Read Bhaibhiri Idzva rechiShona Johani 10 Bible Online

Johani 10 - Bhaibhiri Idzva rechiShona bible

Johani 10

¹Zvechokwadi chokwadi ndinoti kwamuri, “Asingapindi napamusuo pedanga rehwai asi achikwira napamwe munhu iyeyo imbavha negororo.

²Asi anopinda napamusuo ndiye mufudzi wehwai.

³Muchengeti wapasuo guru, anomuzarurira musuo; uye hwai dzinonzwa izwi rake. Anodaidza hwai dzake namazita achidzitungamirira kunze.

⁴Kana achinge adziburitsa dzose panze, anodzitungamirira uye hwai dzinomutevera nokuti dzinoziva izwi rake.

⁵Mweni hadzimuteveri, asi dzinotomutiza nokuti hadzizivi izwi ravaenzi.”

⁶Jesu akavashandisira muenzaniso uyu, asi ivo havana kunzwisisa zvaaireva kwavari.

⁷Ipapo Jesu akatizve kwavari, ndinoti kwamuri, “Idi chaizvo ini ndini musuo wehwai.

⁸Vose vakanditangira dzaiva mbavha namakororo asi hwai hadzina kuvateerera.

⁹Ini ndini musuo. Anopinda napandiri achaponeswa; achapinda nokubuda zvake achiwana mafuro.

¹⁰Mbavha inouya chete kuzoba, nokuzouraya nokuparadza, ini ndakauya kuti vanhu vawane upenyu, uye kuti vawane upenyu huzere.

¹¹Ini ndini mufudzi wakanaka mufudzi wakanaka anofira hwai dzake.

¹²Muronzerwi, asiri mufudzi uye asiri muridzi wehwai akaona mhumhi ichiuya anosiya hwai dziya achitiza, mhumhi inobvuta hwai; dzimwe dzigoti mwanda kupararira.

¹³Anotiza nokuti muronzerwi chete uye haana hanya nehwai.

¹⁴Ini ndini mufudzi wakanaka ndinoziva hwai dzangu uye hwai dzangu dzinondizivawo

¹⁵sokundiziva kunoita Baba, iniwo ndinoziva Baba, ndokusaka ndichiparadza upenyu hwangu kuitira hwai.

¹⁶Ndine dzimwe hwai dzisiri dzedanga rino ndinofanira kudziunzawo. Idzo dzichanzwawo izwi rangu saizvozvo kuchava nedanga rimwechete nomufudzi mumwechete.

¹⁷Baba vanondida pamusana pokuti ndinoparadza upenyu hwangu kuti ndizougamuchirazve.

¹⁸Hapana anonditorera, kuhuparadza kwandinoita kutoda kwangu zvangu. Ndinesimba rokuhuparadza uye ndinesimba rokuti ndive noupenyu zvakare. Ndizvo zvandakaudzwa kuti ndiite nababa vangu.”

¹⁹Pakabva pamuka nharo pakati pavaJudha pamusana pamazwi aya.

²⁰Vazhinji vavo vakati, “Ane mweya wakaipa uye anopenga sei muchimuteerera.”

²¹Vamwewo vakati, “Uku hakusi iko kutaura kwomunhu ane Mweya wakaipa. Mweya wakaipa ungazarure maziso ebofu here?”

²²Paiva pazuva rokurangarira zuva guru reChenura kuJerusaremu. Yaiva iri nguva yechando.

²³Jesu aifamba zvake paTemberi muberere raSoromoni.

²⁴Saka vaJudha vakamuunganira vakamuti, “Unoda kuti timirire kusvikira riniko? Kana uriwe Mesia tiudze pachena.”

²⁵Jesu akavapindura achiti, “Ndakakutaurirai asi hamutendi mabasa andinoita muzita raBaba vangu anondipupurira.

²⁶Asi imi hamutendi nokuti hamusi hwai dzangu.

²⁷Hwai dzangu dzinonzwa izwi rangu, uye ndinodziziva uyewo dzinonditevera.

²⁸Iniwo ndinodzipa upenyu husingaperi, saizvozvo hadzimbofa dzakaparara. Hakuna angadzibvute mumaoko mangu.

²⁹Baba vangu vakadzipa kwandiri vakuru kupinda ani zvake uye hapana anogona kudzibvuta mumaoko aBaba.

³⁰Ini naBaba tiri mumwechete.”

³¹VaJudha vakatorazve matombo kuti vamutake nawo.

³²Jesu akavapindura achiti, “Ndakakuratidzai mabasa mazhinji akanaka anobva kuna Baba; amunonditakira ndaapi ipapa?”

³³VaJudha vakamupindura vachiti, “Hatisi kukutakira basa rakanaka asi kushonha Mwari nokuti iwe uri munhu kudai asi uri kuzviita Mwari.”

³⁴Jesu akavapindura achiti, “Hazvina kunyorwa here mumutemo wenyu zvichinzi, ‘Ndakati muri vanamwari.’

³⁵Kana akavati ndavanamwari vaya vakavingwa nezwi raMwari. Saka Magwaro Matsvene haapikiswi.

³⁶Zvino munoti uyo akaitwa mutsvene naBaba, akatumwa pasi pano, uri kushonha Mwari nokuti ndati ndiri Mwanakomana waMwari.

³⁷Kana ndisiri kuita mabasa aBaba vangu regai zvenyu kunditenda.

³⁸Asi kana ndichiaita kunyange zvenyu musingatendi mandiri tendai mabasa kuti muzive uye munzwisise kuti Baba vari mandiri uye kuti Ini ndiri muna Baba.”

³⁹Vakaedzazve kumubata asi akapunyuka mumaoko avo.

⁴⁰Akaendazve kumhiri kwaJorodhani paya paimboombekera Johani pakutanga, akambogarako.

⁴¹Vanhu vakawanda vakauya kwaari. Vakati, “Johani haana zvake kuita zvishamiso asi zvose zvakataurwa naJohani nezvomunhu uyu ndezvechokwadi.”

⁴²Vazhinji vakabva vadavira maari ipapo.