Read Bhaibhiri Idzva rechiShona Johani 17 Bible Online

Johani 17 - Bhaibhiri Idzva rechiShona bible

Johani 17

¹Jesu paakapedza kutaura izvi akatarisa kudenga akati, “Baba nguva iya yazosvika. Chipai Mwanakomana mukurumbira kuti iyewo Mwanakomana akuwanisei mukurumbira

²nokuti makamupa simba pamusoro pavanhu vose kuti ape upenyu husingaperi kuna vose vamakamupa.

³Uhu ndihwo upenyu husingaperi: kuziva imi Mwari mumwechete wechokwadi naJesu Kristu wamakatuma.

⁴Ndakakuwanisai mukurumbira panyika nokupedza kwandakaita basa ramakandipa kuti ndiite.

⁵“Zvino Baba chindipaiwo mbiri mberi kwenyu mbiri iya yandaiva nayo ndiinemi pasi pasati pavapo.

⁶“Ndakakuzivisai kuvanhu vamakandipa panyika; vakanga vari venyu mukavapa kwandiri uye vakachengeta izwi renyu.

⁷Zvino vavakuziva kuti zvose zvamakandipa zvakabva kwamuri.

⁸Nokuti ndakavapa mazwi amakandipa uye vakaagamuchira, vakaziva kuti zvechokwadi ndakabva kwamuri uye vakadavira kuti ndimi makandituma.

⁹Ndiri kuvanamatira, handisi kunamatira pasi asi avo vamakandipa nokuti ndevenyu.

¹⁰Zvose zvangu ndezvenyu uye zvenyu ndezvangu uyezve ndinowana mbiri mavari.

¹¹Zvino handichisiri pasi pano asi ivo vari pasi pano ini ndavakuuya kwamuri. Baba vatsvene, vanhu vamakandipa vachengetei muzita renyu.

¹²Pandakanga ndiinavo vanhu vamakandipa ndakavachengeta muzita renyu. Ndakavachengetedza zvokuti hapana akarasika kusiya uya wekashambwa kokuraswa kuti Magwaro Matsvene azadzikiswe.

¹³Asi zvino ndavakuuya kwamuri ndiri kutaura zvinhu izvi ndichiri pasi pano kuti kufara kwangu kunyatsozara chaizvo mavari.

¹⁴Inini ndakavapa shoko renyu, pasi pakavavenga nokuti havasi vapasi pano sezvandisiriwo wapasi pano.

¹⁵Handisi kunamatira kuti muvabvise pasi pano asi kuti muvadzivirire kune wakaipa uya.

¹⁶Havasi vapasi pano sezvandisiriwo wapasi pano.

¹⁷Vaitei kuti vave vatsvene muchokwadi izwi renyu ichokwadi.

¹⁸Sokundituma kwamakaita pasi pano neniwo ndavakuvatuma kupasi pose.

¹⁹Nokuda kwavo ndinozvipira kuti ivo vazvipirewo kuchokwadi.

²⁰“Handinamatire ava bedzi asi ndinonamatira avo vachatenda mandiri pamusana pezwi ravo.

²¹Kuti vose zvavo vave vamwechete[34] sezvakangoita kuti imi Baba muri mandiri ini ndiri mamuri ivowo ngavave matiri kuti pasi padavire kuti imi ndimi makandituma.

²²Mbiri yamakandipa ndakavapawo kuti vave vamwechete sesu tiri vamwechete.

²³Ini ndiri mavari imi muri mandiri vanyatsova vamwechete, kuti pasi pazive kuti imi ndimi makandituma mukavada sokundida kwamakaita.

²⁴“Baba ndinodawo kuti avo vamakandipa vave kwandinenge ndiri vaonewo mbiri yangu yamakandipa pamusana porudo rwenyu kwandiri pasi pasati pavapo.

²⁵Baba makarurama, pasi hapana kukuzivai asi ini ndakakuzivai uye ava vanoziva kuti makandituma.

²⁶Ndakaita kuti vazive zita renyu uye ndichaita kuti rizivikanwe kuti rudo rwamakandida narwo ruvewo mavari uyewo kuti iniwo ndive mavari.”