Read Bhaibhiri Idzva rechiShona Johani 15 Bible Online

Johani 15 - Bhaibhiri Idzva rechiShona bible

Johani 15

¹“Ini ndini mugirepisi wechokwadi Baba vangu ndivo murimi.

²Bazi rimwe nerimwe risingabereki muchero vanoribvisa. Uye bazi rimwe nerimwe rinobereka muchero, vanoripemhena kuti ribereke muchero wakawanda.

³Imi makatonatswa nokupemhenwa nezwi randakakutaurirai.

⁴Garai mandiri neniwo ndichigara mamuri. Bazi zvarisingakwanisi kubereka muchero nokwaro roga risina kubatanidzwa nomugirepisi ndizvozvowo zvinemi hamukwanisi kubereka muchero kana musiri mandiri.

⁵Ini ndini mugirepisi imi ndimi mapazi acho. Anogara mandiri ndichagarawo maari iyeyo ndiye anobereka muchero wakawanda, nokuti musineni hapana chamunogona kuita.

⁶Kana munhu asingagari mandiri akaita sebazi rakadimburwa, rinouna. Mapazi akadai anounganidzwa okandwa mumoto opiswa.

⁷Mukaramba muri mandiri mazwi anguwo akaramba ari mamuri kumbirai zvenyu chamunenge muchida muchachiitirwa.

⁸Baba vangu vanorumbidzwa nezvizvi zvokuti mubereke michero yakawanda muchiratidza nazvo kuti muri vadzidzi vangu.

⁹Sokundida kwakaita Baba ndokukudaiwo kwandakaita. Rambai muri murudo rwangu.[32]

¹⁰Kana mukachengeta mitemo yangu, mucharamba muri murudo neni sokuchengetawo kwandakaita mitemo yaBaba vangu ndinoramba ndiri murudo navo.

¹¹Ndataura izvi kwamuri kuti rufaro rwangu ruve mamuri uyewo kuti rufaro rwenyu ruzare.

¹²“Uyu ndiwo mutemo wangu wokuti: Idanai sokukudai kwandakaita.

¹³Hakuna rudo runopfuura urwu rwokuti munhu anofira shamwari dzake.

¹⁴Muri shamwari dzangu kana muchiita zvandinokuudzai.

¹⁵Handicharamba ndichikutii varanda nokuti muranda haazivi zvinoitwa natenzi wake asi ndava kukutii shamwari nokuti ndakakuzivisai zvose zvandakanzwa kuna Baba vangu.

¹⁶Hamuna kundisarudza, asi ini ndini ndakatokusarudzai ndikakupai basa rokuti muende mundobereka muchero uye kuti muchero wenyu uve unogara kuti chipi nechipi chamunokumbira Baba muzita rangu vakupei.

¹⁷Mutemo wandinokutemerai ndouyu wokuti, idanai.

¹⁸“Kana pasi pachikuvengai, zivai kuti pakandivengawo pasati pakuvengai imi.

¹⁹Dai muri vapasi pano, pasi pangadai pachitokudai savanhu vapo. Asi pamusana pokuti hamusi vapasi pano, uye nokuti ndakakutsaurai kubva pasi pano, ndokusaka pasi pachikuvengai.

²⁰Rangarirai izwi randakutaurirai rokuti muranda haasiri mukuru pana tenzi wake. Kana vakandionesa nhamo, vachakuonesaiwo nhamo. Kana vakachengeta izwi rangu vachachengetawo renyu.

²¹Zvose izvozvi vachazviita kwamuri pamusana pangu nokuti akandituma havamuzivi.

²²Dai ndisina kuuya ndikataura kwavari, vangadai vasina chitadzo; asi mhosva yechitadzo ichocho hapana pavachainzvenge napo.

²³Anondivenga anovengawo Baba vangu.

²⁴Dai ndisina kumboita pakati pavo mabasa asina kumboitwa nani nani zvake, vangadai vasina chitadzo. Asi zvino vakaaona vakabva vatovenga ini pamwechete naBaba vangu.

²⁵Izvi zvinozadzisa zvakanyorwa mumutemo wavo zvokuti, ‘Vakandivenga ini ndisina mhosva.’

²⁶Asi Mubatsiri kana auya, wandichatuma kwamuri achibva kuna Baba iyeyo Mweya Wechokwadi anobva muna Baba; iye achandipupurira.

²⁷Kana imiwo muri zvapupu nokuti makanga muineni kubvira pakutanga.”