Read Bhaibhiri Idzva rechiShona Johani 6 Bible Online

Johani 6 - Bhaibhiri Idzva rechiShona bible

Johani 6

¹Mushure maizvozvo Jesu akaenda kumhiri kwegungwa reGarirea kana kuti gungwa reTibheriasi.

²Gurumwandira ravanhu rakamutevera nokuti vakanga vaona zviratidzo zvaakaita pavarwere.

³Jesu akakwira mugomo ndokugara pasi navadzidzi vake.

⁴Izvozvo mazuva makuru avaJudha ePasika akanga ava pedyo.

⁵Jesu paakasimudza musoro akaona manyoramanyore avanhu achiuya kwaari. Akati kuna Firipi, “Tichatenga kupi chingwa chokuti vanhu ava vadye.”

⁶Izvi akataura kuri kumuedza zvake. Nokuti iye aiziva zvaaizoita.

⁷Firipi akamupindura achiti, “Mazana maviri emari yemadhenari haigoni kutenga chingwa chinokwana kuti mumwe nomumwe awane kachidimbu.”

⁸Mumwe wavadzidzi vake ainzi Andireya, munun'una waSimoni Pita akati kwaari,

⁹“Pane mukomana ari pano ane zvingwa zvishanu zvebhari nehove mbiri asi zvingabatsirei panavanhu vakawanda kudai.”

¹⁰Jesu akati itii vanhu vagare pasi. Ipapo pakanga paine uswa hwakawanda. Varume vakagara pasi vainge zviuru zvishanu.

¹¹Jesu ndokutora zvingwa zviya otenda Mwari[12] ndokuzvigovera kuvanhu vakanga vakagara pasi. Akaita zvimwechetezvo nehove dziya. Akavapa pamadiro avo.

¹²Pavakanga vaguta akati vadzidzi vake vaunganidze zvimedu zvakasara kuitira kuti pashaye nechinoraswa.

¹³Saizvozvo vakazviunganidza vakazadza tswanda gumi nembiri nezvimedu zvezvingwa zvebhari zvishanu zvakasiiwa navakadya vaya.

¹⁴Vanhu pavakaona chiratidzo chaakanga aita, vakati chokwadi uyu ndiye muporofita uya ainzi ari kuuya pasi pano.

¹⁵Zvino Jesu paakazviona kuti vakanga vavakuuya kuzomumanikidza kumuita mambo, Jesu akabva abvazve pavari akaenda kumakomo ari oga zvake pachake.

¹⁶Ava madeko, vadzidzi vake vakadzika kugungwa

¹⁷vakapinda mugwa vakatangisa kuyambuka gungwa vachienda kuKapenaumu. Izvozvo kwakanga kwasviba. Uye Jesu akanga asati auya kwavari.

¹⁸Gungwa rakanyanduka nokuda kwemhepo yaivhuvhuta nesimba.

¹⁹Vadzidzi pavakanga vakwasva kwamakiromita mashanu kana kuti matanhatu vakaona Jesu achifamba pamusoro pegungwa achiuya pedyo negwa. Vakabva vabatwa nokutya.

²⁰Asi iye akati kwavari, “Ndini, musatye zvenyu.”

²¹Naizvozvo vakabva vafara kumugachira mugwa. Pakarepo igwa rakabva rasvika kumahombekombe ekwavaienda.

²²Ramangwana racho, vanhu vaya vakasara kumhiri kwegungwa, vakazviona kuti pakanga pane igwa rimwechete chete ipapo. Uye kuti Jesu haana kunge apinda muigwa iroro pamwechete navadzidzi vake asi kuti vadzidzi vake vakanga vaenda voga.

²³Asi pane magwa akabva kuTibheriasi akasvikawo pedyo nenzvimbo yavakadya chingwa chiya mushure mokunge Tenzi ambotenda.

²⁴Zvino vanhu pavakaona kuti Jesu akanga asipo pamwechete navadzidzi vake, ivo pachavo vakapinda mumagwa aye vakaenda kuKapenaumu kundotsvaka Jesu.

²⁵Pavakamuwana kumhiri kuya kweGungwa, vakati kwaari, “Rabhi makauya kuno riniko?”

²⁶Jesu akavapindura achiti, “Chokwadi chaizvo ndinoti kwamuri hamusi kunditsvaka nokuti makaona zviratidzo asi nokuti makadya zvingwa mukaguta.

²⁷Musashandire chokudya chinopera asi chokudya chinogara kusvikira kuupenyu husingaperi chamunopiwa noMwanakomana womunhu, nokuti Mwari Baba vakaisa rupawo rwavo paari.”

²⁸Ivo ndokuti kwaari, “Chii chatingaite kuti tishande mabasa aMwari?”

²⁹Jesu akavapindura achiti, “Basa raMwari nderiri rokuti: Imi munofanira kutenda muna iye waakatuma.”

³⁰Saka vakati kwaari, “Ko zvino iwe chiratidzoi chaungaite kuti tione tigotenda mauri; chii chaungaite?

³¹Madzibaba edu vakadya mana murenje sokunyorwa kwazvakaitwa zvichinzi akavapa chingwa chakabva kudenga kuti vadye.”

³²Jesu akati kwavari: “Chokwadi chaizvo ndinoti kwamuri, haasi Mosesi akakupai chingwa chinobva kudenga. Baba vangu ndivo vanokupai chingwa chechokwadi chinobva kudenga.

³³Nokuti chingwa chaMwari ndechiya chinobva kudenga uye chinopa upenyu kunyika.”

