekare, uyeuke makore aye ezvizvarwa nezvizvarwa; bvunza baba vako, vachakurondedzera, ubvunzewo vechikuru-chikuru, vachakutsanangurira.

⁸Wokumusorosoro paaigovera ndudzi nhaka dzadzo, achipa rudzi norudzi nyika nomuganho wayo; aipa maererano nouwandi hwavatumwa vaMwari.

⁹Asi iye Tenzi mugove waakazvisarudzira vanhu vake, Jakobho sorudzi, ndiye nhaka yake.

¹⁰Akamuwana munyika yegwenga, ari murenje riya rinongova maungira oga; Akavaunganidza, akavariritira, achivachengeta sezai regondo.

¹¹Segondo rinogaririra manyana aro, richibhururuka zvaro nechepamusoro pedendere, richitambanudza mapapiro aro, nokutakura manyana aro,

¹²Tenzi pachake akamutungamirira, pasina vamwe vamwari.

¹³Akamupa nyika iri pakakwirira, akadya zvirimwa zvomuminda; akamuita kuti asvete zvake uchi hwomudombo, achiwana mafuta parukangarahwe.

¹⁴Kumombe, mukaka wakakora, kune zvimwe zvipfuwo, mukaka chete, vaine hwayana nehondohwe dzakakora, nemombe nembudzi dzokuBhashani, nekoroni ine hura dzakasvika chaizvo, wakanwa mhanga yewaini.

¹⁵Asi Jeshuruni, iwe Isiraeri, wakati wakora, wakatanga kupfacha. Wakati wakora, wafuta zvokupenya muviri, wakafuratira Mwari akakusika ukatsvinyira Dombo, ruponeso rwako.

¹⁶Zvokuva navamwe vamwari zvakamutsa shanje yaMwari, zvakaipa zvavakaita zvakanyandura hasha dzaMwari.

¹⁷Vakapira zvibayiro kumweya yakaipa, kumweya yakaipa isiri mwari kune vamwari vavasingamboziva; vamwari vanonzi vachangosvikawo mazuva ano vasina kana kumboremekedzwa namadzibaba avo.

¹⁸Wakarega kuita hanya naiyeyu Dombo akakubereka, ukakanganwa zvako Mwari akakuumba.

¹⁹Tenzi akazviona akabva achekana ukama navo, nokuti akashatiriswa navana vake vakomana navasikana,

²⁰akati regai ndivafuratire, ndione kuti pavo pachaperera papi; nokuti chizvarwa chakapanduka, vana vasingatendeseki.

²¹Vakandipa kuitira shanje zvinhu zvisiri mwari, vakavirutsa hasha dzangu navamwari vavo vokuveza. Saka ndichaitawo kuti vave neshanje navanhu vasiri rudzi. Ndichavashatirisa norudzi rwamadzenga.

²²Hasha dzangu dzichaita somoto, uchapisa kusvikira pasi pasi munzvimbo yavakafa. Ucharoromesa nyika nezvinhu zvayo. Uchatungidza moto paugaro hwamakomo.

²³Ndichaita kuti nhamo dzivamomotere, miseve yangu ichaperera pavari.

²⁴Vachasara vaondoroka nenzara, vachaparadzwa nedenda rokupisa muviri. Vachapera nezvirwere zvinouraya, ndichavatumira zvikara zvinoruma; nenyoka dzinozvongonyoka napasi dzine uturu.

²⁵Pachena zvapo chaipo bakatwa, richaita kuti vapinde nhamo mudzimba umu kuchingova kutya koga koga. Nhamo iyoyo haina waichasiya ari mupenyu, jaya kana mhandara, mucheche nowachena musoro.

²⁶Ndakazviti regai ndivamwararitsire kure kure, pasave naanovayeukazve mukati mavanhu.

²⁷Asi ndakazeza zvangu kuzvikudza kwaizoita vavengi vavo, vofunga kuti, ‘Takavakurira nesimba redu pachedu.’ Vachiti, ‘Tenzi haasiri iye akaita zvose izvi, asi kuti isu nesimba redu ndisu takakurira.’

²⁸“Nokuti vanhu ivava rudzi rwakatenderera musoro, vanhu vasinganzwisisi.

²⁹Dai vakachenjera vangadai vakanzwisisa izvi, vangadai vakaziva kuti izvozvi zvichavasvitsa kupi.

