Read Bhaibhiri Idzva rechiShona Johani 2 Bible Online

Johani 2 - Bhaibhiri Idzva rechiShona bible

Johani 2

¹Pazuva retatu kwakava nomuchato kuKana yokuGarirea. Amai vaJesu vakanga variko.

²Jesu akakokwawo kumuchato iwoyo pamwechete navadzidzi vake.

³Waini payakapera, amai vaJesu vakati kwaari, “Vanhu vapererwa newaini.”

⁴Jesu akati kwavari, “Nhai amai, ko isu tinei nazvo, nguva yangu haisati yasvika.”

⁵Amai vake vakati kuvashandi, “Itai zvose zvaanenge akutaurirai.”

⁶Zvino ipapo pakanga paina mazigate matanhatu amabwe maererano netsika yavaJudha yokuzvichenura. Rimwe nerimwe rawo raiita marita makumi manomwe anamashanu kusvika kuzana ramarita rina marita gumi namashanu.

⁷Jesu akati kwavari, “Zadzai makate aya nemvura.” Ivo vakaazadza kuti tuba.

⁸Akazovati, “Zvino chicherai imwe muendese kuna samukuru womuchato.” Saizvozvo vakaenda nayo.

⁹Samukuru uya paakaravira, mvura iya yakanga yatova waini asi iye akanga asingazivi kwayakanga yabva. Asi Vashandi vaya vakanga vachera mvura ndivo vaizviziva. Samukuru womuchato akadaidza muwani[4]

¹⁰akati kwaari, “Vanhu vose vanotanga vapa vanhu waini yakanaka. Kana vachinge vanyatsonwa zvavo ndokwakuzovapa isina kunaka asi iwe wachengeta waini yakanaka kusvikira iye zvino.”

¹¹Ichi ndicho chiratidzo chaJesu chokutanga chaakaita kuratidza mbiri yake. Achiita ari kuKana yokuGarirea.

¹²Mushure maizvozvi akadzika kuKapenaumu naamai vake navakomanavanun'una vake navadzidzi vake vakagarako kwamazuva mashoma.

¹³Pasika yavaJudha zvayakanga yavapedyo, Jesu akakwira kuJerusaremu.

¹⁴Akasvikoona vanhu vachitengesa muTemberi, mombe nehwai nehangaiwa navaiva mushishi yokutengeserana mari.

¹⁵Akaita tyava nemikosi akadzingira vose kunze kweTemberi, pamwechete nehwai nemombe. Akawodzvorera pasi mari chena yavaitengeserana mari nokupidigurira pasi mateburu avo.

¹⁶Akataurira vainge vachitengesa hangaiwa kuti, “Bvisai zvinhu izvi muno. Hamufaniri kuita imba yaBaba vangu musika.”

¹⁷Vadzidzi vake vakayeuka kuti zvakanyorwa kunzi, “Kudisisa kwandinoita imba yenyu kuchandipedza.”

¹⁸VaJudha vakabva vati kwaari, “Tipe chiratidzo chemvumo yezvawaita izvi.”

¹⁹Jesu akavapindura achiti, “Pazai Temberi iyi, ini ndigoivakazve namazuva matatu.”

²⁰VaJudha ndokuti, “Zvakatora makore makumi mana anamatanhatu kuvaka Temberi iyi iwe ndipo paungaimise namazuva matatu here?”

²¹Asi Temberi yaaitaura waiva muviri wake.

²²Saizvozvo paakamutswa muvafi vadzidzi vake vakarangarira kuti akambozvitaura vakatenda chinyorwa nezwi rakanga rataurwa naJesu.

²³Paakanga ari muJerusaremu kumazuva makuru ePasika vazhinji vakatenda muzita rake pavakaona zviratidzo zvaaiita.

²⁴Asi Jesu haana kuvimba navo nokuti aiziva vanhu vose.

²⁵Akanga asina chaangaudzwe nomumwe munhu nezvomunhu nokuti iye pachake aiziva zviri mumunhu.