Read Bhaibhiri Idzva rechiShona Johani 14 Bible Online

Johani 14 - Bhaibhiri Idzva rechiShona bible

Johani 14

¹“Mwoyo yenyu ngairenge kutambudzika tendai muna Mwari mutendewo mandiri.

²Mumba maBaba vangu kune dzimba dzakawanda dai kwakanga kusina ndingadai ndakakuudzai. Ndiri kuendako kundokugadzirirai pokugara.

³Kana ndandokugadzirirai pokugara ndichauyazve ndozokutorai kuti kwandichange ndiri, imi muvekowo.

⁴Nzira yokwandinoenda munoiziva.”

⁵Tomasi akati kwaari, “Tenzi hatizivi kwamuri kuenda tingazive sei nzira yoko?”

⁶Jesu akamuti kwaari, “Ndini nzira nechokwadi noupenyu. Hapana anosvika kuna Baba asina kuuya nokwandiri.

⁷Dai maindiziva maizivawo Baba vangu asi kubvira zvino mavakuvaziva uye makavaona.”

⁸Firipi akati, “Tenzi tiratidzei Baba tinobva tagutsikana.”

⁹Jesu akati kwaari, “Nhai Firipi, ko zvandagarazve nguva ndefu yakadai nemi, nanhasi wose haundizivi? Inga wani akaona ini akaona Baba. Zvino ungagoti seiko tiratidzei Baba?

¹⁰Haudaviri here kuti ndiri muna Baba uye kuti Baba vari mandiri. Zvandinotaura kwamuri hazvisi zvomusoro wangu asi kuti Baba vanogara mandiri ndivo vanenge vachiita mabasa avo.

¹¹Nditendei kuti ini ndiri muna Baba uye kuti Baba vari mandiri kana kuti nditendei nokuda kwamabasa pachawo.

¹²“Zvechokwadi chokwadi ndinoti kwamuri, anotenda mandiri achaitawo mabasa andinoita uye achaita mabasa akatokura kupinda aya nokuti ndava kuenda kuna Baba.

¹³Chiri chose chamunokumbira muzita rangu ndichachiita kuti Baba varumbidzwe muMwanakomana.

¹⁴Kana mukakumbira chii zvacho muzita rangu ini ndichachiita.

¹⁵“Kana muchindida, muchachengeta mitemo yangu.

¹⁶Iniwo ndichakumbira Baba, ivo vachakupai mumwe Murevereri[30] achava nemi nokusingaperi.

¹⁷Ndiye uya Mweya wechokwadi iyeyo pasi pano hapagoni kumugamuchira nokuti hapamuoni kana kumuziva; imi munomuziva nokuti anogara nemi uye achava mamuri.

¹⁸“Handikusiyei muri nherera ndichauyazve kwamuri.

¹⁹Kwasara chinguvana chiduku, pasi hapazondiona. Asi imi muchandiona zvenyu pamusana pokuti ini ndiri mupenyu imiwo muchava vapenyu.

²⁰Ipapo ndipo pamuchaziva kuti ini ndiri muna Baba vangu imi muri mandiri[31] iniwo ndiri mamuri.

²¹Munhu ane mitemo yangu achiichengeta, ndiye munhu anondida; uyo anondida achadidawo naBaba vangu iniwo ndichazviratidza kwaari.”

²²Judhasi, kwete Isikarioti, akati kwaari, “Tenzi nemhaka yei muchizviratidza kwatiri musingazviratidzi kunyika.”

²³Jesu akamupindura achiti, “Kana munhu achindida anochengeta izwi rangu Baba vangu vachamuda tozobva touya kwaari toita musha wedu maari.

²⁴Munhu asingandidi haachengeti mazwi angu, izwi ramuri kunzwa harisi rangu asi kuti nderaBaba vakandituma.

²⁵“Zvinhu izvi ndazvitaura kwamuri ndichinemi.

²⁶Asi Murevereri uya, Mweya Mutsvene achatumwa naBaba muzita rangu, iye achakudzidzisai zvinhu zvose achikuyeuchidzai zvose zvandakataura kwamuri.

²⁷Ndinokusiirai rugare, ndinokupai rugare rwangu. Handikupei sokupa kunoita nyika. Mwoyo yenyu ngairege kutambudzika uye ngairege kutya.

²⁸Mandinzwa ndichiti kwamuri ndiri kuenda, ndichauyazve kwamuri. Dai muchindida mungadai matofara kwazvo kuti ndiri kuenda kuna Baba nokuti Baba vakuru kwandiri.

²⁹Zvino ndakutaurirai izvi zvisati zvaitika kuti kana zvoitika mutendhe.

³⁰Handichataura nemi zvakawanda nokuti mutongi wapasi pano ari kuuya asi hapana chaanondiita.

³¹Asi ini ndinoita zvandakaudzwa naBaba kuti pasi pazive kuti ndinoda Baba. Chisimukai tiende.”