Read Bhaibhiri Idzva rechiShona Johani 12 Bible Online

Johani 12 - Bhaibhiri Idzva rechiShona bible

Johani 12

¹Mazuva matanhatu ePasika asati asvika Jesu akaenda kuBhetania kwaiva naRazaro waakanga amutsa muvafi.

²Vakamuitira mabiko ikoko Marita ndiye aivashandira. Razaro ainge ari mumwe wavaidya naye pateburu.

³Maria akatora hafu yerita yamafuta anokosha enadi chaiyoiyo akazora nawo tsoka dzaJesu akapukuta tsoka dzake nevhudzi rake. Imba yakazara nokunhuwirira kwamafuta iwayo.

⁴Asi Judhasi mumwe wavadzidzi vake, uya akanga achazomupandukira akati:

⁵“Mafuta aya aregerereiko kutengeswa nemari yesirivha yedhenariusi[26] inoita mazana matatu yapihwa kuvarombo?”

⁶Akataura izvi kwete pamusana pokuti aiva nehanya navarombo asi pamusana pokuti aiva mbavha. Sezvaakanga ari iye sahomwe aipota achitorawo imwe.

⁷Jesu akati, “Muregei henyu, dai anga atoachengetera zvake zuva rokuvigwa kwangu.[27]

⁸Varombo munavo nguva dzose asi ini hamuneni nguva dzose.”

⁹Gungano guru ravaJudha parakanzwa kuti Jesu akanga ariko rakauya kwete pamusana paJesu chete asi kuzoonawo Razaro waakanga amutsa kuvafi.

¹⁰Naizvozvo vapristi vakuru vakarangana kuurayawo Razaro.

¹¹Chikonzero chacho chiri chokuti nokuda kwake vaJudha vazhinji vakanga vavakubva vachinotenda muna Jesu.

¹²Zuva ramangwana racho gungano guru ravanhu rakanga rauya kuzuva guru rakanzwa kuti Jesu ari kuuya kuJerusaremu.

¹³Nokudaro vakakwanhura mapazi omurara vakaenda kundomugamuchira vachidaidzira vachiti, “Hosana, ngaarumbidzwe iye anouya muzita raTenzi ndiye mambo weIsiraeri.”

¹⁴Jesu akawona chigondora chedhongi akachitasva sokunyorwa kwazvakaitwa zvichinzi,

¹⁵“Usatye zvako iwe mukunda weZioni, tarisa uone mambo wako ari kuuya akatasva pachigondora chedhongi.”

¹⁶Pakutanga vadzidzi vake, izvi havana kuzvinzwisisa. Asi Jesu paakawana mukurumbira wake ndopavakayeuka kuti izvi zvakambenge zvakanyorwa nezvake uye kuti ndizvo zvakanga zvaitika kwaari.

¹⁷Chikwata chavanhu chakanga chinaye paakadaidza Razaro muguva akamumutsa muvafi, chakamupupurira.

¹⁸Chakaendera chikwata ichocho kundomuchingura, ndechokuti vakanga vanzwa kuti akanga aita chiratidzo ichocho.

¹⁹VaFarisei vakataurirana kuti, “Chitarisaika muone. Hapana chamunombogona kuita. Onai nyika yotomutevera.”

²⁰Pakati pevanhu vakaenda kundonamata kuzuva guru paiva navamwe vaGiriki.

²¹Ivava vakaenda kuna Firipi aibva kuBhetisaidha muGarirea vakati kwaari, “Changamire tinodawo kuona Jesu.”

²²Firipi akaenda akandotaurira Andireya. Andireya akaenda naFiripi vakandoudza Jesu.

²³Jesu akavapindura achiti, “Nguva yasvika yokuti Mwanakomana womunhu zvino achiwana mukurumbira.

²⁴Zvechokwadi chaizvo ndinoti kwamuri kusatoti tsanga yekoroni yawira muvhu ikafa inoramba ichingova yoga asi ikafa inobereka muchero wakawanda.

²⁵Anoda upenyu hwake anorasikirwa naho, asi uyo anovenga upenyu hwake pasi pano anohuchengeta kusvikira kuhupenyu husingaperi.

