Read Bhaibhiri Idzva rechiShona Johani 11 Bible Online

Johani 11 - Bhaibhiri Idzva rechiShona bible

Johani 11

¹Kwaiva nomumwe murume airwara ainzi Razaro wekuBhetania, mumusha waigara Maria nomukoma wake Marita.

²Maria ndiye uya akambozora Jesu namafuta akapukuta tsoka dzake nevhudzi rake. Ndiye ane hanzvadzi yake Razaro airwara.

³Hanzvadzi dzake dzakatuma shoko rokuti, “Tenzi mudikanwi wenyu kuno warwara.”

⁴Jesu paakazvinzwa akati, “Kurwara uku hakupereri murufu, ndekwekuratidza mbiri yaMwari, kuti Mwanakomana waMwari arumbidzwe nako.”

⁵Jesu aida Marita nomunun'una wake naRazaro.

⁶Paakanzwa kuti ari kurwara akagara mamwe mazuva maviri kwaakanga ari ikoko.

⁷Mushure maizvozvi akati kuna vadzidzi, “Handei zvakare kuJudhea.”

⁸Vadzidzi vake vakamuti, “Rabhi vaJudha vaida kutokutakai namabwe, ko zvino modzokerazve here ikoko?”

⁹Jesu akapindura achiti, “Handiti zuva rina maawa gumi namaviri here? Aninani anofamba masikati haagumburwi nokuti anenge achiona chiedza chapasi.

¹⁰Asi munhu anofamba murima anoguhunwa nokuti maari hamuna mwenje.”

¹¹Akataura izvi ndokubva ati, “Shamwari yedu Razaro yakotsira asi ndinoenda kundomumutsa muhope.”

¹²Vadzidzi vake vakati kwaari, “Tenzi kana kuri kuti avata achanaya.”

¹³Ipapo Jesu ainge achitaura nezvorufu rwake. Asi ivo vakafunga kuti aireva kuvata hope chaidzo.

¹⁴Jesu ndokuzovataurira pachena kuti “Razaro wafa.

¹⁵Nokuda kwenyu ndinofara kuti ndakanga ndisiko kuti mudavire. Zvino ngatichiendai kwaari.”

¹⁶Tomasi anonzi, Mapatya[23] akati kuna vamwe vake, vadzidzi “Handeiwo tindofa naye.”

¹⁷Jesu paakasvika akawana Razaro atova muguva kwamazuva mana.

¹⁸Bhetania iri pedyo neJerusaremu, makiromita anenge matatu.

¹⁹VaJudha vazhinji vakanga vauya kuna Marita naMaria kuzovabata maoko ehanzvadzi yavo.

²⁰Marita paakanzwa kuti Jesu avakusvika akaenda kundomuchingura Maria akagara mumba.

²¹Marita akati kuna Jesu, “Tenzi dai makanga muri pano hanzvadzi yangu ingadai isina kufa.

²²Nyange iye zvino ndinoziva kuti chose chamunokumbira kuna Mwari, Mwari anokupai.”

²³Jesu akati kwaari, “Hanzvadzi yako ichamukazve.”

²⁴Marita akati kwaari, “Ndinoziva kuti achamukazve pakumuka, pazuva remhedziso.”

²⁵Jesu akati kwaari, “Ndini kumuka nouupenyu. Anotenda mandiri kunyange akafa achava mupenyu.

²⁶Munhu anogara akabatana neni uye anotenda mandiri haazombofa. Unotenda here izvi?”

²⁷Akati kwaari, “Hongu, Tenzi chokwadi ndinotenda kuti ndimi Mesia. Mwanakomana waMwari anonzi achauya pasi pano.”

²⁸Paakataura izvi akaenda akadaidza munun'una wake Maria chinyararire achiti, “Mudzidzisi ari pano uye anokudana.”

²⁹Paakazvinzwa akabva asimuka nokukurumidza akaenda kwaari.

³⁰Ipapo Jesu akanga asati apinda mumusha iwoyo. Akanga achiri paya paakachingurana naMarita.

