Read Bhaibhiri Idzva rechiShona Kutsinhira Mutemo 7 Bible Online

Kutsinhira Mutemo 7 - Bhaibhiri Idzva rechiShona bible

Kutsinhira Mutemo 7

¹“Kana Tenzi Mwari wenyu azokuunzai munyika yamuri kundotora, achakudzingirai marudzi aya avanhu akasimba anoti: vaHiti navaGirigashi navaAmori navaKanani navaPerizi navaHivhi navaJebhusi.

²Kana Tenzi Mwari wenyu avaisa mumaoko enyu, mukavakunda, vaparadzei zvachose. Musaite chitenderano navo kana kuvanzwira tsitsi.

³Imi navana venyu, musaroorerane navo

⁴nokuti vachatsautsa vana venyu pakunditevera vondoshandira vamwe vamwari. Ipapo muchashatirisa Tenzi achibva akuparadzai nokukasika.

⁵Izvi ndizvo zvamuchaita navo: muchapaza atari dzavo, moputsa mbiru dzamabwe akateketerwa, mopwanya zvifananidzo zvavo zvezvimiti zvinomiririra Ashera nokupisa nomoto zvifananidzo zvavo zvakavezwa.

⁶Ndinodaro nokuti imi muri vanhu vatsvene vakatsaurirwa Tenzi Mwari wenyu. Tenzi Mwari wenyu akakusarudzai pakati pamarudzi ose, apasi pano pose, kuti muve vanhu vake pachake.

⁷“Hakusi kuwanda kwenyu kupfuura vamwe kwakaita kuti Tenzi akudei nokukusarudzai nokuti maiva vashoma kwazvo pana mamwe marudzi ose.

⁸Asi nokuti Tenzi anokudai, aidawo kuchengetedza chitsidzo chake chaakaita namadzitateguru enyu. Tenzi akakubudisai nesimba guru, akakununurai muuranda hwaFarao mambo weIjipiti.

⁹Naizvozvo zivai kuti Tenzi Mwari wenyu ndiye Mwari iyeyo. NdiTenzi akavimbika anochengetedza chitenderano chake, ane mwoyochena kune vanomuda, navanochengeta mitemo yake kusvikira kuzvizvarwa zvavo zvamazana akazanirana.

¹⁰Asi vanomuvenga anovaranga ivo pachavo achivaparadza. Haambozengurira kuparadza vanomuvenga ivavo.

¹¹Naizvozvo chengetai zvirevo izvi nemitemo nemirao iyoyi yandinokuudzai nhasi uno.

¹²“Zvino kana mukanzwa mirao iyoyi, mukaiteerera muchiichengeta, Tenzi Mwari wenyu achachengeta chitenderano chaakaita nemi, acharamba achikuitirai mwoyochena sokutsidzira kwaakaita madzitateguru enyu.

¹³Achakudai, achakukomborerai, achakuitai kuti muwande. Achakupai chikomborero chevana vakawanda. Achakupai makomborero emichero yeminda yenyu, neembesanwa dzenyu, neewaini neemafuta neemombe dzakawanda, neezvipfuwo zvizhinji, munyika yaakapika kumadzitateguru enyu kuti azopa imi.

¹⁴Imi ndimi muchakomborerwa kupfuura marudzi ose avanhu. Pakati penyu hapachazovi nomurume asingabereki, kana mukadzi anoshaya mbereko, kana nezvipfuwo zvisingaite vana.

¹⁵Tenzi achakudzivirirai kuzvirwere zvose. Zvirwere zvose zvokuIjipiti zviya zvamakaona haazoiti kuti zvikubatei. Asi achaita kuti zvibate vavengi venyu.

¹⁶Paradzai marudzi ose anoiswa mumaoko enyu naTenzi Mwari wenyu. Musavanzwire tsitsi. Musambonamata vamwari vavo nokuti chichava chinhu chokukuteyai nacho.

¹⁷“Saka usati nechomumwoyo mako, ‘Ndudzi idzi dzine vanhu vakawanda kupfuura isu. Tingavadzinge seiko munyika iyoyi?’

¹⁸Musavatye, asi rangarirai zvakaitwa naTenzi Mwari wenyu kuna Farao nevaIjipiti vose.

¹⁹Imi nameso enyu, makaona zviedzo zvikuru nezviratidzo nezvishamiso zvakaitwa nesimba guru raTenzi Mwari wenyu paakakuburitsaimo. Ndizvo zvichaitwa naTenzi Mwari wenyu kumarudzi ose amuri kutya.

²⁰Tenzi Mwari wenyu achavaitisa kuti vaparadzwe savanhu varumwa namago kusvikira vose vanenge vasara vari vapenyu nevanenge vakahwanda vaparadzwa.

²¹Musavatye, nokuti Tenzi Mwari wenyu anemi ndiMwari mukuru anotyisa.

²²Tenzi Mwari wenyu achadzinga ndudzi idzodzo paduku paduku. Hamungavaparadze nenguva nduku nduku nokuti zvikara zvingazokuwandirai.

²³Asi Tenzi Mwari wenyu achaisa vavengi venyu mumaoko menyu achivavhiringidza kusvikira vose vapera kuti nho-o.

²⁴Achaisa madzimambo avo mumaoko menyu. Imi munofanira kuita kuti mazita avo arove pasi pano. Hakuna nomumwe wavo achakwanisa kumirisana nemi kusvikira mavaparadza.

²⁵Pisai nomoto zvifananidzo zvokuveza zvavamwari vavo. Musaite ruchiva nesirivha kana nendarama iri pazviri. Musaitore moita yenyu nokuti ingazova chinhu chokukuteyai, Tenzi Mwari wenyu haazvidi.

²⁶Musaunze chinhu chisingadiwi naMwari mumba menyu, kana mukadaro munotoparadzwa saicho. Chisemei muvengane nacho nokuti chinhu chinenge chakanzi naMwari chiparadzwe.