²⁶Anoda kundishandira, anofanira kunditevera, kwandinenge ndiri, mushandi wangu ndokwaanofanirawo kuva. Munhu akandishandira, Baba vachamukudza.

²⁷“Iye zvino ndiri kushushikana mumwoyo Ndoti kudiiko? Baba ndipunyutseiwo kunguva iyi asi aiwa, inga zvenguva iyi ndizvo zvandakavinga wani.

²⁸Baba rumbidzai zita renyu.” Ipapo izwi rakabva kudenga richiti, “Ndakarirumbidza uye ndicharirumbidzazve.”

²⁹Chikwata chavanhu chakanga chiripo chakazvinzwa. Vakati, “Kwatinhira,” vamwewo vakati, “Mutumwa waMwari ataura kwaari.”

³⁰Jesu akapindura achiti, “Izwi iri rauyira imi kwete ini.”

³¹Zvino kutongwa kwapasi pano kwasvika. Zvino mutongi wapasi pano ava kudzingirwa kunze.

³²Iniwo kana ndarembedzwa pamusoro[28] payo nyika, ndichakwezvera vanhu vose kwandiri.

³³Akataura izvi achiratidza rufu rwaaizofa narwo.

³⁴Gungano rakamupindura richiti, “Isu takanzwa muMutemo kuti Mesia achagara nokusingaperi. Ko zvino ungati sei Mwanakomana womunhu anofanira kuti asimudzwe. Ndianiko Mwanakomana womunhu iyeyo?”

³⁵Jesu akavati, “Mwenje uchinemi kwechinguvana fambai muchine mwenje iwoyo kudai, mungadaro mukawirwa nerima. Anofamba murima haazivi kwaanoenda.

³⁶Muchine mwenje kudai tendai mumwenje kuti muve vana vechiedza.” Jesu paakapedza kutaura izvi akabva akandozvivanza kwavari.

³⁷Kunyange zvazvo akaita zviratidzo zvizhinji pamberi pavo asi havana kutenda maari.

³⁸Zvakaitika kuti zvakataurwa nomuporofita Isaya zvizadziswe zvokuti, “Tenzi ndiani akatenda zvatakataura simba raMwari rakaratidzwa kunaani?”

³⁹Naizvozvo havana kugona kutenda nokuti Isaya anotizve,

⁴⁰“Akavapofomadza maziso akavagomadza mwoyo kuti zvimwe vangadaro vakaona namaziso avo vakanzwisisa nemwoyo yavo vakapindukira kwandiri ndikavaporesa.”

⁴¹Isaya akataura izvi nokuti akaona mbiri yake akataura nezvake.

⁴²Zvakadaro zvazvo vanhu vazhinji, kunyange vakuru vakuru vakadavira maari. Asi pamusana pokutya vaFarisei havana kugona kuzvidura pachena kuri kutya kuti vangadzingwe muSinagogu.

⁴³Chikonzero chacho chaiva chokuti vaida kurumbidzwa navanhu kupinda kurumbidzwa naMwari.

⁴⁴Jesu akadaidzira achiti, “Anodavira mandiri haadaviri mandiri asi muna iye akandituma.

⁴⁵Uyo anondiona anoona iye akandituma.

⁴⁶Ndakauya sechiedza pasi pano kuti ani naani anotenda mandiri arege kugara murima.

⁴⁷Ani naaniwo anonzwa zvandinotaura asingazvichengete handimupi mhosva nokuti handina kuuya kuzopa pasi mhosva asi kuzoponesa pasi.

⁴⁸Anondiramba uye asingagamuchiri zvandinotaura ane anomutonga. Zvandakataura izvozvo ndizvo zvichamutonga pazuva remhedziso.

⁴⁹Nokuti handina kutaura zvomusoro wangu. Baba vakandituma ndivo vakanditemera zvandinofanira kutaura nezvandinofanira kureva.

⁵⁰Ndinozivawo kuti mutemo wavo ndiwo upenyu husingaperi, saka zvandinotaura, ndinotaura sokuudzwa kwandakaitwa naBaba.”