Read Bhaibhiri Idzva rechiShona Johani 1 Bible Online

Johani 1 - Bhaibhiri Idzva rechiShona bible

Johani 1

¹Pakutanga Izwi akanga atovapo; Izwi iyeyo akanga ari pamwechete naMwari; Izwi akangawo ari Mwari.

²Kubvira pakutanga, iye akanga ari pamwechete naMwari.

³Zvinhu zvose zvakaitwa nemaari; hapana chisikwa chisina kusikwa naiye.

⁴Maari makanga muino upenyu; upenyu ihwohwo hwakanga huri chiedza chavanhu

⁵chiedza chinovhenekera murima uye rima harina kuchikurira.

⁶Kwakazova nomunhu akatumwa naMwari, zita rake ainzi Johani.

⁷Uyu akauya kuzopa uchapupu achipupurira chiedza, kuti vanhu vose vatende maari.

⁸Iye akanga asiri chiedza, asi akauya kuzopupurira chiedza achiti

⁹chiedza chechokwadi, chinovhenekera munhu wose, chiri kuuya pasi pano.

¹⁰10 Iye akava pasi pano uye pasi pakasikwa nemaari asi pasi hapana kumuziva.

¹¹Akauya kunyika yokwake[1] vokwake havana kumugamuchira.

¹²Asi vose vakamugamuchira vakatenda muzita rake akavapa simba rokuva vana vaMwari

¹³vasina kuberekwa nokuda kwoukama hweropa kana kuti nezvinodiwa nenyama. Kana nechido chomurume asi nokuda kwaMwari.

¹⁴Izwi akava munhu anenyama akagara pakati pedu azere nyasha nechokwadi. Takaona mbiri yake inokodzerana nomwana oga waBaba.

¹⁵15 Johani akamupupurira akadaidzira achiti, “Uyu ndiye wandaiti, ‘Uyo achauya mushure mangu, mukuru kwandiri nokuti akavapo ndisati ndavapo.’ ”

¹⁶Kubva mumafashafasha enyasha dzake, takapiwa tose nyasha pamusoro pedzimwe nyasha.

¹⁷Mutemo wakapiwa nokuna Mosesi nyasha nechokwadi zvikauya nokuna Jesu Kristu.

¹⁸Hakuna akamboona Mwari asi Mwanakomana mumwechete waMwari iye wapamwoyo paBaba ndiye akaita kuti vazivikanwe kuvanhu.

¹⁹Uhu ndihwo uchapupu hwaJohani, vaJudha pavakatuma vapristi navaRevhi kwaari vachibva kuJerusaremu kundomubvunza kuti: “Ndiwe ani?”

²⁰Akataura pachena; haana kuvanza; akataura pachena achiti, “Ini handisini Kristu.”

²¹Vakamubvunza vachiti, “Ko zvino, ndiwe Eriya here?” “Handisini iye. Ndiwe muporofita uya airehwa here?” Iye akati, “Handisini.”

²²Zvino vakati kwaari, “Ko ndiwe ani tinoda mhinduro kwauri yokupa vatituma; unozviti ani iwe?”

²³Akati: “Ndini izwi rouya anodanidzira murenje richiti, ‘Ruramisai nzira yaTenzi sokutaura kwomuporofita Isaya.’ ”

²⁴Zvino vakanga vatumwa vaya vaibva kuvaFarisei,

²⁵vakamubvunza kuti, “Ko zvino uri kuombekerei kana usiriwe Kristu kana Eriya kana muporofita uya?”

²⁶Johani akavapindura kuti, “Ndinoombeka nemvura asi pakati penyu pane mumwe wamusingazivi.

²⁷Iyeyo anouya mushure mangu, ini handikodzeri kusunungura tambo dzeshangu dzake.”

²⁸Izvi zvakaitika kuBhetania iri kumhiri kwaJorodhani kwaiombeka Johani.

²⁹Ramangwana acho, Johani akaona Jesu achiuya kwaari akati, “Tarisai muone hwayana yaMwari inobvisa chitadzo chapasi.

³⁰Uyu ndiye wandaitaura nezvake ndichiti, ‘Mushure mangu muchauya munhu mukuru kupinda ini nokuti akanga aripo ini ndisati ndavapo.’

³¹Ini handina kunge ndichimuziva; asi ndizvo zvandakavinga ndichiombeka nemvura, kuti aziviswe kuIsraeri.”

³²Johani akapa umboo uhu hwokuti, “Ndakaona Mweya achiburuka kudenga senjiva akasvikogara paari.

³³Ini pachezvangu ndakanga ndisingamuzivi asi uyo akandituma kuti ndiombeke nemvura akanditi, ‘Uyo waunoona Mweya achiburukira paari, achigara paari iyeyo ndiye anoombeka naMweya Mutsvene.’

³⁴Ini ndakazviona uye ndinopupura kuti uyu Mwanakomana waMwari.”[2]

³⁵Ramangwana rachozve Johani akanga amire navadzidzi vake vaviri;

³⁶akatarisa Jesu achifamba akati, “Tarisai muone Hwayana yaMwari.”

³⁷Vadzidzi vaviri vaya vakamunzwa achitaura izvi vakabva vatevera Jesu.

³⁸Jesu akatendeuka akavaona vachitevera akavati, “Muri kutsvakeiko?” Ivo vakati kwaari, “Rabhi,” (zvinoreva kuti mudzidzisi) “Munogara kupiko?”

³⁹Iye akati kwavari, “Uyai muzoona.” Vakauya vakaona paaigara vakagara naye zuva iroro, izvozvo yakanga iri awa yechigumi.[3]

⁴⁰Andireya munun'una waSimoni Pita ndiye mumwe wavadzidzi vaviri vaya vakanzwa Johani achitaura vakamutevera.

⁴¹Akatanga kuwana Simoni akamuti, “Tawana Mesia zvinoreva kuti Kristu.”

⁴²Akauya naye kuna Jesu. Jesu akamutarisa akati, “Iwe unonzi Simoni Mwanakomana waJohani zvino uchanzi Kefasi,” (zvinoreva kuti Pita).

⁴³Ava mangwana Jesu akafunga zvokuenda kuGarirea ndokuwana Firipi akamuti, “Nditevere.”

⁴⁴Zvino Firipi aibva kuBhetisaidha guta ravanaAndireya naPita.

⁴⁵Firipi akawana Natanieri akati kwaari, “Taona munhu uya akanyorwa nezvake naMosesi muMutemo noMuvaporofita, anonzi Jesu anobva kuNazareti mwanakomana waJosefi.”

⁴⁶Natanieri akamuti, “Chiiwo chakanaka chingabve kuNazareti?” Firipi akati kwaari, “Uyaka uone.”

⁴⁷Jesu akaona Natanieri achiuya kwaari akataura nezvake achiti, “Houno muIsiraeri chaiyeiye, asina unyengedzi maari.”

⁴⁸Natanieri akati, “Ko mandiziva sei?” Jesu akamupindura achiti, “Firipi asati akudaidza, zviya uri pasi pomukuyu ndatenge ndakuona.”

⁴⁹Natanieri akamupindura achiti, “Rabhi imi ndimi Mwanakomana waMwari, ndimi mambo weIsiraeri.”

⁵⁰Jesu akamupindura achiti, “Watenda pamusana pezvandati ndakuona uri pasi pomukuyu uchaona zvinhu zvikuru kupinda izvi.”

⁵¹Akati kwaari, “Zvirokwazvo, zvirokwazvo, ndinoti kwamuri muchaona denga rakazaruka vatumwa vaMwari vachikwira nokuburuka nechapamusoro pomwanakomana womunhu.”