Read Bhaibhiri Idzva rechiShona Kutsinhira Mutemo 6 Bible Online

Kutsinhira Mutemo 6 - Bhaibhiri Idzva rechiShona bible

Kutsinhira Mutemo 6

¹“Izvi ndizvo zvirevo nemitemo nemirao yandakataurirwa naTenzi Mwari wenyu kuti ndikudzidzisei mugoichengeta munyika yamava kuyambukira kundotora.

²Ndinodaro kuitira kuti muremekedze Tenzi Mwari wenyu. Imi navana venyu navazukuru venyu ndinokuudzai kuti muchengete mitemo nemirao yake yose, mazuva ose oupenyu hwenyu kuti mazuva enyu awande.

³Saka imi vaIsiraeri iteererei muichengete, kuti zvikunakirei, muwande zvakanyanya munyika yakanaka yomukaka nouchi sokuvimbisa kwamakaitwa naTenzi Mwari wamadzibaba enyu.

⁴“Teerera unzwe iwe Isiraeri. Tenzi Mwari wedu ndiye Mwari oga.

⁵Ida Tenzi Mwari wako nomwoyo wako wose, nomweya wako wose, nesimba rako rose.

⁶Mitemo iyoyi yandinokuudza nhasi ngaigare mumwoyo mako.

⁷Nyatsoidzidzisa vana vako. Uitaure wataurazve ugere mumba mako, napaunenge uchifamba munzira, napaunenge urere pasi, napaunomuka.

⁸Uisungirire paruoko rwako chive chiratidzo, uisungirirewo pahuma yako netsungare.

⁹Inyore pamagwatidziro emba yako napamisuo yako mikuru.

¹⁰“Tenzi Mwari wako paachazenge akuunza munyika yaakatsidzira kumadzibaba ako vanaAbhurahamu naIsaki naJakobho kuzokupa nyika ina maguta makuru akanaka amusina kumbovaka

¹¹ane dzimba dzizere zvinhu zvakanaka, zvausina kuisamo, namatsime ausina kumbochera, neminda yemagirepisi neyemiorivhi yausina kumbosima, wadya zvokuguta,

¹²chenjerera kuti urege kukanganwa Tenzi akakubudisa munyika yeIjipiti kwamaiva muuranda.

¹³Remekedza Tenzi Mwari wako, umushandire, upike nezita rake.

¹⁴Usatevere vamwe vamwari, kana vamwari vendudzi dzavanhu vagere munharaunda yako,

¹⁵nokuti Tenzi Mwari wako ndiMwari weshanje.

¹⁶“Usaedze Tenzi Mwari wako sezvawakamboita kuMasa.

¹⁷Unofanira kunyatsochengeta mitemo yaTenzi Mwari wako, nechitenderano chake, nemirao yaakakupa.

¹⁸Zvinonzi naTenzi zvakarurama nezvakanaka, ndizvo zvaunofanira kuita, kuti zvikufambire zvakanaka, ukwanise kundotora nyika yakanaka yakatsidzirwa naTenzi kupa madzitateguru ako,

¹⁹nokukudzingira vavengi vako sokuvimbisa kwaakaita.

²⁰“Panguva ichauya kana mwana wako ozokubvunza achiti, ‘Ko zvakambouya seiko kuti tive nechitenderano nemitemo nemirao yamakapiwa naTenzi Mwari wenyu?’

²¹Ipapo uchamutaurira kuti, ‘Taiva varanda vaFarao muIjipiti ndokubva Tenzi atiburitsa muIjipiti nesimba guru,

²²Tenzi, akaita zviratidzo nezvishamiso zvikuru zvairwadza vaIjipiti naFarao nemhuri yake yose tichizviona.

²³Akatiburitsamo kuti atiunze nokutipa nyika yaakatsidzira madzibaba edu.

²⁴Saka Tenzi akatiudza kuchengeta mirao iyoyi yose, nokuremekedza Tenzi Mwari wedu kuti zvitinakire nguva dzose, uye kuti atichengete tiri vapenyu sezvatiri iye nhasi uno.

²⁵Kwatiri isu ndohuchava ururami kana tikanyatsochengeta mitemo iyoyi yose pana Tenzi Mwari wedu sokutiudza kwaakaita.’