³⁴Vakati kwaari, “Tenzi tipei chingwa ichocho nguva dzose.”

³⁵Jesu akati kwavari, “Ini ndini chingwa choupenyu; anouya kwandiri haaiti nzara uye anotenda mandiri haambofa akanzwa nyota.

³⁶Asi imi, sezvandambokuudzai munondiona zvenyu asi hamutendi.

³⁷Chose chandinopiwa naBaba chinouya kwandiri uye anenge auya kwandiri handimurasiri kunze.

³⁸Nokuti ndakauya ndichibva kudenga kwete kuzoita kuda kwangu asi kuda kwewakandituma.

³⁹Kuda kwewakandituma ndokuku kwokuti handifaniri kurasikirwa nechose zvacho chaanenge andipa asi kutochimutsa pazuva remhedziso.

⁴⁰Uku ndiko kuda kwababa vangu kokuti wose anoona mwanakomana achitenda maari awane upenyu husingaperi uye ndichamumutsa nezuva remhedziso.”

⁴¹VaJudha vakabva vamunyunyutira nokuti akati, “Ndini chingwa chakabva kudenga.”

⁴²Vakati, “Uyu handiye here Jesu Mwanakomana waJosefi watinoziva baba naamai vake. Zvino angagoti sei ndakaburuka kudenga.”

⁴³Jesu akavapindura achiti, “Musanyunyute pakati penyu.

⁴⁴“Hapana angauye kwandiri kana Baba vakandituma vasina kutomukweva. Iniwo ndichazomumutsa nezuva rokupedzisira.

⁴⁵Zvakanyorwa muvaporofita kuti, ‘Vose vachadzidziswa naMwari. Munhu wose anoteerera Baba nokudzidza kwavari anouya kwandiri.’

⁴⁶Hazvirevi kuti pana akamboona Baba kusiya iye akabva kuna Mwari ndiye akaona Baba.

⁴⁷Chokwadi chaizvo ndinoti kwamuri anotenda anoupenyu husingaperi.

⁴⁸Ndini chingwa choupenyu.

⁴⁹Madzitateguru enyu akadya mana murenje asi vakafa.

⁵⁰Ichi ndicho chingwa chakaburuka chichibva kudenga chokuti anenge achidya haazofa.

⁵¹Ini ndini chingwa chipenyu chakaburuka kubva kudenga. Munhu wose anodya chingwa ichi, achararama nokusingaperi. Chingwa chandichapa kuti chive upenyu hwapasi pose, inyama yangu pachangu.”

⁵²VaJudha vakaitirana nharo pachavo vachiti, “Munhu uyu angatipe sei nyama yake kuti tidye?”

⁵³Naizvozvo Jesu akati kwavari, “Zvechokwadi chaizvo, ndinoti kwamuri mukasadya nyama yoMwanakomana womunhu nokunwa ropa rake hamuna upenyu mamuri.

⁵⁴Anodya nyama yangu nokunwa ropa rangu ano upenyu husingaperi uye ndichazomumutsa nezuva rokupedzisira.

⁵⁵Nokuti nyama yangu kudya chaiko uye ropa rangu kunwa chaiko.

⁵⁶Anodya nyama yangu nokunwa ropa rangu anogara mandiri neniwo maari.

⁵⁷Sokutumwa kwandakaitwa naBaba vapenyu uye kuti ndinoraramiswa naBaba ndizvozvowo zvinoita vanondidya vachararamiswa neni.

⁵⁸Ichi ndicho chingwa chakaburuka chichibva kudenga chisina kufanana nechakadyiwa, namadzitateguru enyu vakafa. Anodya chingwa ichi achararama nokusingaperi.”

⁵⁹Izvi akazvitaura musinagogu paaidzidzisa kuKaperinaumu.

⁶⁰Vamwe vadzidzi vake vazhinji pavakazvinzwa vakati, “Zviri kutaurwa izvi zvakaoma, ndiani angateerera zvakadai.”

⁶¹Asi Jesu paakazviziva nechomumwoyo kuti vadzidzi vake vari kunyunyuta nazvo, akati kwavari, “Zvakugumburai here izvi?

⁶²Ko maiita sei dai kuri kuti munotoona Mwanakomana womunhu achikwira kwaaiva kare.

⁶³“Mweya ndiwo anopa upenyu; nyama haina maturo. Mazwi andataura kwamuri, mweya noupenyu.

⁶⁴“Asi pane vamwe venyu vasingadaviri. Chaimupa kudaro ndechokuti Jesu aiziva kubvira pokutanga kuti ndavanani vakanga vasingatendi uye kuti ndiani aizomupandukira.”

⁶⁵Akatizve ndokusaka ndakutaurirai kuti, “Hapana angauye kwandiri kana asina kuzvipiwa naBaba.”

⁶⁶Mushure maizvozvo vazhinji vavadzidzi vake vakamusiya vakasazofambazve naye.

⁶⁷Jesu akati kune vanegumi navaviri vaya, “Kana imi mava kudawo kuenda here?”

⁶⁸Simoni Pita akamupindura achiti, “Tenzi tingaende kuna aniko, imi ndimi muna mazwi oupenyu husingaperi.

⁶⁹Takadavira uye tinoziva kuti imi ndimi Mutsvene waMwari.”

⁷⁰Jesu akapindura achiti, “Ndakakusarudzai muri gumi navairi handiti? Asi mumwe wenyu ndiDhiabhori.”

⁷¹Aitaura nezvaJudhasi mwana waSimoni Isikarioti. Nokuti iyeyu, mumwe chaiye wavanegumi navaviri ndiye aizomutengesa.