Read Bhaibhiri Idzva rechiShona Mabasa 18 Bible Online

Mabasa 18 - Bhaibhiri Idzva rechiShona bible

Mabasa 18

¹Mushure mezvo akabva kuAteni akaenda kuKorinde.

²Akawana mumwe muJudha ainzi Akwira, mugari wokuPondusi, akanga achangobva kuItari, nomudzimai wake anonzi Pirisira, nokuti Kiraudiusi akanga ati vaJudha vose ngavabve muRoma. Saka akaenda kundovaona

³pamusana pokuti vaiva vebasa rimwechetero akagara akashanda navo nokuti aiita basa rimwechetero navo rokugadzira matendhe.

⁴Pasabata rimwe nerimwe aitaura musinagogu achikurudzira vaJudha navaGiriki.

⁵Pakasvika Sirasi naTimoti vachibva kuMasedhonia, Pauro aiva mubasa rokuparidza, achipupura kuvaJudha, kuti Mesia ndiJesu.

⁶Pavakapokana naye vachimunyomba akazunza hanzu dzake akati kwavari, “Ropa renyu ngarikupfukirei! Ini mhosva handisisina. Kubvira iye zvino ndavakuenda kune vechirudzi.”

⁷Akabvapo akaenda kumba komumwe ainzi Titosi Jusitusi munhu aitya Mwari. Imba yake yaiva pedyo nesinagogu.

⁸Kirisipusi mukuru wapasinagogu akatenda muna Tenzi pamwechete nemhuri yake. Vazhinji vomuKorinde pavakanzwa Pauro vakatenda vakaombekwa.

⁹Nohumwe usiku Tenzi akataura kuna Pauro muchiratidzo achiti, “Usatye zvako. Iwe taura chete, usanyarare

¹⁰nokuti ndinewe uye hapana munhu achakurwisa zvokukuvadza nokuti ndine vanhu vakawanda muguta rino.”

¹¹Nezvo akagaramo kwegore nemwedzi mitanhatu achidzidzisa Shoko raMwari pakati pavo.

¹²Panguva yakanga Gario ari gavhuna weAkaya, vaJudha vakaita rimwe kurwisa Pauro. Vakamuunza kudare

¹³vachiti murume uyu anokurudzira vanhu kunamata Mwari zvisiri pamurao.

¹⁴Pauro paakanga ava kuda kutaura, Gario akati kuvaJudha, “Dai yanga iri mhosva kana kuti kutadza kwakaipisisa, ndaiwana chikonzero chokukuitirai mwoyo murefu, vaJudha imi.

¹⁵Zvino zvairi nyaya yokubvunza pamusoro pezvamazwi nezvamazita uye nezvomutemo wenyu, zvionerei pachenyu. Handidi kuva mutongi mune zvinhu izvi.”

¹⁶Akabva avadzinga mudare.

¹⁷Vose vakabata Sositeni mukuru wapasinagogu vakamurova pamberi pedare; asi Gario haana kuita hanya nazvo.

¹⁸Mushure mezvo Pauro akagara mamwe mazuva mazhinji ndokuzoonekana nevehama. Akazoenda kuSiria nechikepe pamwechete naPirisira naAkwira. KuKenikirie akaveura vhudzi rake nokuti akanga aita mhiko.

¹⁹Vakasvika kuEfesusi akavasiyako asi iye akamboenda musinagogu akataura kuvaJudha.

²⁰Pavakamukumbira kuti ambogarazve, akaramba.

²¹Paakanga ava kuenda akati, “Ndichadzoka kwamuri kana Mwari achida. Akaenda nechikepe achibva kuEfesusi.”

²²Paakasvika kuSezaria akakwira akandokwazisa sangano ndokuzodzika kuAndiyoku.

²³Akati apedza chinguva ariko akasimuka akaenda munzvimbo nenzvimbo nomudunhu reGaratia nereFirigia achisimbisa vadzidzi vose.

²⁴Mumwe muJudha ainzi Aporosi, mugari wokuArekizandiria akauya kuEfesusi. Akanga ari nyanzvi yokutaura, munhu akanga akadzidza kwazvo Magwaro Matsvene.

²⁵Akanga akadzidziswa nzira yaTenzi uye nemwoyo wake wose aitaura nokudzidzisa nemazvo chaimo zvaJesu kunyange aiziva ruombeko rwaJohani chete.

²⁶Akatangisa kutaura nechivindi musinagogu. Pirisira naAkwira pavakamunzwa vakamutora vakamutsanangurira nzira dzaMwari nemazvo chaimo.

²⁷Paakada kuyambukira kuAkaya vehama vakamukurudzira vakatonyora kuna vadzidzi kuti vamugamuchire.

²⁸Paakasvika, akabatsira kwazvo vakanga vatenda nenyasha dzaMwari nokuti akapwisa vaJudha pachena achiratidza naMagwaro Matsvene kuti Jesu ndiye Mesia.