Read Bhaibhiri Idzva rechiShona Johani 7 Bible Online

Johani 7 - Bhaibhiri Idzva rechiShona bible

Johani 7

¹Mushure maizvozvi, Jesu aingotenderera ari muGarirea asingadi kuenda kuJudhea nokuti vaJudha vaida kumuuraya.

²Izvozvo, mazuva makuru avaJudha amatumba akanga ava pedyo.

³Naizvozvo vakomanavanun'una[13] vake vakati kwaari, “Dai mabva kuno muende kuJudhea kuti vadzidzi venyu vaone mabasa amuri kuita.

⁴Nokuti hapana munhu anoita zvomuchivande kana achida kunyatsozivikanwa. Kana muchitoita mabasa akadai zviratidzei kunyika.

⁵Asi ivowo, vakoma navanun'una vake vakanga vasingatendi maari.”

⁶Jesu akavati, “Nguva yangu haisati yasvika asi kwamuri chero nguva inguva kwayo.

⁷Imi nyika haikuvengei asi ini inondivenga nokuti ndinoidurira kuti zvainoita zvakaipa.

⁸Imimi endai zvenyu kumazuva makuru iwayo ini handisati ndoenda [14] kumazuva makuru iwaya nokuti nguva yangu haisati yanyatsokwana.”

⁹Akataura izvi ndokubva asara zvake kuGarirea.

¹⁰Vakoma navanun'una vake pavakaenda kumazuva makuru aya iye akazoenda zvechiverevere, zvisingaonekwi navanhu.

¹¹VaJudha vakanga vachimutsvaka pamazuva makuru iwayo vachiti, “Ko ari kupiko?”

¹²Pakanga pachiitwa chizevezeve kwazvo nezvake mukati mavanhu. Vamwe vaiti, “Munhu wakanaka;” vamwewo vachiti, “Kwete, ari kurasisa vanhu kusiri iko.”

¹³Asi pamusana pokutya vaJudha hapana aitaura pachena nezvake.

¹⁴Pava pakati pamazuva makuru iwayo Jesu akaenda muTemberi akatangisa kudzidzisa.

¹⁵VaJudha vakashamiswa nazvo vachiti, “Ko munhu uyu akawanepiko ruzivo rwaanarwo iye asina kudzidza?”

¹⁶Jesu akapindura achiti, “Zvandinokudzidzisai hazvisi zvomusoro wangu asi zvinobva kunaiye akandituma.

¹⁷Kana munhu ane chido chokuita zvinoda Mwari anobva aziva kuti rudzidziso urwu runobva kuna Mwari here, kana kuti ndiri kutaura zvomusoro wangu.

¹⁸Kana munhu achitaura zvomusoro wake anotsvaka mbiri yake asi munhu anotsvaka mbiri youyo anenge amutuma ari pachokwadi uye maari hamuna unyengedzi.

¹⁹Mosesi akakupai Mutemo handiti? Asi hapana kana mumwe anochengeta mutemo iwoyo. Munoda kundiurairei?”

²⁰Vanhu vakamupindura vachiti, “Une mweya wakaipa iwe! Ndiani arikuda kukuuraya?”

²¹Jesu akavapindurawo achiti, “Ndakangoita chiitiko chimwechete mose mukabva mashamiswa.

²²Mosesi akakutii muite dzingiso (zvisingarevi zvazvo kuti zvakabva kuna Mosesi asi kumadzitateguru enyu) asi imi munodzingisa munhu nezuva resabata.

²³Kana muchidzingisa munhu nezuva reSabata muchiitira kuti mutemo waMosesi urege kutyorwa. Ko zvino munoshatirirwei kana ndakaporesa munhu zvokupedzeredza pamusi weSabata?

²⁴Musatonge chinhu nezvamunoona kunze kwacho tongai nemwero kwawo wokutonga.”

²⁵Nezvo vamwe vanhu vokuJerusaremu vakati, “Haasi iye munhu wavari kuda kuuraya here uyu. Hoyu ari kutaura pachena chena;

²⁶asi hapana chavari kutaura kwaari, zvinoreva here kuti vakuru vakuru vava kunyatsoziva kuti uyu ndiye Mesia.

