Read Bhaibhiri Idzva rechiShona Johani 5 Bible Online

Johani 5 - Bhaibhiri Idzva rechiShona bible

Johani 5

¹Mushure maizvozvi kwakaita zuva guru ravaJudha, Jesu akakwira kuJerusaremu.

²Zvino muJerusaremu mune dziva riri pedyo neSuwo guru reHwai rinonzi Bhetisaidha[8] muchiHebheru, rine maperere mashanu.

³Mumaperere imomo maiva navarwere; vaiti mapofu nemhetamakumbo navakafa mitezo[9].

⁴

⁵[10]Ipapo paiva nomumwe murume akarwara kwamakore makumi matatu ana masere.

⁶Jesu paakamuona akati rabada uye achiziva kuti akanga akadai[11] kwenguva ndefu, akamuti, “Unoda kuporeswa here?”

⁷Murwere akamupindura achiti, “Changamire ini handina anondiisawo mudziva kana mvura yabvongodzwa. Pandinenge ndoti ndichipindawo mumwe anobva anditangira.”

⁸Jesu akati kwaari, “Chisimuka utore rukukwe rwako ufambe.”

⁹Pakarepo munhu uya akabva aporeswa. Akatora rukukwe rwake akabva afamba. Musi iwoyo wakanga uri musi weSabata.

¹⁰Ipapo vaJudha vakati kumunhu akanga aporeswa, “Nhasi iSabata, haubvumirwi kuti utakure rukukwe rwako.”

¹¹Asi iye akavapindura achiti, “Munhu andiporesa ndiye andiudza kuti, ‘Tora rukukwe rwako ufambe.’ ”

¹²Vakamubvunza kuti, “Ndiani munhu iyeyo akutaurira kuti tora rukukwe rwako ufambe?”

¹³Asi munhu uya akaporeswa haana kuziva kuti ndiani nokuti Jesu akanga anyangarika sezvapanga paina manyoremanyore avanhu.

¹⁴Mushure mezvo Jesu akamuwana paTemberi akamuti, “Tarisa uone kuti wapora; usatadzezve kuti urege kuwirwa nezvakapinda izvi.”

¹⁵Murume uya akabva aenda akandotaurira vaJudha vaya kuti Jesu ndiye akanga amuporesa.

¹⁶Ndizvo zvakaita kuti vaJudha vaonese Jesu nhamo nokuti akaita zvinhu zvakadai nomusi weSabata.

¹⁷Asi Jesu akavapindura achiti, “Baba vangu vanoshanda nazvino neniwo ndinofanira kushanda.”

¹⁸Ndokusaka vaJudha vakatonyanya kuda kumuuraya nokuti haana kungotyora chete mutemo weSabata, asi kuti akatiwo Mwari ndiBaba vake pachake achizvienzanisa naMwari.

¹⁹Jesu akati kwavari, “Zvirokwazvo zvirokwazvo ndinoti kwamuri, Mwanakomana haakwanisi kuita chinhu nokwake pachake asi kuita zvaanoona Baba vachiita nokuti zvavanoita ndizvowo zvaanoita.

²⁰Nokuti Baba vanoda Mwanakomana uye vanomuratidza zvose zvavanenge vachiitawo pachavo uye vachamuratidza mabasa makuru kupinda iwaya kuti mushamiswe.

²¹Nokuti sezvinongoita Baba kumutsa vakafa vachivapa upenyu, saizvozvo Mwanakomana anopawo upenyu kune waanenge ada.

²²Baba havatongi munhu, asi vakapa kutonga kwose kumwanakomana

²³kuti vose varemekedze mwanakomana sokuremekedza kwavanoita Baba. Asingaremekedzi Mwanakomana haaremekedzi Baba vakamutuma.

²⁴Zvirokwazvo Zvirokwazvo ndinoti kwamuri anonzwa izwi rangu uye achitenda akandituma anoupenyu husingaperi haagadzwi dare; asi atobva kurufu achienda kuupenyu.

²⁵Zvechokwadi chaizvo ndinoti kwamuri nguva iri kuuya uye yatosvika yokuti vakafa vanzwe izwi roMwanakomana waMwari. Avo vacharinzwa vachava vapenyu.

²⁶Sezvo Baba vari dzinde roupenyu saizvozvo vakaitawo kuti Mwanakomana ave nedzinde roupenyu maari,

²⁷vakamupa ukuru kuti atonge nokuti ndiye Mwanakomana womunhu.

²⁸Musashamisike nezvizvi zvokuti nguva iri kuuya yokuti vose vari mumakuva vachanzwa izwi rake vagobudamo.

²⁹Vakaita zvakarurama vachimukira upenyu, vanenge vakaita zvakaipa vachimukira kutongwa.

³⁰Hapana chandinogona kuita nokwangu ndoga. Sokunzwa kwandinenge ndaita kuna Baba ndiwo matongero andinoita; uye kutonga kwangu kwakarurama nokuti handitsvaki kuita kuda kwangu, asi kuda kwaiye akandituma.

³¹Ndikazvipupurira, kupupura kwangu hakusi kwechokwadi.

³²Kune mumwe anondipupurira uye ndinoziva kuti kundipupurira kwake ndekwechokwadi.

³³Makatuma nhume kuna Johani akapupurira chokwadi.

³⁴Zvisingarevi zvazvo kuti ini ndinovimba nouchapupu hwomunhu. Asi ndinotaura izvi kuti imi muponeswe.

³⁵Akanga ari rambi rinopfuta uye rinopenya imi mukafarira kuva muchiedza chake kwekanguva.

³⁶Asi uchapupu hwandinahwo hukuru kupinda hwaJohani nokuti mabasa andakapiwa naBaba kuti ndiapedze, mabasa iwayo andiri kuita anondipupurira kuti Baba ndivo vakandituma.

³⁷Ivowo Baba vakandituma vanondipupurira. Izwi ravo hamusati mamborinzwa chimiro chavo hamusati mambochiona.

³⁸Uyewo izwi ravo harigari mamuri nokuti hamudaviri uyo wavakatuma.

³⁹Munotsvagatsvaga muMagwaro Matsvene nokuti munofunga kuti maari munowana upenyu husingaperi Magwaro iwayo ndiwo anotondipupurira.

⁴⁰Asi imi munoramba kuuya kwandiri kuti muwane upenyu.

⁴¹Ini handitsvagi kuwana mbiri inobva kuvanhu.

⁴²Asi sokukuzivai kwandinoita, rudo rwaMwari mamuri hamuna.

⁴³Ndakauya ini muzita raBaba vangu asi hamundigamuchiri asi mumwewo akauya muzita rake iyeyo ndiye wamunogamuchira.

⁴⁴Mungatenda sei imi munofarira kurumbidzana, musingatsvaki mbiri inobva kuna Mwari mumwechete.

⁴⁵Musafunge kuti ini ndini ndichakupai mhosva panaBaba asi Mosesi wamunovimba naye, ndiye achakupai mhosva.

⁴⁶Dai maidavira muna Mosesi maidavirawo mandiri nokuti akanyora nezvangu.

⁴⁷Zvino kana musingatendi zvaakanyora mungatenda sei mashoko angu.”