Read Bhaibhiri Idzva rechiShona Varoma 16 Bible Online

Varoma 16 - Bhaibhiri Idzva rechiShona bible

Varoma 16

¹Ndinoturira kwauri hanzvadzi yedu Febhi mutungamiriri mushandiri wesangano rokuKenikerie kuti mumugamuchire muzita raTenzi[15] zvinokodzerana navatsvene.

²Mubatsirei muna zvose zvaangade kwamuri nokuti iye akabatsirawo vazhinji kunyange ini.

³Ndikwazisirei Prisika naAkwira vashandi pamwe neni mubasa raKristu Jesu

⁴vakapinda munjodzi yokuda kudimburwa musoro pamusana pangu. Vanotendwa, kwete neni ndoga, asi kunyange namasanganowo ose evechirudzi. Ndikwazisireiwo sangano rinopindira pamba pavo.

⁵Ndikwazisireiwo Epenetusi wapamwoyo, akava wokutanga kuAsia kupindukira kuna Kristu.

⁶Ndikwazisireiwo Maria akashanda nesimba pakati penyu.

⁷Ndikwazisireiwo Andironikusi naJuniasi hama dzangu vakanga vari vamwe vangu muusungwa, varume vanoremekedzeka pakati pavapositori. Vakanditangira kuva naKristu.

⁸Ndikwazisireiwo Ambiriatusi shamwari yangu yapamwoyo muna Kristu.

⁹Ndikwazisireiwo Urubhanusi mushandi pamwe neni mubasa raKristu naSitakisi, wangu wapamwoyo.

¹⁰Ndikwazisireiwo Aperesi, munhu akatendeka kuna Kristu. Ndikwazisirei vemhuri yaAristobhurusi,

¹¹mundikwazisirewo hama yangu Herodioni. Ndikwazisireiwo muna Tenzi vemhuri yokwaNarisisusi.

¹²Ndikwazisireiwo vashandi pamwe nesu muna Tenzi Tirifena naTirifosa, mundikwazisirewozve Perisi wapamwoyo akashanda zvakaomarara mubasa raTenzi.

¹³Ndikwazisireiwo Rufusi mukuru mukuru mubasa raTenzi naamai vake vari amai vanguwo.

¹⁴Ndikwazisireiwo Asingiretusi naFiregoni naHemesi naPatrobhasi naHemasi nevehama vavanawo.

¹⁵Ndikwazisireiwo zvakare Firorogusi naJuria naNereusi nehanzvadzi yake naOrimbasi navatsvene vose vavanavo.

¹⁶Kwazisanai muchitsvodana[16] zvitsvene. Masangano ose aKristu anokukwazisai.

¹⁷Ndinokukumbirisai hama dzangu kuti munyatsoongorora avo vanopesanisa vanhu nokuunza zvimhingamupinyi vachirwisa zvidzidzo zvamakadzidziswa. Siyanai navo.

¹⁸Vanhu vakadaro havasipo kushandira Tenzi wedu Kristu asi havi dzavo. Vanonyengedza vasina kuchenjera nokunatsa mukanwa kwavo namazwi anotapira.

¹⁹Guhu rokuteerera kwenyu rakapararira kose kose zvokuti ndinofara kwazvo nemi. Ini ndingade kuti muve shasha pakuita zvakanaka asi muve samazirema zvenyu pakuita zvakaipa.

²⁰Ipapo Mwari worugare anobva apwanyira Satani pasi petsoka dzenyu. Dai Tenzi wedu Jesu Kristu angokuitirai nyasha.

²¹Timoti wandinoshanda naye, anokukwazisaiwo pamwechete naRukio naJasoni, naSosipata hama dzangu.

²²Ini Tetiusi munyori wetsamba ino ndinokukwazisaiwo muna Tenzi.

²³Gayusi ari kundichengeta mumba make uye ari kuchengeta sangano rose mumba make ari kukukwazisai. Erasitusi sahomwe weguta rino nehama yedu Kwatusi vanokukwazisai.[17]

²⁵Ngatirumbidzei iye anogona kukusimbisai maererano neShoko rangu Rakanaka uye maererano nokuparidza kwaJesu Kristu uye nokuzarurwa kwezvakanga zvakavandika kwenguva ndefu asi zvino zvakazoburitswa pachena.

²⁶Uye nezvakanyorwa navaporofita zvikazoziviswa kumarudzi ose maererano nezvakanzi naMwari wokusingaperi ngazviziviswe kuti kuve nokuteerera kunounzwa nechitendero.

²⁷Mbiri ngaipiwe kuna Mwari oga anoungwaru nokuna Jesu Kristu nokusingaperi. Ameni.