Read Bhaibhiri Idzva rechiShona Mabasa 23 Bible Online

Mabasa 23 - Bhaibhiri Idzva rechiShona bible

Mabasa 23

¹Pauro akanyatsotarisana nedare akati, “Hama ndakagara nehana yakachena pamberi paMwari kusvikira pari nhasi.”

²Mupristi mukuru Ananiya akati kune vakanga vamire pedyo naye vamurove pamuromo.

³Pauro akati kwaari, “Mwari achakurova, iwe chidziro zvacho chadzururwa kuchena nesuko. Ndozvawakagarira ipapo kuti unditonge zviri pamutemo asi uchityora mutemo nhai? Uri kuti ndinofanira kurohwa.”

⁴Vakanga vamire padyo naye vakati, “Unoda kushora mupristi mukuru waMwari here?”

⁵Pauro akati, “Handina kuziva, hama dzangu, kuti mupristi mukuru nokuti zvakanyorwa zvichinzi, ‘Haufaniri kutaura zvakaipa nezvemutongi wavanhu vako.’ ”

⁶Pauro, paakaona kuti chimwe chikamu chaiva chiri chavaSadhusei, chimwe chiri chavaFarisei akadaidzira mudare achiti, “Varume hama ini ndiri muFarisei, mwana womuFarisei. Ini ndiri kupinzirwa dare pamusana pechitarisiro uye kumuka kwavakafa.”

⁷Paakataura izvi pakabva pava nokupesana pakati pavaFarisei navaSadhusei. Musangano wakabva wakamukana.

⁸Chiripo ndechokuti, vaSadhusei vanoti zvokumuka kwavafi hapana kana mutumwa kana mweya asi vaFarisei vanoti zvose izvozvo zviriko.

⁹Pakabva pamuka bopoto guru. Dzimwe nyanzvi dzomutemo webato ravaFarisei vakasimuka vachipikisa vachiti, “Hapana chatinoona chakaipa nomunhu uyu. Ko, zvichida mumwe mweya kana kuti mumwe mutumwa akataura naye!”

¹⁰Kupikisana uku zvakwakasvika pokuti bata wabata, mukuru mukuru wamasoja, nokutya kuti Pauro angangodamburwa damburwa navo, akati masoja adzike andomutora nechisimba pakati pavo vamuunze munzvimbo inogara masoja.

¹¹Usiku hwakatevera, Tenzi akamira pedyo naPauro akati, “Tsunga mwoyo, nokuti sokundipupurira kwawaita muJerusaremu unofanira kundopupurawo kuRoma.”

¹²Pakwakachena vaJudha vakaita bangano vakazvisunga nemhiko yokuti havambodya kana kunwa kusvikira vatouraya Pauro.

¹³Vakaita bangano iri vaipfuura makumi mana.

¹⁴Vakaenda kuvaPristi vakuru navakuru vakuru vakati tanyatsozvisunga nemhiko kuti hatimbodyi kusvikira tauraya Pauro.

¹⁵Naizvozvo imi pamwe nedare taurirai mukuru mukuru wamasoja kuti amudzikise kwamuri sokunge munoda kunyatsotsvakisisa mhosva yake nemazvo chaimo. Isu takagadzirira kumuuraya asati ambosvika pedyo.

¹⁶Zvino mwana wehanzvadzi yaPauro akanzwa zvokuhwandira kwavo. Nezvo akandopinda munzvimbo yaigara masoja akataurira Pauro.

¹⁷Pauro akadaidza mumwe wavatungamiri vezana akati, “Endai nejaya iri kumukuru mukuru wamasoja nokuti ane zvimwe zvaari kuda kumutaurira.”

¹⁸Naizvozvo akamutora akaenda naye kumukuru mukuru wamasoja uya akati, “Pauro musungwa uya andidana akandikumbira kuti ndiunze jaya iri kwamuri nokuti rine zvarinoda kutaura kwamuri.”

¹⁹Mukuru mukuru wamasoja akamubata ruoko akaenda naye parutivi omubvunza muchivande achiti, “Chii chaunoda kunditaurira.”

²⁰Iye akati, “VaJudha varangana kuti vakukumbirei kuti mudzikise Pauro kudare mangwana sokunge vanoda kunyatsotsvagisisa mhosva yake nemazvo chaimo.

²¹Asi imi musabvume nokuti kune vanhu vavo varume vanopfuura makumi mana vanenge vakamuhwandira vatozvisunga nemhiko yokuti havamboruma chinhu kana kunwa chinhu kusvikira vatouraya Pauro. Iye zvino vatogadzirira. Vangomirira chitsidzo chenyu.”

²²Mukuru mukuru wamasoja akaendesa jaya riya achiriudza kuti risataurire kana munhu zvake kuti ramuudza izvozvi.

²³Akadaidza vatungamiri vezana vaviri akati, “Paawa yechipfumbamwe mauro ano, gadzirirai masoja mazana maviri navarwi vanotasva mabhiza makumi manomwe navanorwa namapfumo mazana maviri vokuenda kuSezaria,

²⁴muwanisewo Pauro mabhiza okutasva, mumusvitse zvakanaka kuna gavhuna Ferekisi.

²⁵Akanyora tsamba sezvizvi:

²⁶“Ini Kiraudiusi Risiasi, ndinokunyorerai imi vanoremekedzwa vaGavhunha Ferekisi ndichikukwazisai.

²⁷Murume uyu akabatwa navaJudha akanga oda kutouraiwa navo. Pandakavasvikira namasoja ndakamununura ndikanzwa kuti muRoma.

²⁸Pandainge ndichida kuziva mhosva yavaimupa ndakadzika naye kudare ravo.

²⁹Ndakaona kuti vaimupa mhosva dzezvemutemo wavo asi hapana mhosva yavaimupa inokodzera rufu kana kuiswa mujeri.

³⁰Pandakaziviswa kuti pane bangano rakaitirwa iye, ndabva ndamutumira kwamuri pakarepo ndichiudzawo vari kumupa mhosva kuti vataure pamberi penyu zvaakatadza.”

³¹Naizvozvo masoja, sokuudzwa kwavakanga vaitwa, vakaenda naye nousiku vakamusvitsa kuAndipatirisi.

³²Mangwana acho vakadzokera kunzvimbo inogara masoja vosiya varwi vamabhisa kuti vaende naye mberi.

³³Pavakasvika kuSezaria vasvitsa tsamba iya kuna Gavhuna vakaturira Pauro kwaari.

³⁴Paakaverenga tsamba iya, akabvunza kuti anogara kudunhu ripi. Paakaziva kuti ndeweSirisia

³⁵akati, “Ndichakunzwa kana vari kukupa mhosva vasvika.” Akati ngaachengetedzwe mumuzinda waHerodhi.