²⁷Kunobva munhu uyu tinokuzivaka isu asi kana Mesia ouya hapana anoziva kwaanobva.”

²⁸Naizvozvo Jesu akadaidzira achidzidzisa muTemberi achiti, “Heya munotondiziva nokwandinobva kwose nhai? Asi ini handina kungouya zvomusoro wangu ndakatotumwa nouyo ari pachokwadi wamusingazivi imi.

²⁹Ini ndinomuziva nokuti ndinobva kwaari, uyewo ndiye akandituma.”

³⁰Naizvozvo vakada kumusunga. Asi hapana akambomubata nokuti nguva yake yakanga isati yasvika.

³¹Zvakadaro zvazvo vanhu vazhinji vakatenda maari vachiti, “Ko iye Kristu kana azouya, achaita zviratidzo zvakawanda kupfuura zvakaitwa nomunhu uyu here?”

³²VaFarisei vakanzwa zevezeve raiitwa navanhu nezvake. Naizvozvo vapristi vakuru navaFarisei, vakatuma mapurisa apaTemberi kundomusunga.

³³Jesu akati, “Ndichangova nemi kwekanguva kadiki; ndozodzokera kune wakandituma.

³⁴Muchanditsvaka asi hamundiwani uye kwandinenge ndiri hamukwanisi kuuyako.”

³⁵VaJudha vakataurirana vachiti, “Ko munhu uyu ari kuda kuenda kupiko, kwatisingakwanisi kumuwana? Arikuda kuenda kuvaJudha vakapararira kuvaGiriki achindodzidzisa vaGiriki here?

³⁶Ko anoreveiko kana achiti, “ ‘Muchanditsvaka asi hamundiwani uye kwandinenge ndaenda imi hamukwanisi kuuyako.’ ”

³⁷Pazuva rokupedzisa ramazuva makuru aya zuva racho rakanga riri guru kupinda ose zvawo Jesu akasimuka akaparidza achiti, “Aninani ane nyota ngaauye kwandiri anwe.

³⁸Aninani anodavira mandiri, sokutaura kunoita Magwaro Matsvene[15] mumwoyo make muchaerera nzizi dzemvura youpenyu.”

³⁹Izvozvo aitaura nezvaMweya aizogamuchirwa navanotenda maari nokuti Mweya akanga asati apiwa kuvanhu nokuti Jesu akanga asati awaniswa mbiri yake.

⁴⁰[16] Vamwe vanhu vaiva mugungano iroro, pavakanzwa mazwi aya vakati, “Uyu ndiye chaiye muporofita uya.”

⁴¹Vamwewo vakati, “Uyu ndiye Mesia uyu.” Vamwe vakatiwo, “Mesia anofanira kubva kuGarirea here?

⁴²Handiti Magwaro Matsvene[17] anoti, ‘Mesia anofanira kuva chizvarwa chaDhavhidhi uye kuti anobva kuBheterehemu, musha waigara Dhavhidhi.’ ”

⁴³Saizvozvo pakava nokutsaukana mukati mavanhu pamusana pake.

⁴⁴Vamwe vaitoda kumusunga asi hapana kana neakambomubata zvake.

⁴⁵Mapurisa aya akadzokera kuvapristi vakuru navaFarisei avo vakavati, “Sei musina kuuya naye?”

⁴⁶Mapurisa akati, “Hapana munhu ati ambotaura somunhu uyu.”

⁴⁷VaFarisei vakapindura vachiti, “Nemiwo marasiswa nhai?

⁴⁸Pane mumwe wavakuru — vakuru kana mumwe wavaFarisei akatenda maari here

⁴⁹kusiya vanamunhuwo zvavo ava vasingazivi mutemo uye vane rushambwa ava?”

⁵⁰Nikodhimasi, uya akamboenda kwaari aiva mumwe wavo akati kwavari.

⁵¹“Zviya, handiti mutemo wedu haupe munhu mhosva asina kutanga ambonzwika uye kuziva zvaanoita?”

⁵²Ivo vakapindura vachiti, “Asi newewo unobva kuGarirea su? Tsvagaka uone zvako kuti hakuna muporofita anobva kuGarirea.”

⁵³Mumwe nomumwe akaenda kumusha kwake.