³⁰Ko munhu mumwe angadzinge sei chiuru chavanhu? Ko vanhu vaviri vangakwanise kudzinga gumi rezviuru zvevanhu here? Zvingaitike chete kana iye Dombo ravo avaisa mumaoko evavengi vavo; uyewo kana Tenzi avaramwira mumaoko avavengi vavo.

³¹Nokuti iye dombo ravo akasiyana naMwari Dombo redu kana vavengi vedu vanotonyatsozviona.

³²Vanhu ivava vakaromba mbeu dzomugirepisi younzenza kuSodhomu, neyokuminda yeGomora. Magirepisi avo muchetura chaiwo, zvisumbu zvemagirepisi avo indye chaiyo kuvava.

³³Waini yavo ichepfu yenyoka chaiyo, uturu chaihwo hwemhakure.

³⁴Heya munoti izvozvi handina kuzvichengeta mudura remwoyo wangu here, ndikanyatsozvipfundira?

³⁵Kutsiva ndokwangu, kudzosera ndokwangu. Nguva ichasvika yokuti rutsoka rwavo rwutsvedzemuke, nokuti zuva renjodzi yavo rava kusvika, kuparara kwavo kuchaitika nokukurumidza.

³⁶Asi Tenzi achanunura vanhu vake, achanzwira tsitsi varanda vake, vakatapwa kana vasina paanenge aona kuti varukutika havachisina simba, havachaziva chokuita.

³⁷Ndopaachati, ‘Ko vamwari vavo varipiko, dombo ravoka ravaipotera naro;’

³⁸vamwari vaidya mafuta ezvibayiro zvavo, vachinwa waini yemipiro yezvokunwa? Ngavachisimukaka vakubatsire, ngavachikudziviriraka!

³⁹Zvino chizivai kuti Ini Iyeni pano ndini iye. Hakuna mumwe mwari kunze kwangu. Ndini ndinouraya, uye ndini ndinopa upenyu. Ndinokuvadza uye ndinoporesa, hakuna anganunure chinhu chiri mumaoko angu.

⁴⁰Ndinosumudza ruoko rwangu kudenga ndichiti, ‘Chokwadi ndinopika neni pachangu, ini Mwari mupenyu.’

⁴¹Pandicharodza bakatwa rangu rinohwituka kupenya, ndinenge ndongoda kuona kuti ruenzaniso rwaitwa here! Ndichatsividza vavengi vangu, ndigoranga vanondivenga.

⁴²Ndichaita kuti miseve yangu iyerere ropa, renhapwa nerevanenge vaurayiwa, vakuru vakuru vanondivenga, bakatwa rangu richivaita kanyama kanyama.

⁴³Imi ndudzi dzose pemberai mufare navanhu vaMwari, nokuti achatsividza ropa ravaranda vake. Achatsiva vavengi vake, nokuchenura nyika yavanhu vake.”

⁴⁴Mosesi akauya akadetemba mazwi ose erwiyo urwu vanhu vachizvinzwa, aiva naJoshuwa mwanakomana waNuni.

⁴⁵Mosesi paakapedza kutaura mashoko ose aya kuvaIsiraeri vose

⁴⁶akati, “Pfundirai mumwoyo yenyu mashoko ose aya andakupai nhasi uno kuti muti vana venyu vanyatsochengeta zvose zvinorehwa nomutemo uyu.

⁴⁷Ndinodaro nokuti haasi mashoko asina maturo, asi ndiwo upenyu hwenyu. Mashoko iwaya ndiwo achakuraramisai kwenguva ndefu munyika yamuri kuyambukira Jorodhani kundotora kuti ive yenyu.”

⁴⁸Musi iwoyo Tenzi akataurira Mosesi achiti,

⁴⁹“Chienda kumakomo eAbharimu ari munyika yeMoabhu, undokwira mugomo reNebho, rakatarisana neJeriko, uone nyika yeKanani yandiri kupa vaIsiraeri kuti ive yavo.

⁵⁰Uchandofira ikoko mugomo raunenge wakwira, uchienda zvako kune hama dzako vashakabvu, sezvakaita mukoma wako Aroni akafira mugomo reHoru akaenda kwakaenda vamwe vokwake,

⁵¹nokuti hamuna kuvimba neni pane vanhu paye pamvura yeMeribha kuKadheshi murenje reZini. Hamuna kundieresa pakati pevaIsiraeri.

⁵²Naizvozvo uchaona nyika iyoyo iri mhiri, asi hausiri kuzondopinda munyika yandiri kupa vaIsiraeri.”