Read Bhaibhiri Idzva rechiShona Kutsinhira Mutemo 34 Bible Online

Kutsinhira Mutemo 34 - Bhaibhiri Idzva rechiShona bible

Kutsinhira Mutemo 34

¹Mosesi akabva mumapani eMoabhu akaenda kumakomo eNebho akandokwira pamusoro peGomo rePisiga rakatarisana neJeriko. Tenzi ndokumuratidza nyika yose iyoyo kubvira kuGireadhi kusvikira kwaDhani,

²naNafutari yose nenyika yose yaEfuremu naManase, nenyika yose yaJudha kusvikira kuGungwa rokumadokero

³nokuNegevhu, nebani reJeriko, guta remiti yemirara kudzamara kuZoari.

⁴Tenzi akamutaurira achiti, “Ndiyoyi nyika yandakatsidzira vanaAbhurahamu naIsaki naJakobho ndichiti, ‘Ndichaipa kuzvizvarwa zvako. Ndati uione nameso ako, asi hausiri kuzoyambukirako.’ ”

⁵Naizvozvo Mosesi muranda waTenzi akafira ikoko munyika yeMoabhu sokureva kwaTenzi.

⁶Akamuviga mubani munyika yeMoabhu pakatarisana neBhetipeori. Asi hakuna anoziva nzvimbo yaakavigwa kusvikira nhasi uno.

⁷Mosesi akafa ava namakore zana namakumi maviri. Muviri wake wakanga uchakagwinya, maziso ake achinyatsoona zvakanaka.

⁸VaIsiraeri vakachema Mosesi kwamazuva makumi matatu mumapani eMoabhu kusvikira nguva yokuchema nhamo yorufu rwake yapera.

⁹Zvino Joshuwa mwanakomana waNuni aiva azere nomweya woungwaru nokuti Mosesi akanga aisa maoko ake pamusoro wake. VaIsiraeri vaimuteerera vachiita zvakanga zvataurirwa Mosesi naTenzi.

¹⁰Hakuna kana kuzomuka muporofita muIsiraeri akaita saMosesi aizivana naTenzi uso nouso,

¹¹kana totarisa zviratidzo nezvishamiso zvakatumwa Mosesi naTenzi kundoita munyika yeIjipiti kuna Farao, nokumakurukota ake, nokunyika yake yose.

¹²Uye kana totarisawo masimba makuru aaiva nawo namabasa makuru anotyisa akaitwa naMosesi vaIsiraeri vose vachiona.