Read Bhaibhiri Idzva rechiShona Kutsinhira Mutemo 33 Bible Online

Kutsinhira Mutemo 33 - Bhaibhiri Idzva rechiShona bible

Kutsinhira Mutemo 33

¹Ichi ndicho chikomborero chakakumbirirwa vaIsiraeri naMosesi munhu waMwari asati afa. Akati;

²“Tenzi akabva kuSinai akanyuka patiri achibva Seiri. Akazviratidza ari paGomo reParani. Akanga ane zviuru nezviuru zvevatsvene, kurudyi kwake kuine rimi romoto.

³Honguka Tenzi anoda vanhu vake. Vose vatsvene vaiva muruoko rwake, saka vakatevera mutsoka dzake, zvokuita vachitozvitaurirwa nemi.

⁴Mosesi akatipa mutemo, ndiyo nhaka yemhuri yaJakobho.

⁵Naizvozvo Tenzi akava mambo muIsiraeri, muJeshuruni,[4] paye pakaungana vatungamiriri vavanhu, pamwechete namadzinza aIsiraeri.

⁶“Rubheni ngaararame arege kufa, kunyange vanhu vake vachiverengeka zvavo.”

⁷Akakomborera Judha achiti, “Tenzi inzwai waro chichemo chaJudha. Mumuunze kwakare kuvanhu vokwake. Murwirei imi Tenzi noruoko rwenyu.”

⁸Revhi akamukomborera achiti, “Ipai Tumimu neUrimu kuvaRevhi, vanhu venyu vakatendeka vamakaedza paMasa vamakaita mapitse navo pamvura yepaMeribha.

⁹Pakuchengeta chirevo chenyu nechitenderano chenyu havana kumbokatara kuti ava ndiamai kana baba vavo kana zvokuti ava vakoma kana vanun'una vavo kunyange vana vavo chaivo.

¹⁰Vachadzidzisa mhuri yaJakobho mirao yenyu, vachidzidzisa mhuri yaIsiraeri mutemo wenyu. Vachapisira rusenzi imi Mwari, vachikupirai chibayiro chinopiswa chose zvacho paatari.

¹¹Tenzi komborerai dzinza rake kuti risimbe, mufadzwe nebasa ramaoko ake; mutyore misana yavavengi vake, vavengi vake varege kumukazve.”

¹²Akakomborera Bhenjamini achiti, “Iri ndiro dzinza raTenzi repamwoyo, muswerandakaringa wake chaiye. Anomuchengeta sezai regondo, asingambosuduruki zvake pakati pavo.”

¹³Akakomborera Josefi achiti, “Nyika yake ngaikomborerwe naTenzi, matenga ngaamupe mvura inonaya zvakanaka, neimwe inobvinina ichibva pasi.

¹⁴Ngaawane zvose zvakanaka zvinoibviswa nezuva, nezvinoibva mwedzi nomwedzi.

¹⁵Ngaawane gomborero remichero yokutanga mumakomo ekare, zvakanakisisa zvechinyakare.

¹⁶Ngaakomborerwe nezvose zvakanyanya kunaka zvinowanika panyika. Mwoyochena wouya aitaura ari mugwenzi. Makomborero aya ngaadurururukire pana Josefi, nokuti aiva mutungamiriri pakati pavakoma vake.

¹⁷Achava mukono wenzombe pakati pavo, nyanga dzake dzichinge dzenyati, imwe yacho ndizvo zviuru nezviuru zvedzinza raManase, imwe yacho ndiwo mazana akazanirana edzinza raEfuremu; nadzo achatunga marudzi avanhu kusvikira kwakaperera nyika.”

¹⁸Akakomborera Zebhuruni achiti, “Zebhuruni pembera ufare zvako pane zvaunoita, newewo Isakari fara zvako uri pamatendhe ako.

¹⁹Vachakokera ndudzi dzavanhu kugomo, kuzopira zvibayiro zviri pamutemo, nokuti vachawana upfumi huzhinji hwomugungwa, noupfumi hwuzhinji hwakavanzwa mujecha.”

²⁰Akakomborera Gadhi achiti, “Akakomborerwa zvake Gadhi akawana nyika huru! Achagaramo akati hwatata seshumba, achibvambura ruoko nokutsemura dehenya.

²¹Akazvisarudzira pachake nyika yakanakisisa, yakanga yakachengeterwa mutungamiriri wehondo; akauya somutungamiriri wavanhu, achinyatsochengeta zvirevo nemitemo yaTenzi navaIsiraeri.”

²²Akakomborera Dhani achiti, “Dhani mwana weshumba chaiye anoita zvokuuruka achibva kuBhashani.”

²³Akakomborera Nafutari achiti, “Nafutari akagutsikana nomwoyochena waakaitirwa, azere namakomborero aTenzi; gungwa nenyika yokumaodzanyemba ndezvake.”

²⁴Akakomborera Asheri achiti, “Asheri ngaakomborerwe kupfuura mamwe madzinza ose. Ngaave wapamwoyo kuvakoma navanun'una vake aite mafuta okutsika netsoka.

²⁵Zvihuri zvapamisuo yako ngazvive zvesimbi nezvomundarira kusimba, urarame upenyu hwako hwose uri chirambakusakara.

²⁶Chinzwa Isiraeri, iyewe Jeshuruni, hakuna mumwe akaita saMwari anofamba nomumatenga, anofamba nechiremera chake nomumakore kuzokubatsira.

²⁷Mwari, Nyakugaraaripo ndiye bako rako, anokutakura mumaoko ake nokusingaperi. Anofanokudzingira vavengi vako achiti, ‘Vaparadze.’

²⁸Saka Isiraeri agere zvake murugare oga, vana vaJakobho vagere zvavo pavo voga, munyika yomaguta embesa newaini, ina matenga anonayisa dova.

²⁹Zvako iwe Isiraeri wakakomborerwa! Ndianiwo zvake angaenzaniswe newe, rudzi rwakaponeswa naTenzi ndiye nhoo yako inokubatsira, ndiye bakatwa rinokuita kuti ukunde. Vavengi vako vachauya vachiteterera kwauri. Nzvimbo dzavo dzakatunhumara dzokuteurira uchaita zvokudzitsikirira zvako.”