³¹Naizvozvo vaJudha vakanga vaina Maria mumba vachimubata maoko, pavakamuona achisimuka nokukurumidza achibuda vakamutevera vachifunga kuti avakuenda kuguva kundochemako.

³²Maria paakasvika paiva naJesu akamuona akawira pasi patsoka dzake achiti, “Tenzi dai makanga muri pano, hanzvadzi yangu ingadai isina kufa.”

³³Jesu paakamuona achichema uye vaJudha vaakauya navo vachichemawo, akashungurudzwa mwoyo akatambudzika.

³⁴Akati, “Makandomuradza kupi?” Vakati kwaari, “Tenzi, uyai muone zvenyu.”

³⁵Jesu akachema.

³⁶VaJudha vakati, “Tarisai muone kumuda kwaaiita.”

³⁷Vamwewo vakati, “Ko iye akasvinudza bofu maziso aitadza here kudzivirira munhu uyu kufa.”

³⁸Jesu akashungurudzwazve mumwoyo zvakanyanya ndokubva asvika paguva rakanga riri bako rine ibwe pamuromo paro. Jesu akati, “Bvisai ibwe.”

³⁹Marita, hanzvadzi yomufi, yakati kwaari, “Tenzi paari otonhuhwa nokuti atova namazuva mana akafa.”

⁴⁰Jesu akati kwaari, “Handina here kumbokutaurira kuti ukatenda uchaona mbiri yaMwari.”

⁴¹Nokudaro vakabvisa ibwe riya. Jesu akatarisa kudenga akati, “Baba, ndinokutendai nokuti mandinzwa.

⁴²Ndinoziva kuti munondinzwa nguva dzose. Asi ndataura izvi kuitira vanhu vamire pano ava, vadavire kuti makandituma.”

⁴³Paakataura izvi akazodaidzira nezwi guru achiti, “Razaro buda!”

⁴⁴Mufi akabva abuda maoko ake namakumbo akamoneredzwa netumicheka uso hwake hwakanga hwakaputirwa nejira. Jesu akavati, “Musunungurei aende.”

⁴⁵Naizvozvo vaJudha vazhinji vakanga vauya kuna Maria vakaona zvaakanga aita vakatenda maari.

⁴⁶Asi vamwe vavo vakaenda kuvaFarisei vakavataurira zvakanga zvaitwa naJesu.

⁴⁷Ipapo vakuru vakuru vavapristi navaFarisei vakaunganidza makurukota avo padare[24] vakati, “Toita sei, nokuti munhu uyu anoita zviratidzo zvakawanda.

⁴⁸Tikamurega achidaro vose vachatenda maari, vaRoma vachauya vakaparadza Temberi iyi[25] nerudzi rwedu.”

⁴⁹Asi mumwe anonzi Kaifasi, aiva ari mupristi mukuru gore iroro akati kwavari, “Inga hamuna nechamunoziva,

⁵⁰hamuzivi kuti zvakanaka kwamuri kuti munhu mumwechete afire vanhu kuti rudzi rwose rwurege kuparara.”

⁵¹Haana kutaura izvi nokuda kwake oga asi somupristi mukuru wegore iroro aiporofita kuti Jesu anofanira kufira rudzi.

⁵²Uye kwete kufira rudzi chete asi kukokorodza pamwechete vana vaMwari vakapararira kwose kwose.

⁵³Saizvozvo kubvira pazuva iroro vakarangana kuti vangamuuraye sei.

⁵⁴Naizvozvo Jesu haana kuzofamba pachena mukati mavaJudha. Akabvapo akaenda kunyika iri padyo nerenje kuguta rinonzi Efuremu. Akagara navadzidzi vake ikoko.

⁵⁵Izvozvo Pasika yavaJudha yakanga yava kusvika saka vanhu vazhinji vaibva kumaruwa vachikwira kuJerusaremu pasika isati yasvika vachindozvichenura.

⁵⁶Vaitsvaka Jesu vachitaurirana vamire muTemberi vachiti, “Munofungei nhaimi? Angarege here kuuya kuzuva guru.”

⁵⁷Zvino vapristi vakuru navaFarisei vakanga vakomera kuti anenge angoziva kwaari anofanira kuvazivisa kuti vamusunge.